Colossians 4

1Naimwe abakama, muheereze abahuuku baanyu ebihikire omu bwinganisa, nimumanya naimwe ku mwine Mukama omu iguru. 2Mugumizemu omu kushaba, mutarikuhuga kandi nimusiima Ruhanga. 3Haza obwo naitwe mugume mutushabire, Ruhanga abone kutwiguriraho omuhanda gw'okurangirira Amakuru Marungi, n'okugamba eibanga rya Kristo eryantaisize omu kihome, 4ngu mbone kurishoboorora gye nk'oku kinshemereire. 5Abatakaikiriize mubatwarize gye n'obwengye, mutarikufiisa busha mugisha ogu mwine. 6Ebigambo byanyu bibe ebirikugwisa gye, ebirungirwemu omwonyo, mubone kumanya oku muraagarukyemu buri omwe. 7Tukiko naija kubagambira byona ebyambaireho. We n'omunyaruganda omukundwa, omuheereza omwesigwa, kandi omukozi mugyenzi wangye omuri Mukama. 8Eki naamubatumiraho, n'okwenda ngu mumanye oku turi kandi naimwe abagumye. 9Hamwe nawe naabatumaho Onesimo, mwene Taata omwesigwa, omukundwa, kandi ow'omu baanyu. Nibaija kubateekyerereza byona ebibaireho kunu. 10Arisitariko, embohe mugyenzi wangye, naabaramutsya; na Mariko mwihwa wa Barinaba, ou naabagambiireho ku araije, mumwakiire. 11Na Yesu oyetwa Yusito, naabaramutsya. Omu bakozi bagyenzi bangye ahabw'obukama bwa Ruhanga, abo nibo bonka ab'omu bashazirwe, haza bakampuumuza. 12Epafura ow'abaanyu, omuhuuku wa Kristo Yesu, naabaramutsya. Obutoosha ataho munonga omutima kubaijuka omu kushaba kwe, ngu mugume muhamire kandi nimwikiririza kimwe kuhitsya byona ebi Ruhanga akunda. 13Nimbahamiza ku abakoreire munonga, imwe n'Abalaodikeya, kandi n'ab'omuri Hierapoli. 14Luka omufumu omukundwa, na Deemasi nibabaramutsya. 15Mundamukize abanyaruganda abari Laodikeya. Mundamukize na Nunfa, hamwe n'ekigombe ky'abaikiriza eky'omu nju ye. 16Mbwenu ebaruha egi ku muraaheze kugishoma, mugitwekyere ab'ekigombe ky'abaikiriza aba Laodikeya, bagishome. Kandi naimwe mushome ebaruha eraarugye Laodikeya. 17Reero mugire Arukiipo muti: Oyezirikye kuhitsya obuheereza obu waakwatsiibwe omuri Mukama. 18Nyowe Paulo, niinye naahandiika endamutsyo egi n'omukono gwangye. Mugume mwijukye oku nkiri omu nkomo. Embabazi za Ruhanga zigume naimwe!

will be added

X\