Mark 1

1Oku nikwo Amakuru Marungi ga Yesu Kristo, Omwana wa Ruhanga, gaatandikire. 2Kikahandiikwa omu kitabo kya Isaaya omurangi, ngu: Reeba, nintuma entumwa yangye kukubandizayo, niyo erikutebeekanisiza omuhanda. 3Hariho orikwamuriza omu ihamba, ati: Mutebeekanisize Mukama omuhanda, mugorore otuhanda twe. 4Nikyo Yohaana Omubatizi yaareebekyeire omu ihamba, akarangirira abantu ngu beegarukyemu, babatizibwe, babone kusaasirwa ebibi. 5Abantu b'omuri Buyudaaya yoona n'ab'omuri Yerusalemu boona bakamushangayo; yaababatiriza omu mugyera Yorudaani nibaatura ebibi byabo. 6Yohaana ogwo akaba ajwara ekijwaro ky'ebyoya by'engamira, akyezirikisa orukoba, kandi ekyokurya kye kiri enzigye n'obwoki bw'omu ishwa. 7Ku yaabaire aba naarangirira, agira ati: Hariho onkuratiire orikunkiza obushoboorozi, ou ntashemereire kwinama kukomoorora orukoba rw'enkaito ze. 8Manya nyowe mbabatiize n'amaizi, kwonka we aryababatiza na Mutima Orikwera. 9Omu biro ebyo Yesu akaija naaruga Nazareeti ey'omuri Galilaaya; Yohaana yaamubatiriza omu mugyera Yorudaani. 10Ku yaabaire yaajabuka ati omu maizi, yaareeba eiguru ryakinguuka, kandi na Mutima naamushuumaho nk'enkombe. 11Reero eiraka ryayema omu iguru riti: Niiwe Mwana wangye ou nkunda, kandi ou nshemerererwa munonga. 12Ahonaaho ebyo ku byahwaire, Mutima yaamutwara omu ihamba. 13Yaamarayo ebiro makumi ana naayohibwa Sitaane; obwo ari ahagati y'enyamaishwa, kandi baamaraika nibamugaragira. 14Ku baaherize kukwata Yohaana, Yesu yaaza Galilaaya, yaarangirirayo Amakuru Marungi ga Ruhanga, 15yaagira ati: Obunaku buhikire, obukama bwa Ruhanga bwiriire haihi; mwegarukyemu, mwikirize Amakuru Marungi. 16Yesu ku yaabaire naaraba aha rubaju rw'enyanja ya Galilaaya, yaareeba Simooni na Andereya omurumuna nibatambika akatimba omu nyanja, ahabw'okuba bakaba bari abajubi. 17Yesu nikwo kubagira ati: Nimwije munkuratire, niinyija kubahindura abajubi b'abantu. 18Batyo ahonaaho baatsigaho obutimba bwabo, baamukuratira. 19Ku yaagyenzireho omu maisho akaanya kakye, yaareeba Yakobo mwene Zebedaayo na Yohaana omurumuna, nabo bari omu bwato nibashumikanisa obutimba bwabo. 20Ahonaaho yaabeeta; baatsigaho Zebedaayo ishebo omu bwato hamwe n'abakozi be, baamukuratira. 21Ku baagiire Kafarinaumu aha izooba rya Sabato, Yesu yaaza omu iteeraniro, yaatandika kwegyesa. 22Baatangaarira munonga emyegyeseze ye, ahabw'okuba akabeegyesa aine obushoboorozi, atari nk'abahangu b'eiteeka. 23Obwo omuri eryo iteeraniro hakaba harimu omushaija otembirwe ekyago; 24yaaborooga ati: Yesu owa Nazareeti, noofa ki naitwe? Oizire kutucwekyereza? Ninkumanya, ori Orikwera wa Ruhanga. 25Yesu yaakikabukira, ati: Hunama, omurugyeho! 26Ekyo kyago kyamutuura ahansi, kyamutetemya, kyamurugaho nikiborooga. 27Abantu baatangaara, nibabuuzana bati: Beitu eki n'enki? Ka n'enyegyesa nsya erimu obushoboorozi! Naaragiira n'ebyago, bimuhurira. 28Ahonaaho okurangaanwa kwe kwabuga hoona omu byanga ebyehinguririize Galilaaya. 29Yesu ku yaarugire omu iteeraniro, yaagyenda na Yakobo na Yohaana, baaza omwa Simooni na Andereya. 30Obwo nyinazaara wa Simooni akaba ari omu kitanda arwaire omushwija. Ku yaahikireho ati, baamumugambira; 31yaagyenda, yaamuhikaho, yaamukwata omukono, yaamwimutsya; omushwija gwamurugaho, yaatandika kubaheereza. 32Ogwo mwabazyo, eizooba ryaheza kurenga, bakamureetera boona abaabaire barwaire n'abatembirwe ebyago n'emizimu. 33Ab'omu kirorero kyona baija nibamiganira aha irembo. 34Yaakiza baingi abaabaire barwaire endwara zitari zimwe, yaabinga ebyago bingi; kandi tiyaabiikiriza kugamba, ahabw'okuba bikaba nibimumanya. 35Ku bwabaire butakaseesire, Yesu yaimuka, yaaruga omu nju, yaaza aheekiikire, yaashabirayo. 36Simooni na bagyenzi be baaza kumusherura. 37Ku baamugwireho, baagira bati: Abantu boona nibakusherura. 38Nawe yaabagarukamu ati: Ka tuze ahandi omu bindi birorero ebiri haihi, nayo nyegyeseyo; ahabw'okuba ekyo nikyo kyandeetsire. 39Atyo araba omuri Galilaaya yoona, naarangirira omu mateeraniro gaabo, kandi naabinga ebyago. 40Bwanyima omubembe yaamwetuurira, yaamweshengyereza, amutsimbiire amaju naamugira ati: Ku oraabe nookisiima, noobaasa kunshemeza. 41Yesu yaamugirira esaasi, yaagorora omukono, yaamukoraho naagira ati: Eego, ninkisiima; shemera. 42Ebibembe byamurugaho ahonaaho, yaashemera. 43Yesu yaamwohereza juba, kandi yaamwehanangiriza munonga, 44naamugira ati: Otagira ou waakigambira; kwonka irooko oyeyorekye omuhongyerezi, kandi ahabw'okushemezibwa kwawe, oheyo eki Musa yaaragiire, kuhamiza abantu. 45Kwonka ogwo mushaija agyenda, atandika kukigambira weena ou yaabanda, n'okukibuzya hoona. Haza ekyo kyareetera Yesu okutabaasa kutaaha bundi omu birorero butunu, kureka yaaguma aheeru omu ihamba. Abantu baaruga oku n'oku baamushangayo.

will be added

X\