Luke 13

1Omu bunaku obwo hakaija abantu, baateekyerereza Yesu eby'Abagalilaaya abu Pilaato yaitsire nibahonga ebitambo. 2Ku yaahuriire ekyo, yaabagira ati: Nimuteekateeka ngu Abagalilaaya abo abaabonaboine batyo, bakaba bari abasiisi okukira abandi Bagalilaaya? 3Ngaaha, nimbagambira ngu tikwo baabaire bari. Kwonka naimwe, ku muraabe muteeteisize, muryahwerekyerera nkabo. 4Nari shi, bari eikumi na munaana, abaateirwe omunaara gwa Siloamu gukabaita, nimugira ngu bakaba baine orubanja okukira abandi boona ab'omuri Yerusalemu? 5Ngaaha, nimbagambira ngu tikwo baabaire bari. Kwonka naimwe, ku muraabe muteegarukiremu, muryahwerekyerera nkabo. 6Yesu akacwa enfumu egi, ati: Omuntu akaba aine omutiini agubyaire omu musiri gwe gw'emizaabibu; yaija kugushoromaho ebijuma, kwonka yaashanga bitariho. 7Yaagira omushaija owaabaire naareeberera ogwo musiri, ati: Reeba, naahitsya emyaka eshatu niinyija kusherura ebijuma ahari ogu mutiini, kwonka nshangaho busha. Guteme; nigufiisiza busha omwanya. 8Mpaho ogwo mushaija amugarukamu ati: Mukama wangye, gurekye gumare ogundi mwaka, mbanze nguhingirire, ngutemu orwezo. 9Obundi omu mwaka ogurikwija gukaayana; reero obona kugutema gwaba gutaanire. 10Aha izooba rimwe erya Sabato, Yesu akaba naayegyesa omu iteeraniro rimwe. 11Haashangwa hariho omukazi owaabaire amazire emyaka ikumi na munaana ariho ekyago ekyamuhendahenzire, akacweka omugongo, atabaase kwemerera burunga. 12Yesu ku yaamureebire, yaamweta, yaamugira ati: Mukazi 'we, waakira obumuga. 13Atyo amutaho engaro; ahonaaho ogwo mukazi agororoka, ahimbisa Ruhanga. 14Kwonka omukuru w'eiteeraniro aguubwa kubi, ngu ahabw'okuba Yesu yaakiza ahari Sabato. Mpaho agambira abari aho, ati: Hariho ebiro mukaaga ebikorerwamu. Mube nibyo mwaguma nimwiziramu kutambirwa, kutari kwija ahari Sabato. 15Yesu yaamugarukamu ati: Ndyarya 'mwe, omuriimwe hariho otatsibura nimi ye, nari ndogoya ye kuza kugyeeshera ahari Sabato? 16Mbwenu shi ogu mukazi, muhara wa Aburahamu, ou Sitaane aboheire egi myaka ikumi na munaana, kyaba kitahikire kumubohoorora aha izooba rya Sabato? 17Ku yaagambire ekyo, abarikumuhakanisa boona baabwerabwera, kandi abantu boona baashemerererwa munonga eby'okutangaaza ebi yaabaire naakora. 18Yesu akongyera kugamba ati: Obukama bwa Ruhanga nibushusha ki? Mbwenu mbugyeragyeranise na ki? 19Buri nk'enjuma y'embibo ya karidaari, ei omuntu yaatwaire akanaga omu musiri gwe; ekakura, ekarugamu omuti, enyonyi z'omu kaabunga zikaarika omu mataagi gaagwo. 20Ekindi akagira ati: Obukama bwa Ruhanga mbushushanise na ki? 21Buri nk'ekitumbisa eki omukazi yaakwatsire, akakijwanzya omu ncuro ishatu z'esaano okuhitsya obu yoona yaatumbire. 22Yesu akagyenda naayegyesa omu birorero n'omu byaro, obwo naaza Yerusalemu. 23Omuntu yaamugira ati: Mukama wangye, noogira ngu abakye bonka nibo barijunwa? Yaabagira ati: 24Mukore kyona eki murikubaasa kutaahira omu irembo erifunzire, ahabw'okuba nimbagambira, ngu baingi baryateeraho kutaahamu kwonka baremwe. 25Nyineeka ku ariheza kwimuka yaakinga orwigi, muryashanga mwemereire aheeru nimwiguza muti: Mukama waitu, twigurireho! Kwonka aryabagarukamu ati: Tindikumanya ahi murikuruga. 26Mpaho mutandikye kwetonda muti: Ka twabaire shi turya naiwe tukanywa naiwe, nooyegyeseza omu nguuto z'owaitu. 27We aryabagarukamu ati: Tindikumanya ahi murikuruga. Nimundugyeho, imwe mwena enkozi z'ebibi. 28Obwo haryabaho okucura n'okunena amaino, mwareeba Aburahamu na Isaaka na Yakobo n'abarangi boona omu bukama bwa Ruhanga, kwonka imwe mubingiirwe aheeru. 29Kandi abantu aba burugwa-izooba na burengyerwa-izooba, aba bukiizi-bwa-bumosho na bukiizi-bwa buryo baryaija bashutame aha bugyenyi omu bukama bwa Ruhanga. 30Manya ab'okuhereeruka baryaba ab'okubanza, n'ab'okubanza babe ab'okuhereeruka. 31Ago magingo bamwe omu Bafarisaayo bakaija, baagambira Yesu bati: Irooko! Ruga aha, ahabw'okuba Herode naayenda kukwita! 32Yaabagarukamu ati: Mugyende mugambire muha ngigyo, muti: Omanye ku hati na nyencakare ndikubinga ebyago n'okutamba endwara, kandi aha kiro kya kashatu mpikiirize ekyandeetsire. 33Kwonka eri izooba na nyencakare na ku burisheesha ndi ow'okugumizamu, ahabw'okuba tikihikire omurangi kufeera ahatari muri Yerusalemu. 34Yerusalemu, Yerusalemu, iwe oita abarangi, okateera amabaare abakutumirweho! Ni kangahi obu naayenzire kuteerana hamwe abaana baawe, nk'oku enkoko erundaana obwana bwayo ekabubumbatira omu mapapa, kwonka mukanga! 35Reeba, enju yaanyu mwaza kugitsigaramu mwenka. Kwonka nimbahamiza ku mutarindeeba bundi okuhitsya obu murigira muti: Orikwija omu iziina rya Mukama ahimbisibwe!

will be added

X\