Luke 17

1Yesu akagambira abatendekwa be ati: Ebirikuteeza entsibo tibiribura kubaho, kwonka obireeta aryakareeba! 2Haakiri akomwe orubengo omu maraka anagwe omu nyanja, okukira okuhabisa omwe ahari aba abato. 3Naimwe mwerinde! Mwene waanyu ku araashiishe, omuhane. Ku araayeteise eki akozire, omusaasire. 4Kandi ku araakushaagize emirundi mushanju omu izooba rimwe, kwonka yaakwijaho emirundi mushanju naagira ati: Naayeteisa, naiwe omusaasire. 5Entumwa zikashaba Mukama ziti: Twongyere okwikiriza! 6Nawe yaabagarukamu ati: Kuri mwine okwikiriza kurikwingana nangwa n'akajuma k'embibo ya karidaari, mukaaragiire omukunyu ogu, muti: Higuka, obyarwe omu nyanja, haza gubakundira. 7N'oha omuriimwe oine omuheereza orikumuhingira, nari orikumuriisiza, akiija naaruga aheeru akamugira ati: Rahuka orye ebyokurya bwawe? 8Takubaire ari ow'okumugira ati: Ihura ebyokurya byangye, oyezirikye ompeereze, okuhitsya obu ndaaheze kurya n'okunywa, haza iwe obone kurya bwanyima? 9Nimugira ngu ashemereire kusiima ogwo muheereza ahabw'okukora eki yaamuragiira? 10Naimwe ku muraagume mwaheza kukora byona ebi muragiirwe, mugire muti: Turi abaheereza abataine mugasho, twakora eki turikuragiirwa kukora. 11Yesu, ku yaabaire naaza Yerusalemu, yaaraba omu mwatano gwa Samariya na Galilaaya. 12Ku yaabaire yaahika omu kyaro kimwe, ababembe ikumi baija kumubugana. 13Baamuhoogyera beemereire hangahari nibagira bati: Yesu Omwegyesa, otugirire embabazi! 14Ku yaabareebire, yaabagira ati: Mugyende mweyorekye abahongyerezi. Nabo ku baabaire nibakizayo, baashemezibwa. 15Omwe omuribo ku yaareebire yaakira, yaagarukayo naasingiza Ruhanga n'eiraka rihango. 16Yaajuumara aha bigyere bya Yesu, yaamusiima. Ogwo muntu akaba ari Omunyasamariya. 17Ekyo kyareetera Yesu kubuuza ati: Boona eikumi tibaashemezibwa? Omwenda gurahi? 18Nooshusha oti tihariho ondi owaagaruka kusiima Ruhanga, kureka Omunyamahanga ogu. 19Atyo yaagambira ogwo mushaija ati: Imuka, oyegyendere, okwikiriza kwawe nikwo kwakukiza. 20Abafarisaayo ku baabuurize Yesu, ngu obukama bwa Ruhanga buryaija ryari, yaabagarukamu ati: Obukama bwa Ruhanga tibwija nibureebwa, 21kandi tiharibaho origira ati: Mbubu buri aha! nari ati: Mburiya hariya! Manya obukama bwa Ruhanga buri omuriimwe. 22Yesu akagambira abatendekwa be ati: Obunaku buryahika, obu muryetengyeramu kureeba rimwe aha mazooba g'Omwana w'omuntu, kwonka timuririreeba. 23Baryabagira bati: Nguriya, ari hariya! Ngugu, ari aha! Kwonka imwe mutarizayo, mutaribakurata. 24Manya nk'oku omurabyo gurabya, gukamurika eiguru okwiha aha rubaju rumwe okuta aha rundi, n'okwija kw'Omwana w'omuntu nikwo kuriba. 25Kwonka aryabanza kubonabonesibwa munonga n'okwangwa ab'obusingye obu. 26Nk'oku kyabaire omu biro bya Noa, nikwo kiriba n'omu biro by'Omwana w'omuntu. 27Abantu bakaba nibarya, nibanywa, nibashwerana, okuhitsya obu Noa yaagiire omu bwato, omwegyemure gukaija, gukabacwekyereza boona. 28Kandi kiryaba nk'oku kyabaire obwa Looti. Abantu bakaba nibarya, nibanywa, nibagura, nibaguza, nibahinga kandi nibombeka. 29Kwonka aha izooba eri Looti yaarugiire omuri Sodoma, Ruhanga akafukunkura omuriro n'obuganga, byaruga omu iguru byabacwekyereza boona. 30Nikwo kiriba kityo aha izooba eri Omwana w'omuntu arireebekyeraho. 31Eizooba eryo ku ririhika, oriba ari aha mutwe gw'enju, aine ebye omu nju, ataritemburuka kubiihamu; n'oriba ori omu musiri, atarigaruka omuka. 32Nimwijukye muka Looti. 33Weena orikwenda kukiza amagara ge, aryagabuza. Kandi weena orikugabuza, aryagakiza. 34Nimbagambira nti: Ekiro ekyo abantu babiri baryaba bari aha kitanda kimwe; omwe aryatwarwa, ondi atsigweho. 35Abakazi babiri baryaba nibasa kumwe; omwe aryatwarwa, ondi atsigweho. 36[Abashaija babiri baryaba bari omu musiri; omwe aryatwarwa, ondi atsigweho.] 37Abatendekwa nikwo kumucwa kabiri, bakamubuuza bati: Aho ni nkahi, Mukama waitu? Nawe nikwo kubagarukamu ati: Ahu omutumbi guri, niho amahungu gateeranira.

will be added

X\