Luke 20

1Eizooba rimwe Yesu, ku yaabaire naayegyesa abantu omuri Nyaruju, naarangirira Amakuru Marungi, abahongyerezi abakuru n'abahangu b'eiteeka baija hamwe n'abakuru omu ihanga, 2baamugambira bati: Tugambire, ni bushoboorozi ki oburikukukoresa ebi? Nari n'oha owaabukuhaire? 3Yaabagarukamu ati: Naanye ka mbabuuze, mungambire. 4Okubatiza kwa Yohaana kukaruga ahari Ruhanga nari omu bantu? 5Baahakana bonka nibagira bati: Ku turaagire ngu kukaruga ahari Ruhanga, naija kugira ati: Ahabw'enki mutaramwikiriize? 6Kandi ku turaagire ngu kukaruga omu bantu, abantu boona nibaija kututeera amabaare, ahabw'okuba nibahamiza kimwe ku Yohaana yaabaire ari omurangi. 7Nikwo kumugarukamu bati: Titurikumanya ahi kwarugire. 8Na Yesu ati: Naanye tindikwija kubagambira ahi naihire obushoboorozi oburikunkoresa ebyo. 9Reero Yesu yaacwera abantu enfumu egi, ati: Omuntu akahinga omusiri gw'emizaabibu, yaagutsigira abashengi yaataaha eihanga, yaamarayo omwanya muraingwa. 10Obunaku ku bwahikire, yaatuma omuheereza we ahari abo bashengi, ngu bamuhe aha bijuma by'emizaabibu. Kwonka abo bashengi baamuteera, baamubinga engaro nsha. 11Yaagaruka yaatuma ondi muheereza, nawe baamwasha, baamuhemagura, baamubinga engaro nsha. 12Nabwo yaayongyera yaabatumaho owa kashatu, ogwo nawe baamuhutaaza, baamujuguta aheeru. 13Bwanyima mukama w'emizaabibu yaagira ati: Mbwenu nkore ki? Ka mbatwekyere mutabani wangye omukundwa, shana bakaamugirira enshoni. 14Kwonka abo bashengi ku baamureebire, baagambirana bati: Manya ogu niwe muhunguzi; ka tumwite, obuhunguzi bube obwaitu. 15Batyo baamwozya omuri ogwo musiri, baamwita. Mbwenu mukama w'ogwo musiri gw'emizaabibu aryabagira ata? 16Aryaija acwekyereze abo bashengi, reero ogwo musiri gw'emizaabibu agutemu abandi. Ekyo ku baakihuriire baagira bati: Nikikabure! 17Kwonka we yaabacumita eriisho yaabagira ati: Mbwenu ekyahandiikirwe eki nikimanyisa ki? Nikigira kiti: Eibaare eri abombeki baayangire, niryo ryahindukire obuhamizo. 18Weena oriryeteeraho aryacwagacwagurika; kandi weena ou ririgwaho, riryamucwa obusaasingo. 19Abahangu b'eiteeka n'abahongyerezi abakuru ahabw'okumanya ngu egyo nfumu nibo yaabaire neerengyeza, baayenda kumukwata omuri ago magingo, kwonka baatiina abantu. 20Batyo baaguma bategyereize ekindi eki baraakwatsizeho Yesu. Baayohereza ab'okumutata, abaayegizire ab'amazima, ngu babone kumukwatsiza aha ki araagambe, kibabaasise kumutwara aha w'obushoboorozi, amucwere orubanja. 21Nikwo kumubuuza bati: Mwegyesa, nitumanya ebi ogamba n'ebi oyegyesa ku biba ebihikire; ku otagira u oshoroora, kureka oyegyesa omu mazima eby'omuhanda gwa Ruhanga. 22Mbwenu itwe, okuha Kaisaari omushoro, kihikire nari tikihikire? 23We ahabw'okumanya obugobya bwabo, yaagira ati: 24Muunyorekye empiiha. Ekishushani eki n'ebihandiikirweho n'eby'oha? Baamugarukamu bati: N'ebya Kaisaari. 25Nawe ati: Mbwenu nu, ebya Kaisaari mubihe Kaisaari, n'ebya Ruhanga mubihe Ruhanga! 26Batyo baabura eki baamukwatamu omu bi yaagambiire omu maisho g'abantu; eki yaabagarukiremu kyabatangaaza, baahunama. 27Abasadukaayo, abagira ngu abafa tibazooka, bakaija ahari Yesu, 28baamubuuza bati: Mwegyesa, Musa akatuteeraho ekihandiiko ekirikugira kiti: Mukuru w'omuntu ku yaakufa atatsigire mwana, omurumuna ahungure ogwo mufaakazi, azaarire mukuru we abaana. 29Mbwenu hakaba hariho enyina-emwe mushanju. Ow'omujigaijo yaashwera omukazi, kwonka yaafa bucwekye. 30Ow'omushubiro, 31bwanyima n'owa kashatu baahungura ogwo mufaakazi; boona omushanju baamushwera batyo, baafa batatsigire baana. 32Aha muheru omukazi nawe yaafa. 33Mbwenu aha kuzooka, ogwo mukazi aryaba muka oha omuri abo? Ahabw'okuba boona omushanju bakamushwera. 34Yesu yaabagarukamu ati: Abantu b'obusingye obu bashwera kandi bashwerwa; 35kwonka abarishangwa bashemereire kuhika aha busingye oburiija n'aha kuzooka kw'abafiire, tibarishwera kandi tibarishwerwa. 36Manya baryaba batakifa bundi, bari nka baamaraika kandi abaana ba Ruhanga abaine omugabo omu kuzooka. 37Mbwenu ekirikugira ngu abafa bazooka, na Musa wenka akakimanyisa omu bi yaahandiikire aha byabaireho aha rushaka ruri, obu yaagamba ahari Nyakubaho, ku ari Ruhanga wa Aburahamu, Ruhanga wa Isaaka kandi Ruhanga wa Yakobo. 38Biri ti Ruhanga w'abafiire, kureka n'ow'abahuriire, ahabw'okuba ahariwe abantu boona omu mazima baba abahuriire. 39Abahangu b'eiteeka abamwe nikwo kumugarukamu bati: Mwegyesa, waagamba gye. 40Manya bakaba batakyehanga kumubuuza ekindi kibuuzo. 41Bwanyima Yesu akabagira ati: Abantu nibaiha hi okugira, ngu Kristo n'omwana wa Daudi? 42Haza kunu, Daudi wenka omu kitabo kya Zaaburi yaagizire ati: Nyakubaho akagambira Mukama wangye ati: Shutama aha rubaju rwangye rwa buryo, 43okuhitsya obu ndigira abazigu baawe endibatiro y'ebigyere byawe. 44Daudi aha ka naamweta Mukama, kandi shi naabaasa ata kuba omwana we? 45Kandi Yesu akagambira abatendekwa be, abantu boona bamutegire amatu, ati: 46Mwerinde abahangu b'eiteeka abenda kugyenda bajwaire ekanzu ndaingwa, abakunda kutangirirwa omu butare, n'okushutama omu bitebe by'abakuru omu mateeraniro, n'omu myanya y'ekitiinwa aha magyenyi. 47Banyaga eby'abafaakazi kandi bashaba Ruhanga nibarandagatana, ngu abantu babareebe. Baryacwerwa orubanja orurikukira orw'abandi.

will be added

X\