Colossians 1

1Nyowe Paulo, ou Ruhanga yaasiimire kuba entumwa ya Kristo Yesu, hamwe na Timoteeho, omunyaruganda nitubaramutsya, 2imwe abarikwera, kandi beene waitu abeesigwa omuri Kristo abari Kolosai, nitubendeza emigisha n'obusingye ebikomooka ahari Ruhanga Tataitwe. 3Obutoosha ku tuba nitubashabira, tusiima Ruhanga Ishe wa Mukama waitu Yesu Kristo. 4Manya tukahurira oku murikwikiriza Kristo Yesu, n'oku murikukunda abarikwera boona. 5Haza ebyo byombi nimubireeterwa okugira amatsiko g'okutunga ebirungi ebibabiikiirwe omu iguru. Ago matsiko mukagahuriraho bwabiso omu kigambo ky'amazima, nigo Makuru Marungi. 6Ago Makuru Marungi nigareeta emigisha kandi nigabuga omu nsi yoona, nk'oku naimwe gaababeeraire gatyo, okwiha aha izooba eri mwahuririireho embabazi za Ruhanga, mukazeetegyereza omu mazima. 7Ebyo byona mukabyegyesibwa Epafura, omuheereza mugyenzi waitu omukundwa. Epafura ogwo n'omuheereza wa Kristo omwesigwa ahabwaitu, 8kandi niwe yaatugambiire ebya rukundo ei Mutima yaabatairemu. 9N'ahabw'ekyo, okwiha obu twakihurira, titukooshaga kubashabira. Nitweshengyereza ngu mubone kumanyira kimwe ebi Ruhanga akunda, mwine obwengye bwona, kandi nimwetegyerezesibwa Mutima. 10Nitubashabira kandi, ngu mugire emitwarize eshemereire Mukama, nimukora obutoosha ebirikumugwisa gye. Nibwo amagara gaanyu garibagasira nimukora eby'embabazi ebya ibara muringo, kandi nimweyongyera kumanya Ruhanga. 11Nitubatengyera okuhamibwa amaani ga Ruhanga goona nk'oku obushoboorozi bwe obw'ekitiinwa buri, ngu mubone kwemera byona n'okubigumisiriza mushemereirwe. 12Haza obwo nimusiima Taata owaabahindwire abashemereire kutunga omugabo hamwe n'abarikwera omu bukama bw'omushana. 13Manya niwe yaatuzaahwire omu kutegyekwa omwirima, akatutaasya omu bukama bw'Omwana we omukundwa, 14ou tutungiramu okucungurwa n'okusaasirwa ebibi. 15Yesu niwe kyeshusha kya Ruhanga otareebwa, omujigaijo gw'ebyahangirwe byona. 16Manya omuriwe ebintu byona nimwo byahangiirwe, eby'omu iguru n'eby'omu nsi, ebireebwa n'ebitareebwa, yaaba baamaraika b'aha bitebe by'obugabe, yaaba bategyeki, yaaba bakama nari ab'obushoboorozi. Ebintu byona Ruhanga akabihangira omuriwe kandi ahabwe. 17Niwe yaabaire ariho ebintu byona bitakabaireho; kandi omuriwe ebintu byona nimwo biteeranira. 18Niwe mutwe gw'omubiri, ekigombe ky'abaikiriza; niwe ntandikiro, omujigaijo gw'abaazookire omu bafiire, ngu abone kuba ow'okubanza omuri byona. 19Manya Ruhanga akasiima ngu obwaruhanga bwe bwona bube omuriwe, 20kandi ngu arabe omuriwe kwegarukanisiza ebintu byona, yaaba by'omu nsi nari eby'omu iguru; naareeta obusingye ahabw'eshagama ei yaaseesire aha musharaba gwe. 21Naimwe ira, mukaba mutaine na Ruhanga, kandi muri abazigu omu biteekateeko byanyu nimukora ebibi. 22Kwonka mbwenu Ruhanga abeegarukanisiize omu mubiri gw'Omwana we, n'omu kufa kwe, ngu abone kubamurika omu maisho ge muri abarikwera, abataine kamogo, kandi abataine ky'okuhaahuuzwa. 23Haza nikwo muriba mwaba mugumiizemu omu kwikiriza, muhamire kandi mutarikunyiganyiga, mutarikuruga ha matsiko g'Amakuru Marungi agu mwahuriire, agaarangiriirwe ebyahangirwe byona ebiri ahansi y'eiguru, agu naanye, Paulo, naahindukire omuheereza waago. 24Hati ninshemererwa ahabw'okubonabona ahabwanyu, haza obwo nimpikiiriza omu mubiri gwangye ebibaire nibiburaho omu kubonabonesibwa kwa Kristo ahabw'omubiri gwe, nikyo kigombe ky'abaikiriza. 25Ekyo kigombe nkahinduka omuheereza waakyo, nk'omurimo gwa Ruhanga ogu naahairwe ahabwanyu oku guri, ogw'okumanyisiza kimwe ekigambo kya Ruhanga. 26Ekyo kigambo, niryo ibanga eryasherekirwe okwiha ira ryona n'obusingye bwona, kwonka hati eryorekirwe abarikwera be, 27abu Ruhanga yaatooraine kworeka oku eibanga eryo riri ery'ekitiinwa munonga omu Banyamahanga. Kandi eryo ibanga ni Kristo omuriimwe, oba amatsiko g'okuheebwa ekitiinwa! 28Niwe turangirira nitwehanangiriza buri muntu weena, kandi nitwegyesa abantu obwengye bwona, ngu tubone kumurikira Ruhanga buri omwe yaaherize kuba ohamiire omuri Kristo. 29Ekyo nikyo ndikwehenengyera niinyekaniika n'engoga zoona, ezi arikukoresa omuriinye n'amaani.

will be added

X\