Mark 15

1Ku bwabaire nibutaagurikana, abahongyerezi abakuru hamwe n'abakuru omu ihanga, n'abahangu b'eiteeka, n'eishengyero ryona, baahanuura; bwanyima baaboha Yesu, baamutwara, baamuha Pilaato. 2Pilaato amubuuza ati: Weeza ori Omugabe w'Abayudaaya? Onu amugarukamu ati: Waakigamba. 3Abahongyerezi abakuru bamutabaariza bingi. 4Pilaato agaruka amubuuza ati: Toine ki orikugarukamu n'akakye? Reeba ebi baakutabaariza ku biri bingi. 5Nabwo Yesu tamugarukamu; ekyo kitangaaza Pilaato. 6Mbwenu ahari ibara bugyenyi nk'obwo, Pilaato akaba amanyiriire kubarekurira embohe ei baabaire bamushaba. 7Obwo, omuntu orikwetwa Baraba akaba abohirwe hamwe n'abagomi abaitiire abantu omu kajagararo. 8Ekimbuuro ky'abantu ku kyagiire kushaba Pilaato kubakorera eki ashangwa abakorera, 9Pilaato yaabagarukamu naababuuza ati: Nimwenda ngu mbarekurire Omugabe w'Abayudaaya? 10Ahabw'okuba akaba naamanya ku abahongyerezi abakuru bamuhaireyo ahabwa eihari. 11Abahongyerezi abakuru nikwo kwimukiiriza ekimbuuro ky'abantu, ngu haakiri abarekurire Baraba. 12Bwanyima Pilaato agaruka ababuuza ati: Mwbenu shi ou murikweta Omugabe w'Abayudaaya nimwenda ngu mmugire nta? 13Kwonka bo baagaruka baayomba nibamugarukamu bati: Mubambe aha musharaba! 14Pilaato nikwo kubabuuza ati: Ahanki? Akozire kibi ki? Kwonka bo bayomba munonga okukiraho bati: Mubambe aha musharaba! 15Mpaho Pilaato ahabw'okwenda kugwisa gye abantu, abarekurira Baraba; kandi ku aheza kuragiira kuteera Yesu ebyasha, amuhayo kubambwa aha musharaba. 16Abaserukare nikwo kutwara Yesu, bakamuta omu kibuga ky'omu kikaari ky'ogwo mutegyeki; bakeeta eihe ryabo ryona, rikateeranira hamwe. 17Bakamujweka omwenda gwa bujwa, bakazinga ekirunga ky'amahwa, bakakimujweka omu mutwe. 18Bakatandika kumutangirira bati: Singa, Mugabe w'Abayudaaya! 19Bakamuteera orubingo omu mutwe, bakamucwera amacwante, bakatsimba amaju nibamuramya. 20Ku baaherize kumushungisa batyo, baamujuura ogwo mwenda gwa bujwa, baamujweka ebye; baamushohoza nibaza kumubamba aha musharaba. 21Mpaho baabugana omuhinguzi Simooni owa Kureene, ishe Alekisandero na Ruufo, owaabaire naaruga omu kyaro; baamugyema kumwekorerera omusharaba. 22Batyo baahitsya Yesu omu mwanya ogurikwetwa Gologota, amakuru gaakyo ngu, omwanya gw'Empanga y'Omutwe. 23Baamuha viino etimbwirwemu entsinda, kwonka yaagyanga. 24Bwanyima baamubamba aha musharaba; baabagana ebijwaro bye nibabiteerera enteenyu, kumanya eki buri omwe araatware. 25Obu baamubamba aha musharaba zikaba ziri shaaha ishatu. 26Ekihandiiko ekirikumanyisa eki baamutuzire, kikaba nikigira kiti: OMUGABE W'ABAYUDAAYA. 27Kandi bakamubamba aha musharaba n'abambuzi babiri, omwe aha rubaju rwe rwa buryo, n'ondi aha rwa bumosho. 28[Ekyahandiikirwe kyabona kuhikiirira, ekirikugira kiti: Akabarirwa hamwe n'enkozi z'ebibi.] 29Abaabaire nibarabaho bakamutsyorera, nibamuha mutinzi, nibagira bati: Otyo! Iwe orikusheenya Nyaruju okagaruka okagyombeka omu biro bishatu, 30mbwenu yejune, orugye aha musharaba! 31Abahongyerezi abakuru hamwe n'abahangu b'eiteeka nabo baamushungisa nibagambirana bati: Ku yaajunire abandi; mbwenu k'ataabaasa kwejune! 32Kristo ogwo, Omugabe wa Isiraeli, hati naatemburukye aha musharaba tukireebe, haza tumwikirize! N'abu yaabaire abambirwe nabo, baaba nikwo baamujuma. 33Eshaaha mukaaga ku zaahikire, ensi yoona yaashwekwa omwirima, okuhitsya aha shaaha ya mwenda. 34Kandi aha shaaha ya mwenda, Yesu yaahooga ati: Eloi, Eloi, lama sabakitaani? Ekirikumanyisa ngu, Ruhanga wangye, Ruhanga wangye, ahabw'enki wantsigaho? 35Bamwe aha baabaire beemereire aho, ku baakihuriire, baagira bati: Nimuhurire, naayeta Eliya! 36Omwe aharibo yairuka, yaajabika ekyangu omu viino y'encenku; yaakishokamu orubingo, yaakimuha kukinyuunyuuta, naagira ati: Murekye tureebe Eliya yaaba naija kumuhanura! 37Mpaho Yesu ku yaaherize kuborooga n'eiraka rihango, gwahwamu. 38Reero omukingo gwa Nyaruju gwatemukamu emitanda ebiri okwiha aha mutwe okuta ahansi. 39Omukuru w'abaserukare igana, owaabaire amwemereire omu maisho, ku yaareebire yaitsya atyo ogw'aha muheru, yaagira ati: Buzimazima ogu muntu abaire ari Omwana wa Ruhanga! 40Hakaba hariho abakazi abaabaire nibareebera hangahari; omuribo harimu Mariya Magadaleena, na Mariya nyina wa Yakobo omuto na Yose, na Saalome, 41abaabaire bamukuratira akiri Galilaaya nibamuheereza, kandi hakaba hariho n'abandi bakazi baingi abaabaire baizire nawe Yerusalemu. 42Omwabazyo ku gwakiikire, haza riri eizooba ry'Okweteguura, niryo ryebembera Sabato, 43Yosefu owa Arimataaya omuhanuuzi mukuru w'eishengyero, nawe owaabaire ategyereize obukama bwa Ruhanga, yaayetuurira Pilaato n'obumanzi, yaamushaba omutumbi gwa Yesu. 44Pilaato kyamutangaaza okuhurira ngu yaafiire; nikwo kweta omukuru w'abaserukare igana, akamubuuza ku araabe buzimazima yaafiire. 45Ku yaaherize kumanyisibwa ku yaafiire, yaikiriza Yosefu kutwara omutumbi. 46Mpaho onu yaagura omwenda gwa kitaani, yaahanura Yesu, yaamuzinga omuri ogwo mwenda, yaamuta omu kituuro ekyabaire kishorogotoroirwe omu rukiri; bwanyima yaakumbagaza eibaare, yaarikinga aha munwa gwakyo. 47Haza Mariya Magadaleena na Mariya nyina wa Yose baareeba ahi yaamuta.

will be added

X\