Galatians 3

1Imwe Bagalatiya 'mwe, abashema! N'oha owaabarogire? Imwe abaayorekirwe butunu Yesu Kristo abambirwe aha musharaba! 2Ka mbabuuze eki kyonka, nti: Mukaheebwa Mutima ahabw'okuhikiiriza eiteeka, nari ahabw'okuhurira Amakuru Marungi mukaikiriza? 3Biri kwo muri abshema? Mukatandika na Mutima, mbwenu mwahereeruka n'omubiri? 4Bingi bityo ebi mwarabiremu bikaba ebya busha? Buzimazima tikwo kiri. 5Ruhanga ku abaha Mutima, akorera omuriimwe eby'okutangaaza. Mbwenu shi ebyo abikora ahabw'okuba ngu nimuhitsya eby'omu iteeka, nari ahabw'okuhurira Amakuru Marungi mukaikiriza? 6Na Aburahamu akaikiriza Ruhanga, kyamubarirwa kuba okuhikiirira. 7N'ahabw'ekyo mumanye ngu abaikiriza nibo baba abaana ba Aburahamu. 8N'ebyahandiikirwe, ku byarangize ngu Abanyamahanga nabo Ruhanga aryabaha okuhikiirira ahabw'okwikiriza, byarangirira Aburahamu Amakuru Marungi bukiri kare, nibigira biti: Omuriiwe amahanga goona garyaheebwa omugisha. 9N'ahabw'ekyo, abaine okwikiriza baheebwa omugisha hamwe na Aburahamu owaikiriize. 10Manya boona abeesiga okukora eby'omu iteeka batuura omu mukyeeno, ahabw'okuba kikahandiikwa kiti: Omuntu weena otarikuguma naakuratira byona ebyahandiikirwe omu kitabo ky'eiteeka, akabihitsya, akyeenwe! 11N'ahabw'ekyo nikyetegyerezibwa ku hatariho muntu oheebwa Ruhanga okuhikiirira ahabw'eiteeka; ahabw'okuba ekyahandiikirwe nikigira kiti: Ohikiriire ahabw'okwikiriza aryagira amagara. 12Kwonka eiteeka tirikomooka mu kwikiriza, ahabw'okuba ekyahandiikirwe nikigira kiti: Orikuhitsya eby'eiteeka biryamuhaisa amagara. 13Kristo akatucungura omu mukyeeno gw'eiteeka obu yaakyeenwa ahabwaitu, ahabw'okuba kikahandiikwa kiti: Weena orihanikwa aha muti, akyeenwe. 14Ekyo kikakorwa kityo, ngu omugisha ogu Ruhanga yaaraganiise Aburahamu guheebwe niguruga omuri Kristo Yesu, ngu naitwe ahabw'okwikiriza tubone kutunga Mutima ou Ruhanga yaaraganiise. 15Banyaruganda, ka mbahe eky'okureeberaho eky'omu bantu. Tihariho oihaho okuraga kw'omuntu, nari okukwongyeraho kwaherize kuhamibwa. 16Mbwenu ebi Ruhanga yaaraganiise, akabiraganisa Aburahamu n'omwijukuru. Tikirikugira ngu, n'abaijukuru, oti ni baingi; kureka nikigamba ahari omwe, kiti: Na mwijukuru waawe, kandi ogwo niwe Kristo. 17Eki ndikumanyisa nikyo eki: Eiteeka eryatairweho haahingwireho emyaka magana ana na makumi ashatu, tiriihaho ndaagano ei Ruhanga yaahamize bwa biso, ngu ribone kuhindura busha ekyaraganisiibwe. 18Ahabw'okuba obuhunguzi kuri bubaho ahabw'eiteeka, tibukaabaho habw'okuraganisa; kwonka Ruhanga akabuheera Aburahamu omu kuraganisa. 19Mbwenu shi eiteeka rikateerwaho ki? Rikongyerwaho ahabw'okworeka oku okushiisha kuri, okuhitsya obu omwijukuru owaakoreirwe egyo ndagaano ariija. Kandi rikarabibwa ahari baamaraika, ryahika omu mikono y'omuteeranizi. 20Haza omuteeranizi taba w'omwe, kwonka Ruhanga aba omwe. 21Mbwenu shi eiteeka nirihakanisa ebi Ruhanga yaaraganiise? Nikikabure! Ahabw'okuba eiteeka kuri ryahairwe, ngu niribaasa kuhaisa amagara, okuhikiirira kukaabaireho ahabw'eiteeka. 22Kwonka Ebyahandiikirwe nibihamya ku ebintu byona biri omu buhuuku bw'ekibi, ngu ekyaraganisiibwe ahabw'okwikiriza Yesu Kristo kibone kuheebwa abarikwikiriza. 23Manya okwikiriza obu kwabaire kutakaizire, tukaba nitutegyekwa eiteeka nitukumwakumwa, tutegyereize okwikiriza okwabaire nikwija kushuuruurwa. 24N'ahabw'ekyo eiteeka rikaba riri omworozi waitu okuhitsya obu Kristo yaizire, ngu okwikiriza kubone kutuhaisa okuhikiirira. 25Mbwenu obu okwikiriza kwaizire, titwakitegyekwa ogwo mworozi. 26Manya ahabw'okwikiriza Kristo Yesu, mwena muri abaana ba Ruhanga. 27Eego, boona omuriimwe abaabatiziibwe kuba na Kristo, mukajwekwa Kristo ogwo. 28Tihaakiriho Muyudaaya nari Omuguriiki; tihaakiriho muhuuku nari ow'obusingye; tihaakiriho mushaija nari omukazi; ahabw'okuba mwena muri bamwe omuri Kristo Yesu. 29Reero ku muraabe muri aba Kristo, biri muri baijukuru ba Aburahamu, abahunguzi nk'oku kyaraganisiibwe.

will be added

X\