James 2

1Banyaruganda, nk'oku murikwikiriza Mukama waitu Yesu Kristo ow'ekitiinwa, mugume murekye kushoroora omu bantu. 2Ka tugire ngu abantu babiri baija ahi muteeraniire, omwe ajwaire empeta z'ezaabu n'emyenda mirungi munonga; n'ondi omworo ajwaire emyenda etaanyagurikire. 3Mbwenu mwata omutima ahari ogwo ojwaire emyenda emirungi, mwamugira muti: Yeshutamire aha; haza mwagira omworo muti: Yemerera hariya; nari muti: Shutama aha, aha bigyere byangye. 4Obwo nimuba mutashorooraine, mukeekirakiranisa? 5Banyaruganda abakundwa, nimuhurire. Hari, Ruhanga taratooraine booro b'omuri egi nsi, ngu babe abatungi b'okwikiriza, kandi abahunguzi b'obukama obu yaaraganiise abamukunda? 6Kwonka imwe nimuba mugayire ogwo mworo. Abatungi tibo babahata, bakababindirana nibabatwara omu maramuriro? 7Tibo abo abarogota aha iziina rirungi eri mwetererwa? 8Buzimazima ku muraabe nimuhitsya eiteeka rya Mukama, nk'oku ekyahandiikirwe kirikugira kiti: Kunda mutaahi waawe nk'oku oyekunda; nimuba mukozire gye. 9Kwonka ku murikushoroorana, biri mukozire ekibi, kandi eiteeka niriba ribasingiise orubanja, muri abasiisi. 10Manya omuntu weena oremwa kuhitsya ekintu kimwe eky'omu iteeka, aba asingirwe orubanja rw'okutahitsya byona eby'omu iteeka. 11Ahabw'okuba owaagizire ati: Otarishambana; niwe yaagizire ati: Otariita. Ku orikuba otashambaine, kwonka waita, biri nooba ohenzire eiteeka. 12N'ahabw'ekyo mugambe kandi mutwaze nk'ab'okucwerwa orubanja, nk'eiteeka eritwiha omu buhuuku oku riri. 13Ahabw'okuba otagira mbabazi, aryacwerwa Ruhanga orubanja rutarimu mbabazi. Manya embabazi zitamba okusingwa orubanja. 14Banyaruganda, mbwenu omuntu nikimugasira ki okugira ngu aine okwikiriza, haza ataine bi arikukora? Ebyo okwikiriza kwe okwo nikubaasa kumujuna? 15Ku haakubaho omunyaruganda, omushaija nari omukazi, ojwaire kubi kandi ataine byokurya by'okumutunga buri izooba, 16omwe omuriimwe yaamugira ati: Yegyendere n'obusingye, otagatirwe kandi oigute, haza atamuhaire bi omubiri gwe gukyenire, ekyo nikiba nikigasha ki? 17N'ahabw'ekyo okwikiriza kwonka kwaba kutarimu kukora, biri n'okwa busha. 18Shana hakaabaho owaagira ati: Iwe oine okwikiriza, naanye nyine ebi nkora. Mbwenu nyoreka okwikiriza kwawe okutakwatiraine n'ebi okora, naanye ahabw'ebi nkora, nkworekye okwikiriza kwangye. 19Noikiriza Ruhanga ku ari omwe, haza obwo ni gye. Nangwa na baasitaane ekyo bakiikiriza bataho n'okutetema. 20Mbwenu, iwe mushema 'we, nooyenda ku bakworeka ku okwikiriza kutarimu kukora kuba busha? 21Aburahamu tataitwe tarahikiriziibwe ahabw'eki yaakozire, obu yaahayo omutabani Isaaka aha itambiro? 22Aho nooreeba ku okwikiriza kwe kwagyendeire hamwe n'ebi yaakozire. Haza okwo kwikiriza kukahikiiririzibwa kimwe ebi yaakozire. 23N'ahabw'ekyo ekyahandiikirwe kikahikiirizibwa, ekirikugira kiti: Aburahamu akaikiriza Ruhanga, ekyo kyamubarirwa kuba okuhikiirira. 24Aho nimureeba ku omuntu ahikiirizibwa Ruhanga ahabw'ebi akora, kutari ahabw'okwikiriza kwonka. 25Kandi shi Rahabu, maraaya ori, omu muringo ogwo nawe tarahikiiriziibwe Ruhanga ahabw'ebi yaakozire, obu yaakunira entatsi, akazitooza ogundi muhanda? 26Mbwenu nk'oku omubiri ogutarimu mutima guba ogufiire, n'okwikiriza okutarimu birikukorwa nikwo kuba okufiire.

will be added

X\