Luke 11

1Yesu akaba ari omu mwanya gumwe naashaba; ku yaaherize, omwe aha batendekwa be yaamugira ati: Mukama, twegyese okushaba nk'oku Yohaana yaayegyeise abatendekwa be. 2Nawe yaabagambira ati: Ku muraabe nimushaba mugire muti: Taata, eiziina ryawe ritiinwe, obukama bwawe bwije; 3otuhe buri izooba egabo yaitu y'obutoosha; 4otusaasire ebibi byaitu, ahabw'okuba naitwe tusaasire weena otwineho eibanja; otatureka tukoohibwa. 5Kandi akabagambira ati: Omwe omuriimwe ku yaakuba aine mugyenzi we, yaaza owe omu itumbi kumushaba ati: 6Mugyenzi wangye, nguza emigaati eshatu, ahabw'okuba munywani wangye nibwo arikwija naaruga omu rugyendo, haza tiinyine ky'okumuha. 7Nyineeka ogwo yaamugarukiramu omu nju, ati: Otanganzya, naaherize kukinga, nyowe n'abaana bangye twabyamire, tinkiine gaimuka kugikuha. 8Nimbagambira nti: Ogwo mushaija nobu araabe atarikwenda kwimuka kugimuha ahabw'omukago, kwonka ahabw'okugumizamu naamweshengyereza, naija kurugaho aimukye, ahe munywani we ogwo byona ebi arikwenda. 9Naanye nimbagambira nti: Mushabe, muryaheebwa; musherure, muryazoora; mwiguze, muryaigurirwa. 10Ahabw'okuba weena oshaba, aheebwa; osherura, azoora; n'oiguza, aigurirwa. 11Ni muzaire ki omuriimwe ou mutabani we yaakushaba ekyenyanja, onu akamuha enjoka? 12Nari owaakumushaba eihuri, akamuha ekinyabushegu? 13Mbwenu imwe ababi, ku muraabe nimumanya kuha abaana baanyu ebirungi, Shoimwe ow'omu iguru k'arikizaho kuha Mutima Orikwera abarikumushaba! 14Eizooba rimwe Yesu akabinga aha muntu ekyago ekyabaire kimuhindwire ekiteta. Ekyo kyago ku kyamurugireho, ogwo muntu yaagamba; abantu baatangaara. 15Kwonka bamwe omuribo baagira bati: Ebyago naabibinga n'obushoboorozi bwa Beelizebuli mukuru waabyo. 16Abandi baamutega nibamushaba akamanyiso akarikuruga ahari Ruhanga. 17Kwonka we yaamanya ebiteekateeko byabo, yaabagira ati: Obugabe bwona obwebaganisamu buba buri obw'okuhwerekyerera; n'eka ku eyetaanisamu, ekumbagara. 18Na Sitaane nikwo ari atyo. Ku araabe naayebaganisamu, obugabe bwe nibugumaho buta? Mbwenu nk'oku murikugira, ngu nyowe ebyago nimbibingisa Beelizebuli; 19biri ku ndaabe nimbibingisa Beelizebuli, abaana baanyu bo nibabibingisa oha? N'ahabw'ekyo nibo baraabamare empaka. 20Kwonka ku ndaabe nimbibingisa obushoboorozi bwa Ruhanga, biri obwo, obukama bwa Ruhanga bubahikireho. 21Omuntu w'amaani oine eby'okurwanisa byona ku arinda aka ye, ebintu bye biba buhooro. 22Kwonka orikumukiza emikono ku amutaahirira, yaamusingura, amunyaga eby'okurwanisa ebi yaaba naayesiga; haza eminyago ye agibagana n'abandi. 23Otakwatanisa naanye, aba omuzigu wangye, kandi otataaruura naanye, ataataanisa. 24Ekyago ku kiruga omu muntu, kizengyerera omu byanga ebitarimu maizi nikisherura ah'okutuura. Ku hakiburira, kigira kiti: Ka ngarukye omwangye omu naarugire. 25Kwonka ku kihikamu, kyashanga egyo nju eyeyereirwe kandi etegwirwe, 26kityo kigyenda, kireeta ebindi byago mushanju ebibi okukikira. Mpaho bitaahamu, bigumamu; ogwo muntu omuheru gwe guba mubi okukira oku yaabaire ari bwabiso. 27Yesu ku yaabaire naakigamba, omukazi ow'omu baabaire bateeraniire aho, yaimutsya eiraka ati: Enda eyaakuzaire n'amabeere agu waayonkire biine omugisha. 28Kwonka we yaagarukamu ati: Abakira kugira omugisha n'abahurira ekigambo kya Ruhanga bakakyorobera. 