Hebrews 3

1N'ahabw'ekyo, banyaruganda abarikwera, naimwe abaayetsirwe kubagana amagara g'omu iguru, muteekateekye munonga ahari Yesu entumwa, kandi omuhongyerezi omukuru ow'enyikiriza yaitu. 2Akaba ari omwesigwa ahari ogwo owaamutaireho, nk'oku Musa nawe yaabaire ari omwesigwa omu nju ya Ruhanga yoona. 3Kwonka Yesu akamanywa ku ashemereire kuheebwa ekitiinwa ekirikukira ekya Musa, nk'oku omwombeki w'enju agira ekitiinwa kirikukira eky'egyo nju. 4Manya enju yoona egira omwombeki, kwonka omwombeki w'ebintu byona ni Ruhanga. 5Mbwenu Musa akaba ari omwesigwa omu nju ya Ruhanga yoona, nk'omugaragwa w'okuhamya ebyabaire nibiija kugambwaho bwanyima. 6Haza Kristo we akaba ari omwesigwa ahabw'okuba akaba ari omwana wa Ruhanga orikureeberera enju ye. Kandi egyo nju niitwe, twaba tuhamize obwesigye bwaitu kandi nitubwesiimira ahabw'ebi twineho amatsiko. 7N'ahabw'ekyo nk'oku Mutima Orikwera arikugira ati: Eri izooba ku muraahurire eiraka rye, 8mutagangaaza emitima yaanyu nk'obu mwangomera aha kiro ky'okugyezibwa omu ihamba, 9ei baashwenkuriimwe bangyereize, n'obu baraabe baamazire emyaka makumi ana nibareeba ebi ndikukora. 10Nikyo naagwisiziibwe kubi ab'obusingye obwo, nkagira nti: Obutoosha omu mitima yaabo bahaba; tibakamanyaga mitwarize yangye. 11Nikyo naarahiriire nyine ekiniga, nti: Tibaritaaha mu kihuumuro ki mbainiire. 12Banyaruganda, mwerinde, omuriimwe hatakaabamu oine omutima mubi, ogutarikwikiriza, gukamureetera kuruga ahari Ruhanga ohuriire. 13Kwonka buri izooba mugumyane obunaku butakarengire, omuriimwe hatagira owaagangaazibwa okubeihwabeihwa ekibi. 14Ahabw'okuba tukwatanisiize omuri Kristo, twaba nituhamiza kimwe obwesigye bwaitu obwabandize, tukabuhitsya aha muheru. 15Manya ekyahandiikirwe nikigira kiti: Eri izooba, ku muraahurire eiraka rye, mutagangaaza emitima yaanyu nk'obu mwangomera. 16Mbwenu ni baahi abaahuriire, haza bakagoma? T'abo boona abaarugire Misiri beebembeirwe Musa? 17Kandi abaamazire emyaka makumi ana nibamugwisa kubi ni baahi? T'abo abaasiisire, abu emitumbi yaabo yaagwereraine omu ihamba? 18Kandi ni baahi abu yaarahiriire, ati: Tibaritaaha mu kihuumuro kimbainiire? T'abo abaagomire? 19N'ahabw'ekyo nitureeba ku baaremirwe kutaahamu ahabw'okutaikiriza.

will be added

X\