Luke 6

1Ahari Sabato emwe Yesu akaba naaraba omu misiri y'engano; abatendekwa be baacwa obushiisha, baabujungirira omu ngaro, baaburya. 2Bamwe aha Bafarisaayo baagira bati: Ahabw'enki nimukora ekitarikwikirizibwa iteeka ahari Sabato? 3Yesu yaabagarukamu ati: Beitu timukashomaga eki Daudi yaakozire, obu yaagira enjara, we n'abu yaabaire aine? 4Oku yaataahire omu nju ya Ruhanga akaihayo emigaati emutoijairwe, akagirya kandi akahaho n'abu yaabaire aine? Haza egyo migaati yaabaire eikirizibwa kuriibwa abahongyerezi bonka. 5Atyo yaabagambira ati: Omwana w'omuntu niwe mukama wa Sabato. 6Ahari Sabato endiijo Yesu akataaha omu iteeraniro, yaatandika kwegyesa, kandi hakaba harimu omushaija okokootsire omukono gwa buryo. 7Abahangu b'eiteeka n'Abafarisaayo bakaba bamutaireho eriisho kureeba yaaba yaakukiza omuntu ahari Sabato, ngu babone kugira oburyo bw'okumurega. 8Kwonka we yaamanya ebi barikuteekateeka, yaagira ogwo mushaija okokootsire omukono, ati: Imuka oyemerere aha. Yaija yaayemereraho. 9Yesu nikwo kubagira ati: Ka mbabuuze: Nikiikirizibwa eiteeka ahari Sabato okukora ebirungi, nari okukora ebibi; okukiza amagara nari okugacwekyereza? 10Boona yaabarabyamu amaisho, yaagambira ogwo muntu ati: Gorora omukono gwawe. Onu yaagugorora, gwakira. 11Kwonka bari baagira ekiniga kingi, baatandika kucwa obwengye oku baraagire Yesu. 12Omu biro ebyo Yesu akaza omu rushozi kushaba; yaaseesezayo ekiro naashaba Ruhanga. 13Ku bwaseesire, yaayeeta abatendekwa be, yaatooranamu ikumi na babiri, yaabeeta entumwa. 14Nibo aba: Simooni ou yaayetsire Petero na Andereya omurumuna, Yakobo, Yohaana, Filipo, Baritolomaayo, 15Matayo, Tomasi, Yakobo mwene Alufaayo, Simooni ou baakubize nkunzi y'eihanga, 16Yuda mwene Yakobo, na Yuda owa Kariota owaamureebize. 17Bwanyima Yesu yaashuuma nabo, yaayemerera aharinganiire, yaashangayo abandi batendekwa be baingi bateeraniireyo hamwe n'ekimbuuro ky'abantu abaarugire omu byanga bya Buyudaaya byona na Yerusalemu, n'omu myegyeego ya Tuuro na Sidoni, abaizire kuhurira ebi arikugamba n'okutambirwa endwara. 18Abantu abaabaire nibaitwa kubi ebyago nabo yaabakiza. 19Kandi buri omwe omuri ekyo kumbuuro ky'abantu akaba naamigana kumukoraho, ahabw'okuba amaani gakaba gamurugamu, gakiza boona. 20Yesu akahindukira abatendekwa be, yaagira ati: Mwine omugisha, imwe abooro, ahabw'okuba obukama bwa Ruhanga n'obwanyu. 21Mwine omugisha, imwe abaine enjara hati, ahabw'okuba muryahaaga. Mwine omugisha, imwe abarikurira hati, ahabw'okuba muryasheka. 22Muhiiriirwe, abantu ku baribanga, baababinga, baabajuma, baabacamura nibabeeta enkozi z'ebibi, nibabatura Omwana w'omuntu. 23Aha kiro ekyo mushemererwe kandi mwemurikye, ahabw'okuba ekihembo kyanyu omu iguru ni kihango. Manya okwo nikwo baishebo baagizire batyo abarangi. 24Kwonka bambe, imwe abatungi, muryakareeba, ahabw'okuba hati mujarami! 25Muryakareeba imwe abaigutsi hati, ahabw'okuba muryaitwa enjara! Muryakareeba imwe abarikusheka hati, ahabw'okuba muryacura, murire! 26Muryakareeba abantu ku baribagamba gye! Manya okwo nikwo baishebo baatwarize abarangi b'ebishuba. 