Luke 15

1Abashorooza b'omushoro n'abasiisi omu bunaku obwo bakaba nibakuratira Yesu kuhurira ebi arikugamba. 2Kwonka Abafarisaayo bo hamwe n'abahangu b'eiteeka ku baakireebire, baatandika kwetomboita nibagambirana bati: Reeba ogu muntu orikwehitsya abasiisi akarya nabo. 3Nawe nikwo kubacwera enfumu egi, ati: 4Ni muntu ki omuriimwe owaakuba aine entaama igana, hakiburaho emwe, atatsigyeho amakumi mwenda na mwenda omu iriisizo, akaza kusherura eyaabura, okuhitsya obu araagibone? 5Ku agizoora, agiheeka aha mabega ashemereirwe. 6Akihika omuka, ayeta banywani be na bataahi be, abagira ati: Bagyenzi bangye, mushemererwe hamwe naanye, ahabw'okuba naabona entaama yangye ebaire eshohokire. 7Na mbwenu nimbagambira ku ab'omu iguru bashemererwa batyo ahabw'omusiisi omwe owaayegarukamu, okukira abahikiriire makumi mwenda na mwenda abatarikwetenga kwegarukamu. 8Nari ni mukazi ki, oine empiiha ikumi, hakiburaho emwe, atahembe tabaaza, akakukumba enju yoona, akarondera kimwe okuhitsya obu araagibone? 9Kandi ku agibona, ayeta banywani be na bataahi be, abagira ati: Bagyenzi bangye, mushemererwe naanye, ahabw'okuba empiiha yangye ebaire ebuzire naagibona. 10Na mbwenu nimbagambira ku baamaraika ba Ruhanga bashemererwa batyo ahabw'omusiisi omwe owaayegarukamu. 11Yesu kandi akagira ati: Hakaba hariho omushaija owaabaire aine abatabani babiri. 12Omuto akashaba ishe ati: Taata, mpa omugabo gw'ebintu ebi waakundagire. Ishebo nikwo kubabaganisiza eitungo rye. 13Ku haahingwireho ebiro bikye, omutabani ogwo omuto yaarundaana ebye byona, yaaza omu nsi ya hare; okwo niyo yaashiishaguriire empiiha ze omu micwe mibi. 14Ku yaabiherizeho, egyo nsi yaataasya enjara mpango, nawe yaatandika kushoberwa. 15Nikwo kuza kushumbira omwe aha batungi b'omuri egyo nsi, onu akamwohereza omu iriisizo rye kuriisa empunu. 16Ku yaabaire aba aziriisize, ayetenga kurya ebishushu ebi zaabaire nizirya, kwonka bambe habura owaabimuha. 17Ku yaayegarukiremu, yaagira ati: Abakozi ba tata oku baingana, ka nibarya bikashaaga, haza nyowe nkaitirwa aha enjara! 18Ka nyimukye, nze owa tata, mmwetuurire mmugire nti: Taata, nkacumura ahari Ruhanga n'ahariiwe. 19Tinkiri w'okushemerera kwetwa omwana waawe; ngira nk'omwe aha baheereza baawe abarikukukorera. 20Atyo yaabandatuka, yaatoora ogurikuza owa ishe. Ku yaabaire akiri hare, ishe yaamuranzya, yaamugirira esaasi. Yairuka naamwizira, yaamugwa omu maizi g'enda, yaamunywegyera. 21Omutabani yaamwetongyeza ati: Taata, nkacumura ahari Ruhanga n'ahariiwe. Tinkiri w'okushemerera kwetwa omwana waawe. 22Kwonka ishe yaagambira abaheereza be ati: Yaimwe, nimurahukye mureete ekijwaro ekirikuhita ebindi, mukimujwekye, mumute empeta omu rukumu n'enkaito omu bigyere. 23Mureete kaberera mugiite, haza tugire obugyenyi tushemererwe. 24Manya mutabani wangye ogu akaba afiire, mbwenu yaazooka; akaba azaahire, mbwenu yaazaahuuka. Mpaho obugyenyi butandika. 25Mbwenu omutabani omukuru akaba atarimu, ari omu misiri. Ku yaabaire naahinguuka, yaahika haihi n'eka, yaahurira ebyeshongoro n'ebitaaguriro. 26Atyo ayeta omwe omu baheereza, amubuuza ati: Beitu ebyo n'eby'enki? 27Onu ati: Manya murumuna waawe yaija, kandi shoimwe yaamwitira eri nyana kaberera, ngu ahabw'okuba yaagaruka omu ka ye buhooro kandi ahuriire. 28Ogwo mwojo ku akihurira, ekiniga kyenda kumubarura, ayanga kutaaha omu nju; ishe arugaho ashohora kumweshengyereza. 29Kwonka ogwo mwana agira ishe ati: Noomanya ku mmazire emyaka egi yoona ninkuheereza, kandi ku ntakangaga kukora ebi ondagiire, haza tokampaga nangwa n'akabuzi kugira obugyenyi na bagyenzi bangye. 30Mbwenu kitabani kyawe ekyo, ku kyagaruka kyaherize kushiishagura ebyawe byona na baamaraaya, waakituukurira kaberera! 31Ishe amugarukamu ati: Mwana wangye, obutoosha otuura naanye; kyona eki ntungire n'ekyawe. 32Kwonka kyaba kihikire okushemererwa n'okunanuka, ahabw'okuba murumuna waawe ogu akaba afiire, mbwenu yaazooka; akaba azaahire, mbwenu yaazaahuuka.

will be added

X\