Ephesians 6

1Abaana, muhurire abazaire baanyu omuri Mukama, ahabw'okuba kihikire. 2Otiine sho na nyoko; ekyo nikyo kiragiro ky'okubanza ekirimu ekyaraganisiibwe, 3ngu obone kuba gye n'okumereera omu nsi. 4Imwe abazaire, murekye kugwisa kubi abaana baanyu, kureka muboorore nimubategyeka kandi nimubeegyesa ebya Mukama. 5Abahuuku, mworobere bakama baanyu ab'omu nsi, nimutiina kandi nimutetema n'omutima gutaine buryarya, nk'abarikworobera Kristo. 6Ekyo mukikore mutarikwenda kureebwa nari kusiimwa abantu, kureka nk'abahuuku ba Kristo, nimukora ebi Ruhanga arikusiima mwihire aha mutima. 7Muheereze n'omutima murungi nk'abarikukorera Mukama, ti nk'abarikukorera abantu. 8Nimumanya ngu ekirungi kyona eki omuntu akora, nikyo Mukama arimuzimuurira, yaaba ari omuhuuku nari ow'obusingye. 9Naimwe bakama b'abahuuku, mube nikwo mwatwaza mutyo abahuuku baanyu mutarikubakangisa. Nimumanya Mukama waabo kandi owaanyu ku ari omu iguru, haza we ku atashoroora mu bantu. 10Eky'aha muheru, mube abahamire omuri Mukama, muhamiibwe obushoboorozi bw'amaani ge. 11Mwejunise eby'okurwanisa byona ebya Ruhanga, mubone kwemera obugobya bwa Sitaane. 12Manya titurikurwanisa bantu nyabuntu, kureka niturwanisa amahe g'emitima mibi ey'omu kaabunga, ey'abakuru, ey'ab'obushoboorozi n'ey'abategyeki b'omuri egi nsi y'omwirima. 13N'ahabw'ekyo mukwate eby'okurwanisa byona ebi muhairwe Ruhanga, mubone kugagungira aha izooba ribi, haza ku muriheza kukora byona, mwemerere muhamire. 14Mpaho mwemerere mwezirikire amazima omu nda, mujwaire okuhikiirira aha kifuba nk'ekyoma ky'okwekingiza. 15Mujware omu bigyere enkaito, mubone kwetebeekanisiza okurangirira Amakuru Marungi g'obusingye. 16Okukira byona, mukwate engabo y'okwikiriza, eraababaasise kuraaza emyambi y'omuriro yoona ey'Omubi. 17Kandi mujware enkofiira y'okujunwa, mukwaitse na rurara ya Mutima, nikyo kigambo kya Ruhanga. 18Obutoosha mugume mushabe nimweshengyereza Ruhanga kubahwera, kandi nimushabira omuri Mutima. N'ahabw'ekyo mugume nimureeba, nimugumizamu kushabira abarikwera boona. 19Naanye munshabire, mbone kutunga eby'okugamba, kandi mbigambise obumanzi, nindangirira eibanga ry'Amakuru Marungi, 20agu ndi entumwa yaago ndi omu nkomo, mbone kugarangirira n'obumanzi, nk'oku kinshemereire. 21Mbwenu ahabw'okwenda ngu mumanye oku ndi n'eki ndikukora, mwene waitu omukundwa Tukiko, kandi omuheereza omwesigwa omuri Mukama, aryabateekyerereza byona. 22Nikyo naamubatumiraho ngu mumanye oku turi, kandi ngu abagarure omutima omunda. 23Obusingye n'okukunda hamwe n'okwikiriza, ebikomooka ahari Ruhanga Taata na Mukama Yesu Kristo, bibe aha banyaruganda boona. 24Kandi boona abakunda Mukama waitu Yesu Kristo na rukundo etahararuka, Ruhanga abagirire embabazi.

will be added

X\