Hebrews 7

1Melikizedeki ogwo akaba ari omugabe wa Saleemu, kandi omuhongyerezi wa Ruhanga Rukiraboona. Akabugana Aburahamu naaruga aha rugamba kwita abagabe, yaamushabira omugisha. 2Aburahamu nawe yaamucweraho ekicweka kya ikumi ky'ebi yaabaire anyagire. Amakuru g'okubanza g'eiziina Melikizedeki, ngu n'omugabe w'okuhikiirira, kandi ngu n'omugabe wa Saleemu, amakuru ngu omugabe w'obusingye. 3Omu Byahandiikirwe tibarikworeka ishe nari nyina, nainga akarande ka baishenkuru, n'obu kwakuba okworeka okuzaarwa kwe nari okufa kwe. Bamushushanisa nk'Omwana wa Ruhanga; atuura ari omuhongyerezi ebiro byona. 4Ebishi n'omuntu rugambwa, ou tatenkuriitwe Aburahamu yaahaire kimwe kya ikumi ky'eminyago! 5Kandi baijukuru ba Leevi abo, abatunga omwoga gw'obuhongyerezi, baikirizibwa omu iteeka kutwara kimwe kya ikumi ekirikuruga omu bantu beene waabo, nabo nobu baraabe bari ab'orura rwa Aburahamu. 6Kwonka ogwo muntu owaabaire atarikubakomookamu, Aburahamu akamutoijera kimwe kya ikumi, kandi yaashabira omugisha ogwo owaabaire yaaraganisiibwe. 7Tihariho kubangaanisa, omuto niwe ashabirwa omukuru emigisha. 8Omu bahongyerezi, kimwe kya ikumi kitungwa abantu abafa; kwonka ahari Melikizedeki kikatungwa omwe obaho, nk'oku ekyahandiikirwe kirikugira. 9Nangwa kikaabaasika kugambwa ngu na Leevi otunga bimwe bya ikumi, nawe eby'eikumi ebye akabitoijera omuri Aburahamu; 10ahabw'okuba akaba akiri omu shagama ya ishenkuru, obu Melikizedeki yaamubugana. 11Mbwenu okuhikiirira ku kuraabe kwabaire nikubaasa kutungirwa omu buhongyerezi bw'Abaleevi, - obu abantu baatungiiremu eiteeka ondiijo muhongyerezi akaabaire naayetengyerwa ki kuruga omu rubu rwa Melikizedeki, atari ow'orubu orugambwaho orwa Arooni? 12Manya ku habaho okuhinduka omu buhongyerezi, biri n'omu iteeka hashemereire kubamu okuhinduka. 13Orikugambwaho ebyo byona akaba ari ow'orundi ruganda, orwabaire rutakarugwamuga muntu n'omwe kuheereza aha itambiro. 14Manya nikimanywa butunu ku Mukama waitu yaakomookire omuri Yuda, kandi Musa taine ki yaagambire aha bahongyerezi ekikwatiraine n'orwo ruganda. 15Ekyo nikikira kweyoreka gye haabaho omuhongyerezi ondiijo orikushushana Melikizedeki. 16Ogwo muhongyerezi akaba atatairweho naayema omu iteeka eirtairweho abantu; kureka akaba omuhongyerezi ahabw'amaani g'amagara agatabaasa kuhwerekyerezibwa. 17Manya ebyahandiikirwe nibigira biti: Ori omuhongyerezi ow'orugyero rwa Melikizedeki, kandi nikwo origuma ebiro byona. 18Aha rubaju rumwe, ekiragiro ekyabandize nikiihwaho ahabw'okutagira maani na mugasho. 19Manya eiteeka tiriine ki ryahikiize kimwe; n'aha rundi rubaju, haateebwaho amatsiko agarikuhitaho, agatubaasisa kwiririra Ruhanga. 20Kandi ekyo tikirabaireho ahatari ndahiro. 21Manya abaabandize kuba abahongyerezi, bakatunga omwoga gwabo ahatari ndahiro, kwonka Yesu akabuheebwa n'endahiro erikugira eti: Mukama akarahira kandi tarihindura ki yaarahiire, ati: Ori omuhongyerezi, kandi nikwo origuma ebiro byona. 22Ekyo nikyo kyahindwire Yesu kuba omwemererezi w'endagaano erikukira oburungi. 23Abahongyerezi abaabandize bakaba baba baingi omu kukuratana, ahabw'okuba rufu ekaba ebazibira kugumizamu omwoga gwabo. 24Kwonka Yesu, ahabw'okuba agumaho ebiro byona, nikyo atuurira aine obuhongyerezi bw'obutwire, obutarikubaasa kuhungurwa ondi. 25N'ahabw'ekyo ebiro byona abaasa kujuna abairirira Ruhanga nibaraba omuriwe, ahabw'okuba obutoosha atuura naabeeshengyerereza. 26Manya kikaba kihikire itwe kutunga omuhongyerezi omukuru nk'ogwo, orikwera, otahaahuuzibwa, otaine kamogo, otabarirwa mu basiisi, owaatungwirwe akakira eby'omu iguru byona. 27We, tikirikumwetengyesa nk'abandi bahongyerezi abakuru kuhonga ebitambo buri izooba, okubanza aha bw'ebibi bye, na bwanyima ahabw'eby'abandi bantu. Ekyo we akakikora rimwe yaaheza, obu yaayehayo. 28Buzimazima, eiteeka ritaho abantu ab'amaani makye kuba abahongyerezi abakuru; kwonka ekigambo ky'endahiro ya Ruhanga, ekyaizire bwanyima y'eiteeka, kitaho Mwana owaahikiiriziibwe kimwe ebiro byona.

will be added

X\