Acts 9

1Omu biro ebyo Saulo akaba naahayira abatendekwa ba Mukama kubaita. Yaaza ow'omuhongyerezi omukuru, 2yaamushaba amabaruha g'okutwarira ab'omu mateeraniro g'omuri Damasiko, ngu gamuhe obushoboorozi bw'okukwata n'okutwara Yerusalemu abarikukuratira Omuhanda gwa Mukama boona, yaaba bashaija nari abakazi, abu araashangyeyo. 3Ku yaabaire naaza Damasiko, ari haihi kuhika omuri ekyo kirorero, ahonaaho haija ekimurinkano, ekirikuruga omu iguru, kyamwehinguririza. 4Yaagwa ahansi, yaahurira eiraka eririkugira riti: Saulo, Saulo, nompiiganisiza ki? 5Nawe yaabuuza ati: Niiwe oha, Mukama wangye? Eiraka ryamugarukamu riti: Niinye Yesu ou orikuhiiganisa. 6Mbwenu imuka, oze omu kirorero, niyo oraagambirirwe eki oraakore. 7Abashaija abaabaire nibagyenda nawe baayemerera babuzirwe eky'okugamba, ahabw'okuba bakahurira eiraka, kwonka tibaareeba muntu n'omwe. 8Saulo yaimuka ahansi, haza ku yaabuurwire amaisho, tiyaahweza n'akakye; abantu nikwo kumukwatira ekihimbo, bakamutwara Damasiko. 9Akamara ebiro bishatu atarikuhweza, kandi atarikurya nobu kwakuba okunywa. 10Mbwenu hakaba hariho omutendekwa orikwetwa Ananiya, owaabaire atwire Damasiko. Omutendekwa ogwo akabonekyerwa, yaahurira Mukama naamweta ati: Ananiya. Onu ati: Ndi aha, Mukama wangye. 11Mukama yaamugira ati: Imuka, oze mu muhanda ogurikwetwa Ogugororokire, obuurize omu b'oruganda rwa Yuda, omuntu orikwetwa Saulo, orugire Taruso. Omuri aga magingo naashaba, 12kandi yaabonekyeirwe ku omuntu orikwetwa Ananiya arikwija kutaahamu, akamutaho engaro kumuhumuura. 13Ananiya amugarukamu ati: Mukama wangye, abantu baingi ka bangambiire eby'ogwo mushaija, n'oku abaire naakora kubi munonga abarikwera baawe omuri Yerusalemu. 14Na mbwenu aizire aha aine obushoboorozi obu ahairwe abahongyerezi abakuru, kuboha omuntu weena orikuhoogyera eiziina ryawe. 15Mukama yaamugarukamu ati: Nobu kiraabe kiri kityo, hoona ozeyo, ahabw'okuba omushaija ogwo niwe nyetooraniire ahabwa eiziina ryangye omu Banyamahanga, omu bagabe baabo n'omu bantu ba Isiraeli. 16Manya niinyija kumworeka oku ari ow'okubonabona ahabwangye. 17Mpaho Ananiya atyo agyenda, ataaha omu nju, ata engaro ahari Saulo, naagira ati: Munyaruganda Saulo, naatumwa Mukama Yesu okureebekyeire noija kunu, ngu ohumuukye, oijure Mutima Orikwera. 18Ahonaaho Saulo oshusha oti akabubi kaamukokooka aha maisho, mpaho ahumuuka, aimuka, abatizibwa. 19Ku aheza kurya, agarukwamu amaani. Saulo ku yaamazire ebiro bikye n'abatendekwa omuri Damasiko, 20yaatandika kwegyesa omu mateeraniro, ku Yesu ari Omwana wa Ruhanga. 21Boona abaamuhuriire baatangaara nibagira bati: Beitu ogu t'omushaija obaire naahiiganisiza omuri Yerusalemu abarikuhoogyera eryo iziina? Kandi ekimureetsire, t'okubakwata akabatwarira abahongyerezi abakuru bakomirwe? 