Galatians 4

1Ningira ngu omuhunguzi, ku aba akiri muto, taine ki akiza omuhuuku, nobu araabe aba ari mukama w'ebintu byona. 2Kureka aguma naategyekwa aboorozi n'abakuza, okuhitsya obu obunaku obwatairweho ishe buhika. 3Naitwe nikwo kiri. Obu twabaire tukiri abaana bato, tukaba turi abahuuku b'ebihangwagashani. 4Kwonka obunaku ku bwahikiire kimwe, Ruhanga yaatuma Omwana we owaazairwe omukazi, kandi owaabaire naategyekwa eiteeka ry'Abayudaaya. 5Ogwo Mwana akaija kucungura abaabaire nibategyekwa eiteeka, ngu tubone kuhindurwa abaana ba Ruhanga. 6Okuhamya ku muri abaana, Ruhanga akoohereza Mutima w'Omwana we omu mitima yaitu, orikweteramu ati: Abba! Taata! 7N'ahabw'ekyo tokiri muhuuku, kureka omwana. Kandi nk'oku ori omwana wa Ruhanga, nawe naija kukuha ebi abiikira abaana be. 8Ira, obu mwabaire mutarikumanya Ruhanga, mukaba muri abahuuku b'ebitari baaruhanga omu buhangwa. 9Kwonka mbwenu nk'oku mwamanyire Ruhanga, nari shi nk'oku mwamanyirwe Ruhanga, nimubaasa muta kugarukira ebihangwagashani, ebitagira maani kandi ebinaku, ebi murikwenda ngu bigarukye bibahindure abahuuku baabyo? 10Reeba, nimugyenza ebiro n'ameezi n'obunaku n'emyaka. 11Nintiina nti shana ebi naabakoreire, nkaaba naahendekyeire busha. 12Banyaruganda, nimbeeshengyereza, mube nkaanye, ahabw'okuba naanye mbaire nkaimwe. Timwine ki mwanyitsize. 13Nimwijuka ku omu kubanza, okurwara kwangye nikwo kwampaisize omugisha gw'okubarangirira Amakuru Marungi. 14Nobu egyo ndwara yangye yaabagangize timurangayire, nobu kwakuba okunnuga; kureka mukaanyakiira nka maraika wa Ruhanga, nari nka Kristo Yesu. 15Mbwenu okushemererwa ku mwagizire obwo, kukaitira hi! Ahabw'okuba nimbahamiza nti, kuri kyabaire nikibaasika, mukaayeihiremu amaisho gaanyu mugampa. 16Mbwenu shi mpindukire omuzigu waanyu ahabw'okubagambira amazima? 17Abo bantu nibabeekundisa, kutari kubendeza birungi. Nibenda kubantaanisaho, ngu naimwe mubakunde. 18Ni kirungi obutoosha imwe okukundwa abandi bantu, baaba nibabakundira ebirungi, kitari bu ndi hamwe naimwe bwonka. 19Baana bangye abakundwa, abu ndikugaruka kugirira obusaasi nk'obw'omukazi orikurumwa, okuhitsya obu Kristo aritondwa omuriimwe! 20Nkaayenzire kuba hamwe naimwe obwa hati, nkahindura emigambire yangye, ahabw'okuba munshobeire. 21Imwe abarikwenda kutegyekwa eiteeka, nimungambire: Timuhurira eki eiteeka ririkugamba? 22Manya kikahandiikwa, ngu Aburahamu akaba aine abatabani babiri: omwe w'omuzaana n'ondi ow'omukazi nyaiteeka. 23Kwonka omutabani ow'omuzaana akazaarwa omu buntu, haza omutabani ow'omukazi nyaiteeka yaazaarwa ahabw'okuraganisibwa. 24Mbwenu ekyo ni nk'enfumu: abo bakazi nibamanyisa endagaano ibiri. Emwe ekaruga aha Rushozi Sinai: yaazaarira obuhuuku, niwe Hagari. 25Hagari ogwo niwe Rushozi Sinai oruri Buharabu. Naashushanisibwa na Yerusalemu eriho obwa hati, ahabw'okuba ari omu buhuuku n'abaana be. 26Kwonka Yerusalemu ey'omu iguru niwe mukazi nyaiteeka, kandi niwe maaweitwe. 27Ahabw'okuba kikahandiikwa kiti: Shemererwa, iwe ngumba 'we etazaara! Yamuza, oteere akaari, iwe otakarumwaga! Ahabw'okuba omukazi otsigirweho aine abaana baingi okukira omukazi oine iba. 28Mbwenu, banyaruganda, itwe turi abaana abaaraganisiibwe nka Isaaka. 29Kandi nk'oku omu bunaku obwo owaazairwe omu buntu yaahiiganiise owaazairwe ahabwa Mutima wa Ruhanga, na mbwenu nikwo kiri. 30Kwonka ekyahandiikirwe nikigira kita? Nikigira kiti: Binga omuzaana n'omutabani, ahabw'okuba mutabani w'omuzaana tarihungura na mutabani w'omukazi nyaiteeka. 31N'ahabw'ekyo, banyaruganda, tituri baana b'omuzaana, kureka ab'omukazi nyaiteeka.

will be added

X\