Galatians 1

1Nyowe Paulo entumwa otaratairweho bantu, nobu kwakuba okutumwa omuntu, kureka Yesu Kristo na Ruhanga Ishe owaamuzoire omu bafiire 2n'abanyaruganda boona abari hamwe naanye, twabahandiikira, imwe ebigombe by'abaikiriza ab'omuri Galatiya. 3Nitubendeza emigisha n'obusingye ebikomooka ahari Ruhanga Taata na Mukama waitu Yesu Kristo, 4owaayehaireyo ahabw'ebibi byaitu, kutwiha omu buhuuku bw'obusingye obu obubi, nk'oku Ruhanga Tataitwe yaasiimire, 5Ruhanga ogwo ahimbisibwe ebiro byona. Amiina. 6Ni kintangaaza oku murahukire kutsigaho ogwo owaabeeteise embabazi za Kristo, mukaikiriza agandi Makuru Marungi agatari go. 7Tikwo kugira ngu hariho agandi Makuru Marungi, kwonka hariho abarikubarabanisamu, nibenda kukiikamya Amakuru Marungi ga Kristo. 8Manya nobu yaakuba itwe, nari maraika orugire omu iguru, yaabarangirira Amakuru Marungi agatari agu twabarangiriire, akyeenwe! 9Nk'oku twabagambiire bwabiso, na hati nikwo ndikugaruka kukigamba nti: Ku harigira owaabarangirira Amakuru Marungi gatari ago agu mwaikiriize, akyeenwe! 10Beitu shi nyowe niinyenda kusiimwa abantu, nari Ruhanga? Nainga shi ninteeraho kugwisa gye abantu? Manya kuri naabaire ninkigwisa gye abantu, tinkubaire muhuuku wa Kristo. 11Beene Taata, niinyenda ku mumanya ngu Amakuru Marungi agu naarangiriire, tigarakomookire mu bantu. 12Ahabw'okuba tindagaihire ha muntu weena, nari okugeegyesibwa, kureka nkagashuuruurirwa Yesu Kristo. 13Manya mukahurira eby'amagara gangye agaabandize nkiri omu diini y'Ekiyudaaya; oku naahiiganiise n'amaani ekigombe ky'abaikiriza Ruhanga, nkateeraho kukihwerekyereza, 14n'oku naayeyongyeire munonga omu by'ediini y'Ekiyudaaya, nkabikiza baingi ab'ekingano kyangye omu b'eihanga ryangye, nyiniire emigyenzo ya baatatenkuru omuhimbo muhango. 15Kwonka Ruhanga owanshoroire ntakazairwe, akaanyeta ahabw'embabazi ze, 16ku yaasiimire kunshuuruurira Omwana we, ngu mbone kumurangirira omu Banyamahanga, tindeehanwize ha bantu nyabuntu, 17nobu kwakuba okwinamuka Yerusalemu kwehanuuza aha bambandiize kuba entumwa, kureka nkaza Buharabu; na bwanyima naagaruka Damasiko. 18Ku haahingwireho emyaka eshatu, nainamuka Yerusalemu kureeba Keefa, naaguma nawe okumara ebiro ikumi na bitaano. 19Kandi tindareebire n'omwe aha zindi ntumwa, kureka Yakobo murumuna wa Mukama. 20Ebyo ebi naabahandiikira, nindahira Ruhanga orikundeeba, ku ntarikubeiha! 21Bwanyima nkaza omu byanga bya Siriya na Kilikiya. 22Haza obwo nkaba ntakamanyirwe bigombe by'abaikiriza Kristo ab'omuri Buyudaaya oku ndikushusha. 23Bakaba bahurira kwonka abarikugira bati: Owaabaire atuhiiganisa, hati naarangirira enyikiriza ei yaagyerizeho buri kucwekyereza. 24Batyo baahimbisa Ruhanga ahabwangye.

will be added

X\