Luke 12

1Omuri ago magingo abantu enkumi n'enkumi ku baabaire bateeraine nibaribatiirirana, Yesu yaatandika kugamba naabandiza aha batendekwa be, ati: Mwerinde ekitumbisa ky'Abafarisaayo, nibwo buryarya bwabo. 2Manya tihariho kishwekirwe ekitarishuuruurwa, nari ekisherekirwe ekitarimanywa. 3N'ahabw'ekyo kyona eki muragambiire omu mwirima kiryahurirwa nyomushana, na kyona eki murahwihwitsiize omu myanya eyekiikire kiryarangirirwa aha mitwe y'enju. 4Imwe banywani bangye, nimbagambira nti: Murekye kutiina abarikwita omubiri, ahabw'okuba ku baheza, baba batakiine kindi eki baraakore. 5Ka mbagambire ou muraagume nimutiina: niwe Ogwo oheza kwita, akagira n'obushoboorozi bw'okunaga okuzimu omu muriro. Weeza kwo, Ogwo mube niwe mwatiina. 6Ebiteerankumba bitaano tibigurwa sente ibiri? Kwonka shi, tihariho na kimwe ekyeba omu maisho ga Ruhanga. 7Nangwa n'eishokye ry'aha mutwe gwanyu ryona rikabarwa. Timuri b'okutiina, ahabw'okuba muri ab'obuguzi bwingi okukira amagana g'ebiteerankumba. 8Nimbagambira nti: Weena orikuunyemera omu maisho g'abantu n'Omwana w'omuntu aryamwemera omu maisho ga baamaraika ba Ruhanga. 9Kwonka weena orikuunyoga omu maisho g'abantu, aryayogyerwa omu maisho ga baamaraika ba Ruhanga. 10Weena origamba kubi aha Mwana w'omuntu aryasaasirwa, kwonka orirogota ahari Mutima Orikwera tarisaasirwa. 11Ku baribatwara omu mateeraniro n'aha baramuzi n'aha b'obushoboorozi kubatonganisa, mutarishoberwa oku muryetonganira n'eki murigamba, 12ahabw'okuba omu bunaku obwo Mutima Orikwera aryabahabura eki murigamba. 13Omuntu omwe omu baabaire bateeraniire aho, akagira Yesu ati: Mwegyesa, gambira mwene tata abagane naanye eby'obuhunguzi bwaitu. Yaamugarukamu ati: 14Iwe mushaija 'we, n'oha owantaireho kuba ow'okubaramura, nari ow'okubabaganisiza ebi murikufa? 15Bwanyima yaabagira ati: Mureebe kandi mwerinde ekyetwa omururu kyona, manya amagara g'omuntu tigaba mu bi atungire nangwa nobu akutunga ebishaagire. 16Nikwo kubacwera enfumu egi, ati: Hakaba hariho omushaija omutungi, owaabaire ashaarwire bingi omu musiri gwe. 17Akateekateeka ati: Mbwenu ngire nta, ka ntaine h'okuhunika egi myaka yangye yoona? 18Atyo agira ati: Eki ndaije kukora n'eki: niinyija kusheenya ebitara byangye, nyombekye ebihango, mbe nimwo naahunika emyaka yangye yoona, nkabiikamu n'ebintu byangye. 19Obwo nibwo ndaayegambire nti: Nyine enyanja y'ebintu birungi ebibiikiirwe emyaka mingi erikwija; mbwenu ka mpuumure, ndye, nnywe, njarame. 20Kwonka Ruhanga yaamugira ati: Iwe mushema 'we! Eki kiro noija kwakwa amagara gaawe; mbwenu ebi waayetindikiire biryaba eby'oha? 21Omuntu oyebiikira eitungo ry'eby'ensi, kwonka atarikuryebiikira ahari Ruhanga, nikwo ashusha atyo. 22Atyo Yesu yaagambira abatendekwa be ati: Nikyo ndikubagambirira nti: Mutaryemerereza omutima eby'amagara gaanyu ebi muraarye, nainga ebi emibiri yaanyu eraajware; 23ahabw'okuba amagara gakira ebyokurya, n'omubiri gukira eby'okujwara. 24Mureebere aha bikoona. Tibibiba kandi tibigyesha; tibigira mabiikiro nobu byakuba ebitara; haza kunu Ruhanga abiriisa. Imwe, ka nimukirira kimwe enyonyi! 25Omuriimwe hariho owaakubaasa kwongyera aha myaka y'amagara ge, nobu yaakwemereza omutima ata? 26Ku muraabe nimuremwa kutegyeka obuntu bukye butyo, ahabw'enki nimwemereza omutima ahabw'ebindi? 27Mureebere aha birabyo, tibyogosha kandi tibiruka, kwonka nimbagambira nti: Nangwa na Solomooni omu kitiinwa kye kyona taraizihiirwe bijwaro nka kimwe aharibyo. 28Mbwenu Ruhanga ku araabe ajweka atyo obunyaatsi bw'omu ishwa, oburiho eri izooba, nyencakare bukanagwa omu kikoomi, kaashwa imwe bantu 'mwe, abaine okwikiriza kukye! 29Mbwenu imwe, mutarimarira omutima aha bi murirya n'aha bi murinywa, nobu kwakuba okugwemereza. 