Galatians 2

1Bwanyima ku haahingwireho emyaka ikumi n'ena, naagaruka nainamuka Yerusalemu na Barinaba, naatwara na Tito. 2Okwo nkazayo ahabw'okushuuruurirwa Ruhanga ngu nzeyo. Naashoboororera omu mubonano abaabaire bari abanyamaziina, eby'Amakuru Marungi agu ndangirira Abanyamahanga, ngu ntakaaba nk'orikwirukira busha, nari owairukiire busha. 3Nangwa na Tito, ou naagyenzire nawe, nobu araabe yaabaire ari Omuguriiki, tibaramugyemesereize kusharwa. 4Kwonka eky'okusharwa kikareetwa beene waitu ab'ebishuba, abaareetsirwe omuriitwe bwesherekye, bakatutaahamu kukyenguuza eby'obusingye bwaitu obu twine omuri Kristo Yesu, ngu batugarure omu buhuuku. 5Beene waitu abo tituraikirizaine nabo, nangwa n'akaanya kakye, ngu amazima g'Amakuru Marungi gabone kurindwa ahabwanyu gatahindukire. 6Kandi abo abaabaire nibagambwa ku bari abanyamaziina, tibaine ki baanyongyeireho-- manya bo okuba batyo tikwine ki kunkwatiire, ahabw'okuba Ruhanga tashoroora. 7Nangwa bakeetegyereza ku nyowe naakwatsiibwe kurangirira abatashazirwe Amakuru Marungi, nk'oku Petero yaakwatsiibwe kugarangirira abashazirwe. 8Manya owaabaasiise Petero kuba entumwa aha bashazirwe, niwe yambaasiise kuba entumwa aha Banyamahanga. 9Mpaho Yakobo na Keefa na Yohaana, abaabaire nibamanywa ku bari enyomyo, ku baashoboorokyeirwe omugisha ogu naahairwe, nyowe na Barinaba, baatuha engaro, kuhamya ku bakwataniise naitwe, ngu itwe tuze omu Banyamahanga, nabo baze omu bashazirwe. 10Kureka eki baatwehanangiriize n'okwijuka abooro, kandi naanye ekyo nikyo naabaire ntaho omutima kukora. 11Kwonka Keefa ku yaahikire Antiokiya, naamuhakanisa nitureebana, ahabw'okuba akareebeka butunu ashobize. 12Manya, abaatumirwe Yakobo obu baabaire batakaizire, akaba arya n'Abanyamahanga. Kwonka ku baizire, yaayehinya, yaabeecwaho, ahabw'okutiina ab'ekigombe ky'abashazirwe. 13N'Abayudaaya abandi baatooreza oburyarya bwe; nangwa na Barinaba yaatwarirwa omuri obwo buryarya bwabo. 14Kwonka ku naareebire emitwarize yaabo etarikugyendera ha mazima g'Amakuru Marungi, naagambira Petero omu maisho gaabo boona, nti: Beitu iwe Omuyudaaya, ka nootwaza nk'Abanyamahanga, kutari nk'Abayudaaya. Mbwenu noobaasa ota kugyemesereza Abanyamahanga kutwaza nk'Abayudaaya? 15Itwe nobu turaabe turi Abayudaaya enzaarwa, abatari Banyamahanga abasiisi, 16kwonka nitumanya ku omuntu ataheebwa kuhikiirira ahabw'okuhitsya emigyenzo y'eiteeka, kureka ahabw'okwikiriza Yesu Kristo. Nangwa naitwe tukaikiriza Kristo Yesu, ngu tubone kuheebwa Ruhanga okuhikiirira ahabw'okwikiriza Yesu ogwo, kutari habw'okukora emigyenzo y'eiteeka. Manya tihariho muntu n'omwe oriheebwa okuhikiirira ahabw'okukora emigyenzo y'eiteeka. 17Mbwenu itwe, ku turaabe tuteeraho kutungira okuhikiirira omuri Kristo, tukashangwa turi abasiisi, nikwo kugira ngu Kristo naakwatsiza ekibi? Nikikabure! 18Kwonka ku ndaabe ningaruka kwombeka ebi naasheenyire, biri niinyeyoreka ku ndi enshobya. 19Ahabw'okuba nyowe ahabw'eiteeka nkaba ofiire aha iteeka, ngu mbone kuba ohuriire ahari Ruhanga. 20Nyowe nkabambwa hamwe na Kristo. Ndiho, ntakiri nyowe ori, kureka Kristo niwe ari omuriinye; n'amagara agu nyine hati omu mubiri, ngaine ahabw'okwikiriza Omwana wa Ruhanga owankunzire, akeehayo ahabwangye. 21Nyowe tindikuhindura busha embabazi za Ruhanga. Manya okuhikiirira kuri kwabaire nikureetwa eiteeka, Kristo akaafeereire busha.

will be added

X\