Luke 14

1Mbwenu aha izooba rya Sabato, Yesu ku yaabaire agiire ow'omwe aha bakuru b'omu Bafarisaayo kurya nawe, baamugumyaho eriisho. 2Kandi omu maisho ge hakaba hariho omushaija orwaire orusimba. 3Yesu nikwo kubuuza abahangu b'eiteeka n'Abafarisaayo, ati: Nikiikirizibwa eiteeka kukiza omuntu ahari Sabato, nari tikirikwikirizibwa? 4Kwonka bo baaguma bahunami. Nawe nikwo kukwata ogwo mushaija akamukiza, akamwohereza. 5Bwanyima yaabagira ati: N'oha omuriimwe ou mutabani we nari ente ye byakugwa omu iziba ahari Sabato, atabiihemu ahonaaho? 6Ekyo nakyo tibarabaasize kukigarukamu. 7Yesu ku yaareebire abeetsirwe aha bugyenyi nibatangatangana emyanya mikuru, yaabacwera enfumu egi, ati: 8Ku oryetwa aha bugyenyi bw'obushwere, otashutama omu mwanya gw'ekitiinwa. Obundi hakaaba heetsirwe orikukukiza eiziina, 9reero obeetsire mwembi akaija akakugira ati: Higiza ogu muntu. Otyo okagyenda noobwerabwera kuza kushutama omu mwanya gw'enyima. 10Mbwenu ku oraayetwe aha bugyenyi, gyenda oshutame omu mwanya ogutari gw'ekitiinwa, ogugumemu. Nyineeka ku araije, abe niwe yaakugira ati: Munywani wangye, garuka aha. Nibwo weena oshutami naiwe aha meeza araakureebe ori ow'ekitiinwa. 11Manya weena oyetunguura aryabundikwa, kandi oyebundika aryatunguurwa. 12Bwanyima Yesu akagambira nyineeka ati: Ku oraateekye obugyenyi nyomushana nari nyekiro, oteeta banywani baawe, beene sho, abanyaruganda nari bataahi baawe abatungi, ngu nabo nyentsya bakwete bakuzimuurire. 13Kwonka iwe, ku oriteeka obugyenyi, obweteho abooro, ebimuga, ebirema n'empumi. 14Haza obwo nibwo oriheebwa omugisha, ahabw'okuba nobu baraabe batarikubaasa kukuzimuurira, enzimuurano yaawe oryagitunga abahikiriire boona baazooka. 15Omwe omu baabaire bari aha bugyenyi, ku yaakihuriire, yaagira ati: Ebishi, omuntu orirya ebyokurya by'aha bugyenyi bw'omu bukama bwa Ruhanga aryaba aine omugisha! 16Kwonka we yaamugira ati: Hariho omushaija owaateekire obugyenyi buhango, akeeta abantu baingi munonga. 17Obunaku bw'obugyenyi ku bwahikire, yaatuma omuheereza we kugambira abaayeetsirwe ati: Nimwije, obugyenyi bwatebeekanisiibwe. 18Kwonka boona baatandika kwekwatsakwatsa. Ow'okubanza yaagira ati: Nguzire ekibanja, nshemereire kuza kukireeba. Naakweshengyereza, omungambirire, ansaasire. 19Ondiijo ati: Nguzire enimi ikumi zikomeraine ibiri ibiri, mbwenu ninza kuzihingisa ndeebe. Naakweshengyereza, omungambirire, ansaasire. 20Ondiijo kandi ati: Nibwo ndugire kushwera, tikyambaasikira kwija. 21Ogwo muheereza yaagarukayo, yaabiteekyerereza mukama we. Nyineeka nikwo kuguubwa kubi, akagira ogwo muheereza we, ati: Yehuute oze omu nguuto n'omu buhanda bw'ekirorero, ondeetere abooro, ebimuga, empumi n'ebirema. 22Handi hakye omuheereza, ati: Mukama wangye, ebi wandagiira naabikora, kwonka hakiriho emyanya mingi. 23Nyineeka amugambira ati: Irooko oze omu bihandagazi n'omu buhanda bw'omu ngo, ogyemesereze abantu baije, enju yangye eijure. 24Kwonka nimbagambira, ngu tihariho n'omwe aha beetsirwe oraaroze aha bugyenyi bwangye. 25Ebimbuuro bingi by'abantu bikakuratira Yesu naagyenda; yaahinduka, yaabagira ati: 26Omuntu weena oija ahi ndi, atangire ishe na nyina, omukazi we n'abaana, beene ishe na banyaanya, nangwa n'amagara ge, tabaasa kuba mutendekwa wangye. 27Weena oteekorera musharaba gwe akankuratira, tabaasa kuba mutendekwa wangye. 28N'oha omuriimwe owaakwenda kwombeka omunaara, atabanze kushutama akabariirira yaaba aine ebirikuguheza? 29Ku yaakuba atagizire atyo, yaayombeka omusingi, bwanyima yaashanga atarikubaasa kuheza ogwo murimo, abareebi bakaatandika kumushekyerera, 30bati: Eki kishaija kikatandika kwombeka, kyaremwa kuheza. 31Nari ni mugabe ki owaakuhurura kuteera ondi mugabe, atabanze kushutama akareeba yaaba we n'engabo ze kakumi baakubaasa kurwanisa ow'obukumi bubiri oizire kwerwanaho? 32Ku yaakureeba atarikubaasa, akaatuma ahari ogwo mugabe akiri hare, kumubuuza eki yaakumuhongyera ngu bagarukane. 33Naimwe nikwo kiri kityo. Tihariho n'omwe orikubaasa kuba omutendekwa wangye, atatsigireho byona ebi atungire. 34Manya omwonyo guba murungi, beitu omwonyo ku gwakuhwamu ensha, ekaagarurwamu eta? 35Guba gutakigasira itaka, nari ekirundo ky'orwezo. Abantu bagunaga. Weena oine amatu garikuhurira, ahurire!

will be added

X\