30Manya ebyo byona nibyo Abanyamahanga boona baitanira, kandi Shoimwe naamanya ku murikubyetenga. 31Kureka omutima mugumarire aha bukama bwe, haza ebyo byona muryabyongyerwaho. 32Imwe obusyo bukye, timuri b'okutiina, ahabw'okuba Shoimwe akasiima kubaha obukama. 33Mutunde ebi mwine. Ebiraabirugyemu mubihe abakyene. Mwetungire enshaho ezitarikukura, n'eitungo eritahwaho ery'omu iguru ei abashuma batashuuza, n'ebiyenje ei bitarisiisira. 34Manya ahu eitungo ryanyu riri n'omutima gwanyu niho guba. 35Mugume mwezirikire n'amatabaaza gaanyu nigaaka. 36Mube nk'abantu abategyereize mukama waabo kugaruka naaruga aha bugyenyi bw'obushwere, abateekateekire kumwigurira yaahikaho ati naiguza. 37Abaheereza abo, abu mukama waabo ariija akashanga nibareeba, baine omugisha! Ka nkibagambire omu mazima nti: Aryayezirika, abashutamye aha meeza abaheereze. 38Obundi akaija abantu baahirwayo nari enkoko nizigamba, kwonka abaheereza abu arishanga beeteekateekire baine omugisha! 39Mwetegyereze eki: nyineeka ku yaakuba naamanya eshaaha ei omushuma araiziremu, takaamwikiriza kufumura enju ye. 40Naimwe nu mugume mweteekateekire, ahabw'okuba timurikumanya bunaku obu Omwana w'omuntu ariiziramu. 41Petero yaagira Yesu ati: Mukama, egyo nfumu ei waacwa, niitwe orikurengyeza nari n'omuntu weena? 42Mukama yaagira ati: Ni mutsigire ki omwesigwa kandi ow'obwengye, ou mukama we yaatsigiire ab'omu ka ye, kubaha endengo y'engano omu bunaku buhikire? 43Ogwo mutsigire, ou mukama we ariija akashanga naakora atyo, aine omugisha. 44Ninkugambira omu mazima nti: Aryamuha obushoboorozi aha bi atungire byona. 45Kwonka ogwo mutsigire ku arigira omu mutima gwe ati: Mukama wangye yaatuuraho kwija; reero akatandika kuteera abaheereza n'abaheerezakazi, akarya, akanywa, akasinda; 46mukama w'ogwo mutsigire aryaija aha kiro ki onu atamwetegyeireho n'aha shaaha ei atarikumanya. Haza aryamufubira munonga, amugire nk'oku abateesigwa bagirwa. 47Omuhuuku owaamanyire ebi mukama we arikwenda, kwonka akashangwa atakabikozire, aryateerwa eminyaafu mingi munonga. 48Kwonka otarabimanyire, kandi akashangwa akozire eby'okumuteeza, aryateerwa eminyaafu mikye. Owaahairwe bingi aryabuuzibwa bingi, n'owaakwatsiibwe bingi aryayenzibwa ebirikukiraho. 49Ekyandeetsire n'okutweka omuriro omu nsi. Nkaabaasibwa ki gushangwa gwayakire! 50Kandi hakiriyo okubatizibwa oku nkiine kubatizibwa; ebishi nikinsaasa okuhitsya obu kurihikiirizibwa. 51Nimuteekateeka ngu nkaija kureeta obusingye omu nsi? Nimbagambira nti: Ngaaha, kureka nkaija kutaanisa. 52Ahabw'okuba okwiha hati enju erimu bataano eryayebaganisamu, abashatu barwanise ababiri n'ababiri barwanise abashatu. 53Ishe w'omwana aryarwanisa omutabani, n'omutabani arwanise ishe. Nyina w'omwana aryarwanisa muhara we, nawe arwanise nyina. Nyinazaara w'omuntu aryarwanisa omukaamwana, n'onu arwanise nyinazaara. 54Kandi Yesu akagambira ebimbuuro by'abantu ati: Ku mureeba ekicu kyarumbaara burengyerwa-izooba, ahonaaho mugira ngu enjura yaaza kugwa; mpaho egwa. 55Kandi omuyaga ku gureetwa bukiizi-bwa-buryo, mugira ngu nihaija kubaho omushana mwingi; haza gubaho. 56Imwe ndyarya 'mwe, ku muraabe nimumanya kurengyerera eby'aha nsi n'eby'ahaiguru, nimuremwa muta kukyengyera eby'obunaku obu? 57Ahabw'enki nimuremwa kucwamu ekihikire? 58Eky'okureeberaho: ku oraabe nooza omu iramuriro n'orikukutabaariza, teeraho kugarukana nawe mukiri omu muhanda. Kitari ekyo, naija kukukurura, akuhitsye omu maisho g'omuramuzi, omuramuzi akuhe omukuru w'ekihome, n'onu akikwigatiremu. 59Ninkugambira nti: torikirugamu okuhitsya obu oriihura akasente koona akakitsigaireyo.

will be added

X\