Hebrews 2

1Nikyo tushemereire kuta munonga omutima aha bi twahurira, ngu tutakaahaba tukabirugaho. 2Ekigambo ekyarangiriirwe baamaraika kikareebeka kiri eky'amazima, kandi weena otarakikuratiire nari okukyorobera akatunga ekifubiro ekimushemereire. 3Mbwenu itwe turyakira tuta, ku turiba tuteetaire ha kujunwa kukuru okurikwingana kutyo? Mukama niwe yaabandize kukuturangirira, abaamuhuriire nabo baakutuhamiza. 4Na Ruhanga yaataho okukuhamya n'obumanyiso n'eby'okutangaaza n'eby'amahano ebitari bimwe. Yaataho n'okugaba ebiconco bya Mutima orikwera, nk'oku arikwenda. 5Manya baamaraika tibo Ruhanga yaahaire ensi eribaho kugitegyeka ei turikugambaho. 6Ahandi omu Byahandiikirwe kikagambwa kiti: Omuntu ni kintu ki, iwe kumwijuka, nari omwana w'omuntu, iwe kumwetaho? 7Okamuhanga, yaabura hakye kwingana na baamaraika, waamujweka ekirunga ky'ekitiinwa n'okuhimbisibwa, waamwemeka kutegyeka ebi waakozire n'emikono yaawe, 8waata ebintu byona ahansi y'ebigyere bye. Mbwenu omu kutegyekyesa omuntu ebintu byona, tihaine kintu kyona eki yaatsigireho atakimutegyekyeise. Kwonka hati titukareebire omuntu naategyeka ebintu byona. 9Kureka Yesu, owaagarwirwe ahansi ya baamaraika omwanya mukye, niwe turikureeba ajwekirwe ekirunga ky'ekitiinwa n'okuhimbisibwa, ahabw'okwemera obusaasi bw'okufa. Ruhanga ahabw'embabazi ze akakora ebyo byona, ngu Yesu afe ahabw'abantu boona. 10Manya kikaba kihikire Ruhanga, ou ebintu byona bibaho ahabwe kandi obibaisaho, ngu omu kwenda kuhitsya abaana baingi aha kitiinwa, ashemereire kubanza kuhindura owaabareeteire okujunwa okuhikiire kimwe, naamurabya omu busaasi. 11Ahabw'okuba ogwo oyeza, n'abo abeezibwa, boona baine obukomooko bumwe. Nikyo atarikwatirwa nshoni kubeeta beene ishe, 12naagira ati: Ndyarangirira eiziina ryawe omuri beene waitu nkuhimbisize omu ruteerane ruhango. 13Kandi ahandi ati: Ndyamwesiga. N'ahandi ati: Reeba ndi aha hamwe n'abaana abu Ruhanga yampaire. 14N'ahabw'ekyo nk'oku abaana bagira omubiri n'eshagama, na Yesu nikwo yaabaire omuntu nkabo. Ekyo akakikora ngu omu kufa kwe abone kucwekyereza ogwo ogira obushoboorozi bwa rufu, niwe Sitaane; 15kandi ngu aihe omu buhuuku abantu boona, abaabaire bamazire amagara gaabo goona bari abahuuku ahabw'okutiina okufa. 16Manya baamaraika tibo aine nabo obuzaare, kureka abwine na baijukuru ba Aburahamu, nk'oku ekyahandiikirwe kirikugira. 17N'ahabw'ekyo kikamushemerera kushushana na beene ishe omu miringo yoona, ngu abone kuba omuhongyerezi omukuru ow'embabazi, kandi omwesigwa omu kuheereza Ruhanga, naahongyerera ebibi by'abantu. 18Ahabw'okuba we, nk'oku yaabonabonesiibwe atyo kandi akoohibwa, naabaasa kuhwera abo abarikwohibwa.

will be added

X\