James 3

1Banyaruganda, hatarigira baingi omuriimwe abaayenda kuba abeegyesa, ahabw'okuba nimumanya ngu itwe abarikwegyesa turyacwerwa orubanja orurikukira orw'abandi. 2Manya twena tushobya kaingi, kandi omuntu weena, ku yaakuba atarikushobya mu bi arikugamba, akaaba ari ohikiire kimwe, kandi orikubaasa kwetegyeka weena. 3Nimumanya ngu ku tuta embaraasi ebyoma omu kanwa, ngu zitworobere, tuzitooza ahi turikwenda. 4Mureebere n'aha meeri; nobu ziba mpango zita, kandi nizitwarwa emiyaga y'amaani, kwonka engasya nkye munonga zizigarura hoona ahu omuvugi arikwenda ngu zitoore. 5N'orurimi, nobu ruraabe ruri akagingo kakye, rwesiimirana ebintu bikuru. Ka n'eihano okureeba ekibira nikitwekwa akariro kakye, nobu kiba kiri kihango kita! 6Orurimi narwo ruba omuriro. Omu ngingo zaitu nirwo ruba eiteeraniro ry'ebibi byona; rushiisha omubiri gwona, rutweka obuhangwa bw'obuntu bwaitu bwona, n'omuriro ogu rukongyeeza okuzimu owa Nyamuteza. 7Manya ekyeetwa enyamaishwa kyona, n'enyonyi, n'ebirikugyendesa enda, n'ebyenyanja, bibaasa kutegyekwa kandi birategyekirwe abantu. 8Kwonka tihariho muntu orikubaasa kutegyeka orurimi oruba obubi butatuuza, orwijwire obushegu burikwita. 9Turuhimbisisa Mukama Tataitwe, kandi turukyeenesa abantu abaahangiirwe omu nshusha ya Ruhanga. 10Omuri ako kanwa, harugamu okuhimbisa n'okukyeena. Banyaruganda, ekyo tikishemereire kuba kityo. 11Mbwenu shi enshuro emwe neebaasa kurugwamu amaizi amanure n'agarikushaarira? 12Banyaruganda, omutiini tigubaasa kwana ebijuma bya oliva, n'omuzaabibu kwana emitiini. N'amaizi g'omwonyo tigabaasa kurugwamu amarungi. 13Omuriimwe n'oha oine obwengye kandi orikwetegyereza? Ahabw'emitwarize ye mirungi, ayorekye ebi arikukora n'obucureezi oburimu obwengye. 14Kwonka omu mitima yaanyu ku muraabe mwinemu eihari n'okweyendeza, murekye kwehimbisa, mukazindisa amazima ebishuba. 15Obwengye nk'obwo tiburuga mu iguru, n'obw'omu nsi, n'obw'abantu nyabuntu, n'obwa Sitaane. 16Manya ah'eihari n'okweyendeza biri, habaho okutatebeekana n'okukora ebibi bya ibara muringo. 17Kwonka obwengye oburuga omu iguru, okubanza buba empuuhe, butaho kuba obw'obusingye, oburikutwaza gye, obwikiriza eby'oburyo, obwijwire embabazi n'ebirungi, obutarikugwera rubaju, kandi obutarimu buryarya. 18Abareeta obusingye, babiba n'obusingye embibo ezeera okuhikiirira.

will be added

X\