27Mbwenu imwe abantegire amatu, nimbagambira nti: Mukunde abazigu baanyu, mukore gye abarikubanga. 28Abarikubakyeena mubashabire emigisha, mushabire n'abarikubatwaza kubi. 29Oraakuteere oruhi rw'omushaya omutegye n'ogwa kabiri; oraatware omunagiro gwawe otamwima n'ekanzu. 30Oraakushabe weena omuhe, kandi n'oraakusikureho ekyawe otarikimwenza. 31Nk'oku mwenda abandi ngu babatwaze, naimwe mube nikwo mwabatwaza. 32Ku muraakunde abarikubakunda, nimuba nimusiimwaho ki? Nangwa n'abasiisi bakunda ababakunda. 33Ku muraabe nimukora gye ababakora gye nimuba nimwenda kusiimwaho ki? Nangwa n'abasiisi nikwo batwaza. 34Ku muraaguze abu mwineho amatsiko kugira eki mwabatungaho nimuba nimwenda kusiimwaho ki? Nangwa n'abasiisi nikwo baguza bagyenzi baabo, ngu ebi baabaguza babibagarurire nk'oku bibaire nibingana. 35Haakiri mukunde abazigu baanyu, mukore ebirungi, kandi muguze mutaine matsiko g'okuzimuurirwa, ngu nabo nyentsya babaguze. Obwo nibwo muritunga ekihembo kihango, mukaba abaana ba Rukiraboona, ahabw'okuba we aba ow'embabazi aha ntasiima n'enkozi z'ebibi. 36Mube ab'embabazi nka Shoimwe oku ari ow'embabazi. 37Mutaricwa orubanja, naimwe nibwo mutarirucwerwa; mutarisingisiriza, naimwe nibwo mutarisingisirizibwa; musaasire, naimwe muryasaasirwa. 38Mugabe, naimwe muryaheebwa. Endengo eijwire eigatiirwe, eshekyeziibwe kandi erikusheesheka, niyo erishukwa omu kikondooro kyanyu; ahabw'okuba endengo ei murirengamu, naimwe niyo murirengyerwamu. 39Kandi Yesu akabacwera enfumu egi, ati: Empumi neebaasa eta kwebembera endiijo? Zombi tizirigwa omu kiina? 40Omutendekwa takira mutendeki we; kwonka omutendekwa ku aba yaaherize kutendekwa gye, aba nk'omutendeki we. 41Ahabw'enki nooreeba akatokoozi akari omu riisho rya mwene sho, haza kunu otarikureeba mpimbi eri omu ryawe? 42Noobaasa ota kugira mwene sho oti: Mwene tata ka nkwihe akatokoozi akari omu riisho ryawe, haza kunu otarikureeba mpimbi eri omu ryawe? Iwe ndyarya 'we, banza oyeihe empimbi omu riisho, haza obone kuhweza gye kwiha akatokoozi akari omu riisho rya mwene sho. 43Tihariho muti murungi ogwana ebijuma bibi, nari omuti mubi ogwana ebijuma birungi. 44Manya omuti gumanyirwa aha bijuma byagwo. Abantu tibashoroma mitiini ha minyinya, nari emizaabibu aha bushebashebe. 45Omuntu omurungi aiha ebirungi aha birungi ebi agira omu mutima gwe, n'omuntu mubi aiha ebibi aha bibi ebi agira omu mutima gwe. Manya ebiijwire omutima nibyo akanwa kagamba. 46Muunyetera ki muti Mukama wangye, Mukama wangye, haza mutakora bi ngamba? 47Weena oija ahi ndi, akatega okutu ebi ndikugamba, akabikora, ka mboorekye ou arikushusha. 48Naashusha omuntu owaagiire kwombeka enju ye, akatimba, akahika okuzimu, akahamiza omusingi aha rukiri. Omugyera ku gwashandaire, gwahimintikira ahari egyo nju, kwonka tigwabaasa kugitengyeetsa, ahabw'okuba ekaba eyombekirwe gye. 49Kwonka ohurira ebi ndikugamba atabikore, naashusha omuntu owaayombekire enju ye aha itaka etaine musingi. Omugyera ku gwagihimintikiireho, ahonaaho yaakumbagara. Ebishi, egyo nju ekatsindama!

will be added

X\