Hebrews 6

1N'ahabw'ekyo ka turekye kwegyesa ebya Kristo ebi twabandiizeho, tugumizemu kuhika aha by'abaahamire omu by'omutima. Turekye kugaruka kutaho omusingi gw'okweteisa ebifiire ebi twabaire nitukora, kandi n'eby'okwikiriza Ruhanga, 2n'okwegyesa eby'emigyenzo y'okweyeza, eby'okutaho engaro, eby'okuzooka kw'abafiire, n'eby'okucwerwa orubanja rwa bwamperayo. 3Ekyo turyakikora Ruhanga ku ariba asiimire. 4Manya abantu abaabaire baayakiirwe omushana gwa Ruhanga, bwanyima bakagwa, kiba kitakibaasika kubeeteisisa obwa kabiri, ahabw'okuba baba baarorize aha burungi bwa Ruhanga, kandi baatungire Mutima Orikwera. 5Baba baarorize aha burungi bw'ekigambo kya Ruhanga n'aha maani g'obusingye oburiija. 6Bwanyima bagwa, bagaruka babamba Omwana wa Ruhanga aha musharaba kandi bamuhemura butunu. 7Ruhanga aha omugisha eitaka erihaaga enjura erigwireho kaingi, rikeeza ebimera ebirikugasira abaarihingire. 8Kwonka eryo itaka ku rimeza amahwa n'amatojo, riba ritakiine mugasho, ryenagire omu kabi k'okukyeenwa Ruhanga, n'okucwekyerezibwa omuriro. 9Kwonka, imwe abakundwa, n'obu turaabe nitugamba tutyo, ahabwanyu nituhamya ku mwine ebirungi ebirikukiraho, eby'okubahitsya aha kujunwa. 10Manya Ruhanga n'omwinganisa, takaabaasa kurenzya amaisho ebi mukora, na rukundo ei mwayorekire ahabwe nimuheereza abarikwera, nk'oku murikukora na hati. 11Nitwenda buri omwe omuriimwe ku ayoreka omuhimbo nk'ogwo okuhitsya aha muheru, obu ebi aineho amatsiko birihikiiririzibwa kimwe. 12Titurikwenda ngu mube abarikweganda, kureka okuba nk'abo abaikiriza n'abagumisiriza, haza bakahungura ebi Ruhanga yaaraganiise. 13Manya Ruhanga, obu yaaraganisa Aburahamu, ahabw'okushangwa ataine ondiijo orikumukira ou akurahiire, akeerahira, 14naagira ati: Buzimazima ndyakuha omugisha, nkuzaarurukanise. 15Reero Aburahamu, ku yaagumisiriize atyo, yaatunga eki yaaraganisiibwe. 16N'ekya buzima, abantu barahira orikubakira, kandi ekibamara empaka n'okurahira. 17Na Ruhanga, ku yaayenzire kuhamiza ab'okuhungura eki yaaraganiise, oku atahindura naama ye, yaagihamisa endahiro. 18Ruhanga ogwo nikwo kukoresa ebintu bibiri ebitahinduka, ebi atabaasa kubeiheramu. N'ahabw'ekyo, itwe abaamuhungiireho, ebyo bintu byombi bituteera omuhimbo gw'okuhamira aha matsiko g'okutunga ebi yaaturaganiise. 19Ago matsiko n'agaitu. Gari nk'enkondo eri omu mitima yaitu, kandi gahamiiremu kimwe. Googa omu mukingo, gahika endugu 20ei Yesu, kateera-rume, yaatucwereire ekirari, ari omuhongyerezi omukuru ow'orugyero rwa Melikizedeki, kandi nikwo ariguma ebiro byona.

will be added

X\