29Ebimbuuro by'abantu ku byakanyire, Yesu yaabagambira ati: Ab'obusingye obu ni babi, nibashaba akamanyiso; kwonka tihariho kamanyiso karaaboorekwe, kureka aka Yona. 30Nk'oku Yona yaabaire akamanyiso aha Banineeve, n'Omwana w'omuntu nikwo ariba aha b'obusingye obu. 31Aha kiro ky'okucweraho orubanja, omugabekazi wa bukiizi-bwa-buryo aryayemerera n'ab'obusingye obu, abasingise orubanja, ahabw'okuba we akaruga aha muheru gw'ensi, yaija kuhurira eby'obwengye bwa Solomooni; mbwenu reeba, aha hariho orikukira Solomooni. 32Aha kiro ky'okucweraho orubanja, Abanineeve baryayemerera n'ab'obusingye obu, babasingise orubanja; ahabw'okuba Yona ku yaabarangiriire, baayegarukamu; mbwenu reeba, aha hariho orikukira Yona. 33Tihariho muntu ohemba etabaaza akagita endugu nari akagijuumikira ekiibo, kureka agita aha kikondo, ngu ehwezese abarikutaaha omu nju. 34Eriisho niryo rumuri rw'omubiri gwawe. Eriisho ryawe kuriba rihuriire, omubiri gwawe gwona gubugwa okuhweza; kwonka ku riba rirwaire, omubiri gwawe nagwo gutimba omwirima. 35Oyerinde nu, okuhweza oku oine kutakaaba omwirima. 36N'ahabw'ekyo omubiri gwawe gwona ku guraabe gubugirwe okuhweza, kandi gutarimu ekyetwa omwirima, biri niguhwereza kimwe nk'oku etabaaza ekumurikira neeyaka. 37Yesu ku yaabaire yaaheza ati kugamba, Omufarisaayo yaamweta kurya nawe owe. Onu yaataaha omu nju, yaaza aha meeza. 38Ogwo Mufarisaayo ku yaakireebire, yaatangaara kureeba Yesu ataabanza kunaaba atakariire. 39Kwonka Mukama yaamugambira ati: Imwe Bafarisaayo 'mwe, mushemeza enyima y'ebikopo n'eshuhaani, haza omunda mwijwire obunyagi n'obubi. 40Imwe bashema 'mwe, owaahangire eby'aharuguru tiwe yaahangire n'eby'omunda? 41Haakiri abooro mubahe aha bi mwine, haza byona bibabeere ebishemeire. 42Kwonka imwe Bafarisaayo 'mwe, muryakareeba! Ahabw'okuba mutoija kimwe kya ikumi ky'ebishaka ebireetera emboga kugira omuranzi n'ebizinuza, na buri ruganda rwabyo rwona, kwonka obwinganisa n'okukunda Ruhanga mubirenzya amaisho. Ebyo nibyo mwakukozire mutarekire na kiri. 43Muryakareeba, Bafarisaayo 'mwe! Ahabw'okuba mukunda emyanya y'ekitiinwa omu mateeraniro, n'okutangirirwa omu butare. 44Muryakareeba, ahabw'okuba muri nk'ebituuro bitarikureebwa, ebi abantu baribataho batabimanyire! 45Omwe aha bahangu b'eiteeka amugarukamu ati: Mwegyesa, manya ku orikugamba otyo, naitwe nooba otujumire. 46Onu amugira ati: Naimwe bahangu b'eiteeka 'mwe, muryakareeba! Ahabw'okuba mwekoreza abantu emitwaro etarikubaasa kwekorerwa, haza imwe mutarikugikozaho rukumu. 47Muryakareeba, imwe abombeka ebituuro by'abarangi abu baashoimwe baitsire! 48Ku murikuba nimukora ekyo, nimuba nimwikiriza eki baashoimwe baakozire kandi nimukisiima. Bo bakabaita, imwe nimwombeka ebituuro byabo. 49Nikyo Bwengye wa Ruhanga yaagiriire ati: Ndyabatumaho abarangi n'entumwa; abamwe babaite nari babahiiganise, 50oruzaaro oru rubone kuturwa eshagama y'omurangi weena eyaaseesirwe, ensi yaaba kubaho, 51okwiha aha ya Abeeli okuhitsya aha ya Zekariya, ou baitiire ahagati y'eitambiro n'omwanya ogurikwera. Buzimazima nimbagambira nti: Ab'oruzaaro oru, egyo shagama eryabatukurira. 52Muryakareeba, imwe bahangu b'eiteeka 'mwe! Ahabw'okuba mukaiha ekikomoorozo omu rwigi rw'okumanya. Imwe mwenka timwataahamu, kandi abarikwenda kutaahamu mwabazibira. 53Ku yaarugira omuri egyo nju, abahangu b'eiteeka n'Abafarisaayo baatandika kumuhakanisa baine ekiniga, nibateeraho kumugyema kugarukamu ebibuuzo byabo ebitarikubarwa, 54nibamutega ngu bamukwatsize omu bi arikugamba.

will be added

X\