Luke 7

1Yesu, ku yaaherize kugambira abantu ebyo byona, yaaza Kafarinaumu. 2Omukuru w'abaserukare igana waayo akaba aine omuheereza we omushongore, owaabaire arwaire ari haihi kufa. 3Omuserukare ogwo, ku yaahuriire ebya Yesu, yaamutumaho abamwe omu bakuru b'Abayudaaya kwija kutambira omuheereza we. 4Ku baahikire ahari Yesu, baamweshengyereza munonga bati: Oshemereire kukimukorera, 5ahabw'okuba akunda eihanga ryaitu, kandi niwe yaatwombekyeire eiteeraniro ryaitu. 6Atyo Yesu agyenda nabo. Akiba ari haihi kuhika eka, ogwo mukuru w'abaserukare igana amutumaho banywani be ati: Mukama wangye, reka kweruhiza busha, ahabw'okuba timpikire kukutaasya omwangye. 7Kandi ekyo nikyo kyanzibira kwija okwo kukwehikira; kwonka gira eki waagamba, omuheereza wangye akire. 8Manya naanye ndi omutegyekwa, kandi nyine abaserukare abu ndikutegyeka. Ku ndikugambira omwe nti: Gyenda, agyenda; n'ondiijo nti: Ija, aija; n'omuheereza wangye nti: Kora eki, akikora. 9Yesu ku yaahuriire ekyo, yaamutangaarira, yaahinduka yaagambira ekimbuuro ky'abantu abamukuratiire ati: Nimbagambira ku ntakareebaga kwikiriza nk'oku, nobu haakuba omuri Isiraeli! 10Abaabaire batumirwe, ku baagarukire omuka, baashanga ogwo muheereza yaakizire. 11Ku haahingwireho omwanya mukye, Yesu yaaza omu rurembo orurikwetwa Naini aine abatendekwa be n'ekimbuuro ky'abantu. 12Ku yaabaire nairirira eirembo ryarwo, yaabugana abeekoreire omutumbi gwa mutabani w'omufaakazi, omwana we omwe nyamunegyere, nibagushohoza kuguziika. Kandi abantu baingi ab'omu rurembo orwo bakaba beezingiriire ogwo mukazi. 13Mukama ku yaamureebire, yaamugirira esaasi, yaamugira eti: Reka kurira. 14Atyo yaija yaakora aha ki baabaire baguheekireho; abagwekoreire baayemerera. Yaagira ati: Iwe mutsigazi 'we, ninkuragiira, imuka! 15Ogwo owaabaire afiire yaashutama, yaatandika kugamba. Yesu yaamugarurira nyina. 16Boona baakwatwa obwoba, baahimbisa Ruhanga nibagira bati: Omuriitwe haimukiremu omurangi mukuru! Kandi bati: Ruhanga aizire kujuna abantu be! 17Enkuru egyo yaabuga hoona omuri Buyudaaya n'omu nsi zoona ezigihereire. 18Abatendekwa ba Yohaana bakamuteekyerereza ebyo byona. 19Nawe nikwo kweta babiri omuribo, akabatuma ahari Mukama kumubuuza bati: Niiwe ogwo otuura ori ow'okwija, nari tutegyereze ondiijo? 20Abantu abo ku baahikire Yesu, baamugira bati: Yohaana Omubatizi yaatukutumaho kukubuuza tuti: Niiwe ogwo otuura ori ow'okwija, nari tutegyereze ondiijo? 21Omuri ago magingo Yesu yaakiza abantu baingi endwara n'obusaasi n'okunigwa ebyago; kandi n'empumi nyingi yaazihumuura. 22Yesu yaabagarukamu ati: Nimwirooko mugambire Yohaana ebi mwareeba n'ebi mwahurira muti: empumi nizihumuuka, ebirema nibigyenda, ababembe nibashemezibwa, ebifamatu nibihurira, abafiire nibazoorwa, n'abooro nibarangirirwa amakuru marungi. 23Otarikumbangaanisa aine omugisha. 24Entumwa za Yohaana ku zaagarukireyo, Yesu yaatandika kugambira ekimbuuro ky'abantu ahari Yohaana ogwo, ati: Mukaza omu ihamba kureebayo ki? Orubingo orurikutengyeetsibwa omuyaga? 25Mbwenu shi, mukaza kureebayo ki? Omuntu ojwaire ebirikunekaneka? Manya abajwara ebirikunekaneka bakajarama bashangwa omu bikaari by'abagabe. 