22Saulo akongyera kutunga amaani, yaaremeseza kimwe Abayudaaya aba Damasiko, naahamya ku Yesu ari Kristo. 23Ku haahingwireho ebiro bingi, Abayudaaya baacuma enaama y'okumwita; 24haza egyo naama yaamanywa Saulo. Ahabw'okwenda kumwita, baaguma bamugwereire aha marembo nyomushana na nyekiro. 25Kwonka abakuratsi be baamutwara nyekiro, baamurengyeza aha kisiika nibamushuumiza omu kigagara. 26Saulo ku yaahikire Yerusalemu, yaateeraho kwehitsya abatendekwa, kwonka boona baamutiina, ahabw'okutaikiriza ngu nawe buzimazima n'omutendekwa. 27Barinaba nikwo kumutwarira entumwa, akabashoboororera oku Mukama yaabonekyeire Saulo ogwo, akagamba nawe ari omu rugyendo, kandi n'oku Saulo yaarangiriire n'obumanzi omu iziina rya Yesu omuri Damasiko. 28Okwiha obwo, Saulo yaatandika kugyenda nabo omuri Yerusalemu yoona 29naarangirira omu iziina rya Mukama atarikutiina. Mbwenu ku yaaherize kugamba n'Abayudaaya abarikugamba Oruguriiki n'okuhakana nabo, baamuhiiga kumwita. 30Abanyaruganda ku baakimanyire, baamutwara Kaisaariya, bwanyima baamwohereza Taruso. 31Ab'ekigombe ky'abaikiriza ab'omuri Buyudaaya yoona, Galilaaya na Samariya baatsigara baine obusingye, nibatiina Ruhanga omu mitwarize yaabo; reero ahabw'okuheebwa Mutima Orikwera, baakanya kandi baahama. 32Petero akagyenda naataayaayira abarikwera boona, yaahika n'omu batwire Luda. 33Okwo niyo yaashangire omushaija orikwetwa Aineya, owaabaire amazire emyaka munaana azingazingirwe, atarikuruga ha kitanda. 34Petero yaamugira ati: Aineya, Yesu Kristo yaakukiza; imuka oyeyarire. Ahonaaho yaimuka. 35Boona abaabaire batwire Luda na Sharooni baamureeba, baahinduka, baaba aba Mukama. 36Omuri Yopa hakaba hariyo omutendekwakazi orikwetwa Tabita, omu Ruguriiki niwe Dorika, owaabaire ateeganda kukora ebirungi n'okuhwera abanaku. 37Omu biro ebyo akarwara, yaafa. Baamwozya, baamuta omu kishengye eky'omuri kaanyinaabiri. 38Manya Luda teri hare na Yopa. N'ahabw'ekyo abatendekwa ku baahuriire ngu Petero niyo ari, baamutumaho abashaija babiri, nibamugira bati: Ija ahonaaho otuhikyeho. 39Petero nikwo kugyenda nabo. Ku yaahikireyo, baamutwara omuri kaanyinaabiri egyo, ei abafaakazi baamuturukire oku n'oku nibarira, nibamworeka ebiteeteyi n'ebindi bijwaro ebi Dorika yaabaziire akiri hamwe nabo. 40Petero yaababinga boona omu kishengye, yaatsimba amaju, yaashaba Ruhanga. Ku yaaherize, yaahindukira ogwo mukazi ofiire, yaamugira ati: Tabita, yemerera. Onu yaabuuruura amaisho, yaagata ahari Petero, yaashutama. 41Petero yaamukwata omukono, yamwemereza, bwanyima yaayeeta abaikiriza n'abafaakazi, yaamubooreka ahuriire. 42Aba Yopa boona baahurira egyo nkuru; baingi baikiriza Mukama. 43Petero yaamara ebiro omuri Yopa, naaraara omw'omuhazi w'empu orikwetwa Simooni.

will be added

X\