Colossians 2

1Mbwenu niinyenda ku mumanya oku ndikubeekaniikira munonga, imwe n'Abalaodikeya, n'abandi boona abatakandeebaga. 2Ekyo ninkikora ngu emitima yaabo ebone kugumibwa, bakwatanisiize omuri rukundo, baheebwe obutungi bw'okwetegyerereza kimwe n'okumanya eibanga rya Ruhanga, niwe Kristo. 3Omuriwe obutungi bwona obw'obwengye n'okumanya nimwo bwetindikire. 4Ekyo naakigamba ngu hatakaagira owaababeihabeihesa ebigambo by'okweshwekyerera. 5Manya nobu ndaabe ntabaine omu mubiri, kwonka ndi hamwe naimwe omu mutima, ninshemererwa kureeba oku mutebeekaine gye, n'oku muhamiire omu kwikiriza Kristo. 6N'ahabw'ekyo nk'oku mwayakiire Kristo Yesu Mukama, mube nikwo mwaguma omuriwe, 7mutsimbire emizi kandi mwombekyeirwe omuriwe, muhamiire omu kwikiriza nk'oku mwayegyesiibwe, nimushaagaana omu kusiima. 8Mwerinde hatakaagira owaababeihabeihesa ebigambo by'obwengye, n'oburyarya butarimu nsha, naakuratira emigyenzo y'abantu, nari ebihangwagashani by'omu nsi, kutari kukuratira Kristo. 9Manya omuriwe, omu mubiri gwe, nimwo obwaruhanga bwona butuura. 10Naimwe mukatungira omuriwe amagara gaijwire, ahabw'okuba niwe mutwe gw'abategyeki boona n'ab'obushoboorozi. 11Kandi omuriwe mukasharwa okusharwa okutari kw'engaro, obu mwajuura omubiri gw'obuntu, nikwo kusharwa okwa Kristo. 12Mukaziikwa hamwe nawe omu kubatizibwa, oku mwazookyeiremu hamwe nawe ahabw'okwikiriza ebi Ruhanga owaamuzoire omu bafiire, akora. 13Naimwe abaabaire bafeeraire omu bibi, n'omu kutasharwa kw'omubiri gwanyu, Ruhanga akabahindura abahuriire hamwe nawe, yaaheza kutusaasira ebicumuro byaitu byona, 14n'okushushuraho ekihandiiko ekyabaire nikitwomesereza, n'eby'omu iteeka ebirikutwihuza. Ekyo kihandiiko akakiihaho, yaakibamba aha musharaba. 15Kandi ahari ogwo musharaba, Kristo niho yaayakiire abategyeki n'ab'obushoboorozi ebikwato, akabashungisa butunu naabeesingurira we wenka. 16N'ahabw'ekyo, hatarigira owaabacwera orubanja aha bikwatiraine n'ebyokurya n'ebyokunywa, nari ebikwatiraine n'ebiro by'amagyenyi, nainga okuboneka kw'okwezi nari Sabato. 17Ebyo byona n'ekinyimanyimi ky'ebiriija, kwonka ekintu nyakabara ni Kristo. 18Hataribaho abaabagira ngu timuhikire, ngu ahabw'okuba bo nibeecwendeeka kandi nibaramya baamaraika, nibeesiga eby'okworekwa, baine ebihagi bya busha, ebirikureetwa ebiteekateeko ky'obuntu. 19Abantu nk'abo baba batakihamira hari Mutwe, oriisa omubiri gwona, akagukwatanisisa engingo zaagwo n'emitsi yaagwo, gukakura nigunyeetsibwa Ruhanga. 20Ku muraabe mwafeeraire hamwe na Kristo aha bihangwagashani by'omu nsi, ahabw'enki nimutwaza nk'abakiri ab'ensi? Ahabw'enki nimworobera ebiragiro ebirikugira biti: 21Otakwataho! Otarozaho! Otakoraho! 22Haza ebyo byona biri ebihwaho nibikoresibwa, mukakuratira ebyaragiirwe abantu n'eby'enyegyesa yaabo! 23Manya ebyo omu mazima nooshusha oti n'eby'obwengye ahabw'okuteera abantu omuhimbo gw'okwehaayo, n'okwecwendeeka n'okusaasa omubiri, kwonka tibiine mugasho n'akakye omu kuzibira okwetenga kw'omubiri.

will be added

X\