26Mbwenu shi, mukaza kureebayo ki? Omurangi? Eego, nimbagambira nti, nangwa naakira omurangi. 27Niwe ogwo ou kyahandiikirweho ngu: Reeba, nintuma entumwa yangye kukubandizayo, ekutebeekanisize omuhanda. 28Nimbagambira nti: Omu baazairwe abakazi, tihariho n'omwe orikukira Yohaana; kwonka orikuhereerukayo omu bukama bwa Ruhanga naamukira. 29Abantu boona hamwe n'abashorooza b'omushoro, abaabaire baabatiziibwe Yohaana, ku baamuhuriire, baikiriza eki Ruhanga arikubenza. 30Kwonka Abafarisaayo n'abahangu b'eiteeka abaayangire ku ababatiza, baahakanisa enaama ya Ruhanga ei yaabaire abacumiire. 31Mbwenu abantu b'obusingye obu nkaabashushanisa na ki? 32Bari nk'abaana abashutami omu katare, abarikwetana bati: Tubateereire esheegu, timwazina; twabateerera emiruura, timwayemaamaata. 33Manya Yohaana Omubatizi ku yaizire atarikurya mugaati, atarikunywa viino, mwagira muti: Aine ekyago. 34Kandi Omwana w'omuntu we ku yaizire naarya, naanywa, mwagira muti: N'omunyamururu, omusinzi kandi munywani w'abashorooza b'omushoro n'abasiisi. 35Manya obwengye bwa Ruhanga, boona ababwikiriza nibo bahamya ku buhikire. 36Omwe omu Bafarisaayo akeeta Yesu owe kurya nawe. Ku yaahikire ow'Omufarisaayo ogwo, yaashutama kurya. 37Haija omukazi owaabaire ari mubi rurangaanwa omuri ekyo kirorero. Akaba yaahuriire ku Yesu ashutami aha byokurya omw'Omufarisaayo; yaija n'akacupa k'eibaare ry'omwengyengye, akarimu amajuta g'omugaju. 38Ogwo mukazi yaamuguma enyima naarira; amarira nigaitururikira aha bigyere bye, yaabiragarisa eishokye rye, yaabinywegyera, yaabisiiga ago majuta. 39Omufarisaayo owaamwetsire, ku yaakireebire, yaateekateeka ati: Ogu muntu, kuri ari omurangi, akaamanyire ogu mukazi orikumukoraho, n'oku ari omusiisi rurangaanwa. 40Yesu nikwo kumugira ati: Simooni, nyine eki ndikwenda kukugambira. Onu ati: Kingambire, Mwegyesa. 41Yesu ati: Hakaba haribo omuntu orikuguza empiiha; abantu babiri baashangwa baine eibanja rye, omwe erya shilingi magana ataano, n'ondiijo erya makumi ataano. 42Mbwenu bombi ku baaremirwe kumwihura, yaabasaasira. Ahari abo bombi, n'oha owaakizire kumukunda? 43Simooni yaamugarukamu ati: Ningira ngu n'ogwo owaasaasiirwe enyingi. Yesu ati: Eego, eki waagamba kihikire. 44Mpaho yaahinduka yaareeba omukazi, yaagira ati: Simooni, nooreeba ogu mukazi? Ku naija omwawe, tiwampa twizi tw'ebigyere; kwonka we ebigyere byangye yaabifukunkuriraho amarira ge, kandi yaabiragarisa eishokye rye. 45Iwe tiwaanywegyera, kwonka we, naaba kwija, agumire naanywegyera ebigyere. 46Iwe tiwantoonyeza kajuta ha mutwe, kwonka we ebigyere byangye yaabisiiga amajuta g'omugaju. 47N'ahabw'ekyo ninkugambira nti: Yaasaasirwa ebibi bye bingi, ahabw'okuba yaayoreka rukundo ye empango. Manya osaasirwa bikye agira rukundo nkye. 48Mpaho agambira ogwo mukazi ati: Waasaasirwa ebibi byawe. 49Abaabaire bari nawe aha meeza baatandika kwetomboita bati: Ogu ni muntu ki orikubaasa nangwa n'okusaasira ebibi? 50Kwonka Yesu yaagira ogwo mukazi ati: Okwikiriza kwawe kwakujuna; gyenda n'obusingye.

will be added

X\