Luke 19

1Yesu akataaha omu rurembo Yeriko, yaagumizamu naarurabamu. 2Okwo hakaba hariyo omushaija orikwetwa Zakaayo, owaabaire ari omukuru w'abashorooza b'omushoro kandi ari omutungi. 3Akaba aine ekihika ky'okureeba Yesu kumumanya; kwonka ahabw'okuba mugufu tiyaabaasa kurenzya maisho ekimbuuro ky'abantu kumureeba. 4N'ahabw'ekyo yairuka, yaabarabaho, yaatemba omukunyu, ngu akaamunagaho eriisho naahingura. 5Yesu ku yaahikire ahu ari, yaimutsya amaisho, yaamugira ati: Zakaayo, rahuka otemburukye. Eri izooba niinyenda kuza owaawe. 6Atyo atemburuka n'obwira, amutaangirira ashemereirwe munonga. 7Reero boona ku bakireeba, beetomboita bati: Yaaza kuraara omw'omusiisi. 8Mpaho Zakaayo tahwama, ayemerera agira Mukama ati: Mukama wangye, niinyija kuha abooro kimwe kya kabiri ky'ebintu byangye, kandi ku ndaabe nyine ou ndagobeize, niinyija kumuriha ebye emirundi ena. 9Yesu amugira ati: Eri izooba okujunwa kwaija omuri egi ka, ahabw'okuba ogu nawe ni mwene Aburahamu. 10Manya Omwana w'omuntu akaija kusherura ekyabuzire n'okukijuna. 11Abantu ku baabaire bakitegire Yesu amatu, yaabacwera enfumu. Mbwenu obwo akaba ari haihi na Yerusalemu, kandi abantu bakaba nibateekateeka ngu, obukama bwa Ruhanga buri haihi kwija. 12Nawe nikwo kubagira ati: Omushaija w'ekitiinwa akaba naaza kuzinduka omu nsi ya hare kuheerwayo obugabe, bwanyima agarukye. 13Yaayeta abaheereza be ikumi; buri omwe yaamuha empiiha emwe y'ezaabu, haza yaabagira ati: Mugishuubuze okuhitsya obu ndigaruka. 14Kwonka abantu b'eihanga rye, ahabw'okumwanga baamukuratsa entumwa nibagira bati: Titurikwenda ogu mushaija kuba omugabe waitu. 15Mbwenu ku yaagarukire yaaherize kuheebwa obugabe, yaatuma abo baheereza abu yaahaire empiiha, kureeba oku buri omwe yaashaagwize. 16Ow'okubanza yaagira ati: Mukama wangye empiiha yaawe emwe ngishaagwiremu ikumi. 17Onu yaamugarukamu ati: Yebare muheereza wangye omurungi! Nk'oku oyeyorekire ori omwesigwa omu bikye munonga, naakuha obushoboorozi kutegyeka ebirorero ikumi. 18Owa kabiri nawe yaija yaagira ati: Mukama wangye, empiiha yaawe emwe erugiremu itaano. 19Ogwo nawe yaamugira ati: Naiwe noija kutegyeka ebirorero bitaano. 20Bwanyima haija ondiijo, yaagira ati: Mukama wangye, empiiha yaawe ngigi, nkagibiika gye omu kenda ka kitaani, 21ahabw'okuba nkakutiina; naamanya ku ori omuntu enzira-busha, oyanura ebi otaanikire, ogyesha ebi otabibire. 22Onu amugarukamu ati: Iwe muheereza mubi 'we, ka nkucwere orubanja niinyihirira aha bi waagamba. Biri kwo okamanya ku ndi enzira-busha, eyanura ebi etaanikire, ekagyesha ebi etabibire. 23Ahabw'enki nu empiiha yangye toragibiikize bashuubuzi b'empiiha, nkiza kugaruka nkagiihayo n'amagoba gaayo? 24Atyo agambira abeemereireho, ati: Mumwakye egyo mpiiha, mugihe oine ikumi. 25Nabo baamugira bati: Mukama waitu, k'aine ikumi! 26Nimbagambira nti: Weena oine, aryaheebwa ebirikukiraho; kwonka otaine, aryayakwa n'eki aine. 27Mbwenu abazigu bangye, abataraanyedeize kuba omugabe waabo, mubareete aha, mubaitire omu maisho gangye. 28Yesu ku yaaherize kugamba ekyo, yaabeebembera nainamuka Yerusalemu. 29Mbwenu ku yairiire haihi na Beetifaagye na Beetaniya, ebihereeraine n'Orushozi orurikwetwa orw'Emioliva, yaatuma babiri aha batendekwa be, 30yaabagira ati: Nimwirooko muze omu kyaro ekibari omu maisho. Ku muraakitaahemu muti, nimwija kureeba omwana gw'endogoya gutsibikire, ogutakatembwahoga muntu. Mugutsibure, mugureeta aha. 31Ku haraagire owaababuuza eki murikugutsiburira, mumugire muti: Mukama naagwenda. 32Entumwa zityo zigyenda, zishanga byona biri nk'oku yaazigambira. 33Ku baabaire nibatsibura ogwo mwana gw'endogoya, bakama baagwo baabagira bati: Beitu nimugutsiburira ki? 34Nabo baabagarukamu bati: Mukama naagwenda. 35Batyo baagutwarira Yesu, baagutandiikaho emyenda yaabo, baagumushutamyaho. 36Ku yaabaire naagyenda, abantu baayarira eminagiro yaabo ahu arikuraba. 37Kandi ku yaabaire yaahika aha kashuumo k'Orushozi rw'Emioliva, ekimbuuro ky'abantendekwa be kyona kyatandika kushemererwa n'okuhimbisa Ruhanga n'eiraka rihango, ahabw'eby'okutangaaza byona ebi baareebire. 38Baateera akaari bati: Ogwo Mugabe orikwija omu iziina rya Nyakubaho, ahimbisibwe! Omu iguru nihakagire obusingye, n'ahaiguru owa Herebe neekagire ekitiinwa! 39Bamwe omu Bafarisaayo bakeema ahagati y'abantu, baamugira bati: Mwegyesa, hunamya abatendekwa baawe. 40Kwonka we yaabagarukamu ati: Nimbagambira, aba ku baraahuname, amabaare nigaija kwamuza. 41Ku yaahikire haihi n'orurembo, yaarureeba, yaarucurira 42yaagira ati: Nangwa eri izooba kuri waamanya ebyakukureetera obusingye! Kwonka bambe, bikusherekirwe. 43Manya obunaku buryahika abazigu baawe bakugote, bakwehinguririze, bakuturukye embaju zoona; 44bakutuure ahansi n'abaana b'omunda y'orugo rwawe, batakutsigiremu ibaare eritungamiire erindi, ahabw'okuba toramanyire bunaku bu Ruhanga araakwizire. 45Bwanyima Yesu akataaha omuri Nyaruju, yaatandika kubingamu abaabaire nibatundiramu. 46Yaabagira ati: Kikahandiikwa ngu enju yangye eryaba ey'okushabiramu; mbwenu imwe, ka mugihindwire eryaya ry'abambuzi. 47Akaba ayegyeseza omuri Nyaruju buri izooba. Abahongyerezi abakuru n'abahangu b'eiteeka n'abandi bantu bakuru, abaabaire bakwataniise nabo, baacwa obwengye oku baraamwite. 48Kwonka baabura oburyo bw'okukikora, ahabw'okuba abantu boona bakaba nibata omutima aha bi arikugamba.

will be added

X\