Luke 4

1Yesu akaruga Yorudaani, aijwire Mutima Orikwera owaamutwaire omu ihamba; 2yaamarayo ebiro makumi ana naayohibwa Sitaane. Ebiro ebyo byona akaba ataine ki arikurya; aha muheru yaagira enjara. 3Sitaane nikwo kumugira ati: Ku oraabe ori Omwana wa Ruhanga, ragiira eri ibaare rihindukye ekyokurya. 4Yesu yaamugarukamu ati: Kikahandiikwa ngu: Omuntu tatungwa byokurya byonka. 5Mpaho Sitaane amutwara ahatunguukire munonga; omu kaanya kakye amworeka obugabe bwona obw'omu nsi, 6amugira ati: Niinyija kukuha ekitiinwa kyabwo n'obushoboorozi bw'okubutegyeka, ahabw'okuba nkabuheebwa kandi mbuha ou ndikwenda. 7Mbwenu ku orandamye, byona nibiija kuba ebyawe. 8Kwonka Yesu yaamugarukamu ati: Kikahandiikwa ngu: Ogume oramye Mukama Ruhanga waawe, kandi we wenka obe niwe waaheereza. 9Bwanyima yaamutwara Yerusalemu, yaamwemereza aha itungu rya Nyaruju, yaamugira ati: Ku oraabe ori Omwana wa Ruhanga, yerekyere oyenagye ahansi, 10ahabw'okuba kikahandiikwa ngu: Aryakukwatsa baamaraika be bakurinde. 11Kandi ngu: Baryakutega emikono, ngu orekye kuhonda ekigyere kyawe aha ibaare. 12Kwonka Yesu yaamugarukamu ati: Kikagambwa ngu: Otaryosya Mukama Ruhanga waawe. 13Sitaane ku yaamazireyo ebyo byosyo byona, yaamurugaho, kugaruka obundi bunaku. 14Yesu akagaruka Galilaaya aine amaani ga Mutima; okurangaanwa kwe kwabuga hoona; 15yaayegyesa omu mateeraniro gaabo, buri omwe yaamusiima. 16Yesu akahika Nazareeti ei yaakuriire, yaataaha omu iteeraniro ryabo aha izooba rya Sabato, nk'oku yaabaire atwaza. Yaayemerera kushoma ekitabo, 17baamukwtsa ekitabo kya Isaaya omurangi. Ku yaakikuburiire, yaashanga ahahandiikirwe hati: 18Mutima wa Nyakubaho ari ahariinye, ahabw'okuba akampaasirira nansiiga amajuta. Yantuma kugambira abooro amakuru marungi, okurangira enkwatwa okurekurwa, n'empumi okuhumuurwa, n'okuseetura abasiitagwirwe, 19n'okuranga omwaka ogu Nyakubaho arigiriramu embabazi. 20Atyo Yesu yaakuba ekyo kitabo, yaakigarurira omuheereza, yaashutama. Boona abaabaire bari omu iteeraniro baamuhanga amaisho. 21Nawe yaatandika kubagambira ati: Ekyahandiikirwe ekyo eki mwahurira, eri izooba kyahikiirizibwa. 22Boona baamusiimira kimwe kandi baatangaarira ebigambo by'embabazi ebi yaagamba. Baabuuzana bati: Kwokwo, ogu ni mutabani wa Yosefu? 23Kwonka we yaabagarukamu ati: Timurikwija kubura kundengyeza muti: Iwe mufumu 'we, banza oyetambire; kandi n'okungira ngu: Tukahurira byona ebi waakoreire Kafarinaumu, mbwenu obikorere n'aha omu kyanga kyawe. 24Yaagumizamu ati: Nimbagambirira kimwe ku hatariho murangi osiimwa omu nsi y'owaabo. 25Buzimazima nimbahamiza ku haabaire hariho abafaakazi baingi omuri Isiraeli omu biro bya Eliya, obu eiguru ritaragwisize njura kumara emyaka eshatu n'ameezi mukaaga, ensi yoona ekateerwa enjara mpango; 26kwonka Eliya ogwo taratumirwe hari omwe omuribo, kureka akatumwa aha mufaakazi wa Sarepita, ekirorero ky'omuri Sidoni. 27Kandi omu biro bya Elisha hakaba hariho ababembe baingi omuri Isiraeli, kwonka tihariho n'omwe omuribo owaatambiirwe, kureka Naamani Omunyasiriya. 28Ku baahuriire ekyo, buri omwe omu iteeraniro ekiniga kyamuzingiza. 29Baimuka nibamukurubana, baamushohoza omu rurembo rwabo, baamuhitsya aha ndeebareebo y'ekibungo eki baabaire bombekireho orurembo rwabo, ngu bamukumbagarize aha nengo; 30kwonka we yaaboogamu, yaayegyendera. 31Yesu akashuuma, yaaza Kafarinaumu, ekirorero ky'omuri Galilaaya, ahari Sabato yaabeegyesa. 32Baatangaarira munonga emyegyeseze ye, ahabw'okuba akagambisa obushoboorozi. 33Omu iteeraniro eryo hakaba harimu omushaija owaabaire ariho ekyago. Ekyo kyago kyamuboroozya kiti: 34Iwe Yesu owa Nazareeti, noofa ki naitwe? Oizire kutucwekyereza? Ninkumanya ku ori Orikwera owa Ruhanga. 35Yesu yaakikabukira ati: Igara akanwa, omurugyeho! Mpaho ekyo kyago kyamutuura ahansi omu maisho g'abantu, kyamurugaho kitamukozire kubi. 36Boona baatangaara nibagambirana bati: Ebishi, ebigambo bye tibyekuratiire! Naaragiiza amaani n'obushoboorozi ebyago, haza bishohora. 37Okurangaanwa kwe kwabuga omu nsi zoona ezeehinguririizeho. 38Yesu ku yaarugire omu iteeraniro eryo, yaaza omwa Simooni. Obwo nyinazaara wa Simooni akaba arwaire omushwija mwingi, baamushaba kugira eki yaamukorera. 39Ku yaamwinamireho, yaakabukira ogwo mushwija, gwamurugaho. Ahonaaho ogwo mukazi yaimuka, yaatandika kubaheereza. 40Eizooba ku ryabaire nirirengarenga, boona abaabaire baine abaabo abarwaire endwara zitari zimwe, baabamureetera, yaabakiza naabataho engaro. 41Kandi n'ebyago bikaruga aha bantu baingi nibiborooga biti: Ori Omwana wa Ruhanga. Kwonka yaabikabukira, tiyaabiikiriza kugamba, ahabw'okuba bikaba nibimanya ku ari Kristo. 42Ku bwaseesire, Yesu yaaruga omu nju, yaaza omu mwanya ogutarimu bantu. Ekimbuuro ky'abantu kyaza kumusherura; ku baamuhikire, baayenda kumuzibira kubarugaho; 43kwonka yaabagarukamu ati: Nyowe ndi ow'okubuzya Amakuru Marungi g'obukama bwa Ruhanga n'omu zindi ndembo, ahabw'okuba ekyo nikyo naatumirwe kukora. 44Atyo yaagumizamu naayegyesa omu mateeraniro ga Buyudaaya.

will be added

X\