Ephesians 4

1N'ahabw'ekyo, nyowe embohe ya Mukama, nimbeeshengyereza, mugire emitwarize eshemereire okwetwa oku mwayeeteirwe Ruhanga. 2Mugume nimwebundika, nimwecureeza, nimugumisiriza, nimwehangaanirana omuri rukundo, 3nimwezirika kugumyaho obumwe bwa Mutima, mukwatanisiibwe obusingye. 4Manya omubiri ni gumwe na Mutima n'omwe, nk'oku mwine amatsiko gamwe agu mwayeteirwe. 5Mukama n'omwe, okwikiriza ni kumwe, okubatizibwa ni kumwe; 6Ruhanga n'omwe, kandi niwe Ishe wa boona, okira boona, okoresa byona, kandi ori omuri byona. 7Kwonka kandi buri omwe omuriitwe akaheebwa ekiconco ky'omutaano, nk'oku Kristo yaamugyereire. 8Nikyo ekyahandiikirwe kyagiriire kiti: Ku yaatembire omu iguru, yaatwara enkwatwa, yaaha abantu ebiconco. 9Okugira ngu, akatemba, nikimanyisa ki? Nikwo kugira ngu akabanza kushuuma okuzimu? 10Ogwo owaashuumire, niwe yaatembire, akatungamira eiguru ryona, ngu abone kwijuza ebintu byona. 11Abamwe akabaha kuba entumwa, abandi kuba abarangi, abandi kuba abarangirizi b'Amakuru Marungi, abamwe kuba abariisa, n'abandi kuba abeegyesa. 12Ekyo akakikora ngu abarikwera batebeekanisizibwe omurimo gw'obuheereza, haza babone kwombeka omubiri gwa Kristo. 13N'ahabw'ekyo twena turyahika aha kugira obumwe omu kwikiriza n'okumanya Omwana wa Ruhanga, tukagate, tuhikye aha rugyero rwa Kristo oruhikire. 14Reero turekyere aho kuba abaana barikuzongibwa oku n'oku, bakatwarwa buri muyaga gw'enyegyesa y'abantu enyabwengye, abababeihabeihesa obugobya n'oburyarya. 15Kureka tugire emitwarize y'amazima erimu rukundo. Omuri byona tukurire omuri Kristo oba omutwe. 16Kristo ogwo niwe areetera omubiri gwona kuteeranwa, gukakwatanisibwa engingo zaagwo ezi gwahairwe, buri rugingo rukiba nirukora gye omurimo gwarwo, rukareetera omubiri kukura, gukeeyombeka omuri rukundo. 17Mbwenu eki ninkigamba kandi ninkihamya omuri Mukama nti: murekyere aho kugira emitwarize nk'ei Abanyamahanga bagira omu biteekateeko byabo ebitaine mugasho. 18Obwengye bwabo butuura butimbire omwirima, bataine kakwate n'eby'amagara ga Ruhanga, ahabw'obutamanya obureetwa obugangaazi bw'emitima yaabo. 19Tibakiine nshoni, bari nk'ebiti, baine omururu gw'okukora ebihagaro by'emiringo yoona. 20Kwonka imwe, tikwo mwayegire mutyo Kristo. 21Buzimazima mukamuhuriraho kandi nk'abe mukeegyesibwa amazima nk'oku gari omuri Yesu. 22Mbwenu nu murekye entuura yaanyu ya kare, eyaasiisirwe okwetenga okurimu obugobya, 23reero emitima yaanyu n'ebiteekateeko byanyu bihindukye bisya. 24Mugire entuura nsya, eyaahangirwe neeshusha Ruhanga, eri ehikiriire kandi erikwera omu mazima. 25N'ahabw'ekyo murekye ebishuba! Buri muntu agambe eby'amazima na mutaahi we. Manya turi engingo z'omubiri gumwe. 26Ku haakugira ekyabaitsa ekiniga, mwerinde kirekye kubakoresa ekibi, eizooba rikarenga mukikiine. 27Mutariha Sitaane obwiho. 28Omushuma arekye kugaruka kwiba, haakiri akore n'amaani, naakoresa emikono ye ebihikire, haza abone kutunga eby'okuhwera abakyene. 29Ekigambo kyona ekirikushiisha kitariruga omu kanwa kaanyu, kureka kibe ekirungi ekirikwombeka, ekirikuhikaana n'ebiriho, kibone kureetera abarikukihurira emigisha. 30Kandi mutarigwisa kubi Mutima Orikwera wa Ruhanga, ahabw'okuba Mutima niwe kamanyiso akarikworeka ku muri aba Ruhanga, okuhitsya aha kiro ky'okucungurirwaho. 31Obushaarire bwona n'ekiniga n'okuguubwa kubi n'okutongana n'okubeihererana n'eitima biihirwe kimwe omuriimwe. 32Haakiri mube ab'embabazi, ab'esaasi, kandi musaasirane nk'oku Ruhanga yaabasaasiriire omuri Kristo.

will be added

X\