Ephesians 1

1Nyowe Paulo, ou Ruhanga yaasiimire kuba entumwa ya Kristo Yesu, nimpandiikira abarikwera kandi abeesigwa omuri Kristo Yesu, abari omuri Efeso. 2Nimbendeza emigisha n'obusingye ebikomooka ahari Ruhanga Tataitwe na Mukama Yesu Kristo. 3Ruhanga Ishe wa Mukama waitu Yesu Kristo, owaatuheeraire emigisha omuri Kristo, akatuha ebirungi byona ebya Mutima omu iguru, ahimbisibwe. 4Ruhanga ogwo niwe yaatutooraniire omuri Kristo, ensi etakahangirwe, ngu tubone kuba abarikwera, kandi abataine kamogo omu maisho ge. Ahabw'okutukunda, 5akatutoorana tutakabaireho, ngu tuhindukye abaana be omuri Yesu Kristo, nk'enaama ye ei yaasiimire oku eri. 6Ekyo akakikora ngu tubone kusiima embabazi ze ez'ekitiinwa, ezi yaatugambiriire omu Mwana we ogwo ou akunda. 7Omuri Kristo nimwo tucungurirwa ahabw'okufa kwe, tukasaasirwa ebibi byaitu, nk'embabazi za Ruhanga enyingi munonga, 8ezi yaatugiriire oku ziri. 9Manya omu bwengye bwona n'omu kwetegyereza, Ruhanga akatumanyisa eibanga ry'ebi ayenda, nk'enaama ei yaacumire kukorera omuri Kristo oku eri. 10Niyo naama ey'okuteeranira omuri Kristo byona eby'omu iguru n'eby'omu nsi, obunaku bukihika, Kristo akaba omutwe gwabyo. 11Omuri Kristo, nk'oku enaama za Ruhanga ohikiiriza byona n'okusiima kwe oku kuri, 12itwe abaabandize kugira amatsiko omuri Kristo, tukatooranwa kuguma nitusingiza ekitiinwa kye. 13Omuriwe naimwe abaahuriire ekigambo ky'amazima, Amakuru Marungi g'okujunwa kwanyu, kandi mukaikiriza Kristo, mukateebwaho Ruhanga akamanyiso, mwahamibwa Mutima Orikwera owaaraganisiibwe. 14Mutima ogwo niwe mukwato gw'ebi Ruhanga yaaturaganiise. Kandi ogwo mukwato gutuhamiza ku Ruhanga ariheera kimwe abe obugabe bwijwire, ekitiinwa kye kikabona kuhimbisibwa. 15N'ahabw'ekyo ku naahuriire eby'okwikiriza kwanyu omuri Mukama Yesu, n'oku murikukunda abarikwera boona, 16tiinyosha kusiima Ruhanga ahabwanyu. Nimbaijuka omu kushaba kwangye, 17ngu Ruhanga wa Mukama waitu Yesu Kristo, Tataitwe ow'ekitiinwa, abahe Mutima oraabatemu obwengye, akabashuuruurira Ruhanga ogwo, mukamumanya. 18Ninshaba ngu emitima yaanyu emurikirwe, mubone kumanya amatsiko agu yaabeeteire, n'obwingi bw'emigisha ye ey'okutangaaza, ei yaaraganiise abantu be, 19n'oku amaani ge agataine bugarukiro gakorera omuriitwe abaikiriza. Ago maani nigo gamwe na gari 20agu yaakoreise obu yaazoora Kristo omu bafiire, akamushutamya aha rubaju rwe rwa buryo omu iguru. 21Okwo niyo Kristo ategyekyera ab'obushoboorozi n'ab'amaani n'ab'obugabe bwona; naakirira kimwe amaziina goona ag'ab'obushoboorozi, omu busingye obu n'omu buriija. 22Ruhanga akata ebintu byona ahansi y'ebigyere bya Kristo, yaamuhindura omutwe gwa byona eby'omu kigombe ky'abaikiriza. 23Ekyo kigombe ky'abaikiriza nigwo mubiri gwa Kristo, ogu Ruhanga ahikiiririzamu kimwe boona na byona.

will be added

X\