Hebrews 9

1Nangwa n'endagaano eya ira ekaba egira emigyenzo y'okuramya, n'omwanya ogurikwera ogw'omu nsi. 2Ahabw'okuba hakaba hariho eihema eritairweho, eri ekishengye kyaryo ekirikubandizibwaho kyabaire kibamu ekikondo ky'amatabaaza n'emeeza n'omugaati ogumurikiirwe Ruhanga; nikyeetwa Omwanya Ogurikwera; 3omunda y'omukingo gwa kabiri hariyo eihema eririkwetwa Omwanya ogurikukirira kimwe Okwera. 4Omwo hakaba harimu eitambiro ry'ezaabu ery'okwotereraho obubaani, n'eshanduukye y'endagaano eshwekirwe ezaabu embaju zoona. Egyo shanduukye ekaba ebamu orubindi rw'ezaabu orurimu emaanu, n'enkoni ya Arooni eyaaginire, kandi n'ebishate by'amabaare g'endagaano; 5ahaiguru yaayo hariho baakerubi b'ekitiinwa, basangiire ekitebe ky'okusaasira. Ebyo byona obwa hati titurikubaasa kubitondoora. 6Ebyo ku byaherize kukorwa bityo, abahongyerezi baaguma nibataaha omu ihema eririkubandizibwaho, nibakoreramu emigyenzo yaabo y'obuhongyerezi. 7Kwonka omu rya kabiri, omuhongyerezi omukuru wenka niwe yaabaire azamu, kandi akaba atazamu ataine shagama y'okwetambirira, n'okutambirira ebibi by'abantu. 8Omuri ekyo, Mutima Orikwera naamanyisa ku omuhanda ogurikutaaha omu mwanya ogurikwera gutakaigukire, okwiha obu eihema ery'okubanza rikyemereireho. 9Ekyo nikimanyisa obusingye obu oburiho. Okwihirira omuri ebyo, empongano n'ebitambo, ebitabaasa kuhikiiririza kimwe omutima gw'orikuramya, biheebwayo. 10Biine akakwate n'ebyokurya n'ebyokunywa n'eby'okweyeza ebitari bimwe. Niyo migyenzo y'abantu buntu, eyaatairweho okuhitsya obu obunaku bw'okugarura ebintu busya burihika. 11Kwonka Kristo ku yaizire ari omuhongyerezi omukuru ow'ebirungi ebiriija, yaaraba omu ihema eririkukira obukuru n'okuhikiirira-- eri ihema rikaba ritakozirwe na mikono, nikwo kugira ngu ritari ry'omu bihangirwe ebi. 12Atyo yaataaha rimwe heza omu Mwanya ogurikukirira kimwe Okwera, atatwairemu shagama y'embuzi nari y'enyana, kureka eshagama ye wenka, haza yaatutungira okucungurwa okutarihwaho. 13Okumiisiira abantu basiisikaire, eshagama y'embuzi n'ey'enimi kandi n'eiju ry'enyana ecwekyeize kimwe, ku kuraabe kweza omubiri, 14mbwenu shi eshagama ya Kristo owaayehaireyo omuri Mutima otahwaho, ataine kamogo ahari Ruhanga, terikukiraho kweza emitima yaanyu neegyozyaho ebikoro bifiire, haza mukabona kuheereza Ruhanga ohuriire? 15N'ahabw'ekyo, Kristo niwe muteeranizi w'endagaano ensya, ngu abaayetsirwe babone kutunga obuhunguzi obutahwaho obwaraganisiibwe. Okufa kwe okwabaireho, nikwo kubacungura omu bibi ebi baakozire bakiri omu ndagaano eya ira. 16Manya okuraga tikuhikiirizibwa kiraga atakafiire. 17Ahabw'okuba okuraga okwo kutandika kukora haabaho okufa, kandi tikugira maani nyakuraga akiriho. 18N'ahabw'ekyo n'endagaano eyaabandize terahamiibwe ahatari shagama. 19Ahabw'okuba Musa, ku yaaherize kurangirira abantu boona ebiragiro byona eby'omu iteeka, yaabakura eshagama y'enyana n'ey'embuzi n'amaizi n'ebyoya by'entaama ebirikutukura n'enyaweera, yaabimiisiira ekitabo ky'eiteeka n'abantu boona, 20naagira ati: Egi niyo shagama y'endagaano, ei Ruhanga yaabaragiire kukuratira. 21Kandi omu muringo nigwo gumwe, egyo shagama yaagimiisiira eihema n'ebintu byona ebikoresibwa omu kuramya. 22Buzimazima omu iteeka haihi ebintu byona byezibwa eshagama; kandi ahatari kusheesha shagama, tihabaho kusaasirwa ebibi. 23N'ahabw'ekyo, ebirikushusha eby'omu iguru, kikabyetengyesa kwezibwa egyo migyenzo. Kwonka eby'omu iguru byo byezibwa ebitambo ebirikuhita biri. 24Manya Kristo tarataahire mu mwanya ogurikwera ogukozirwe n'emikono, oguri ekyeshusha ky'ogw'amazima; kureka akataaha omu iguru nyaiteeka, ngu abone kuguma naareebeka omu maisho ga Ruhanga, kututonganira. 25Kandi taragumire naayehayo kaingi, nk'oku omuhongyerezi omukuru ataaha omu Mwanya Ogurikwera buri mwaka n'eshagama etari ye. 26Kuri kyabaire kityo, akaabaire ari ow'okuguma naabonabonesibwa okwiha aha kuhangwa kw'ensi. Kwonka mbwenu, aha muheru gw'obusingye obu, akareebeka rimwe yaaheza, ngu abone kwihaho ebibi naayetamba. 27Abantu boona bakateerwaho okufa rimwe, na bwanyima bakacwerwa Ruhanga orubanja. 28Na Kristo nikwo yaahairweyo rimwe, kwihaho ebibi bya baingi. Mbwenu aryareebeka omurundi gwa kabiri, ataiziriire kibi, kureka okujuna abariba bamutegyereize n'ekihika.

will be added

X\