Acts 7

1Omuhongyerezi omukuru akabuuza Sitefano ati: N'eky'amazima, nikwo kiri? 2Onu yaagarukamu ati: Beene waitu na baataata, nimuhurire! Ruhanga ow'ekitiinwa akabonekyera tataitwe Aburahamu, akiri Mesopotamiya, atakatwire Harani, 3yaamugira ati: Ruga omu nsi yaanyu, n'omu b'oruganda rwanyu, oze mu nsi ei ndikworeka. 4Atyo yaaruga Kalidaaya, yaatuura Harani. Bwanyima ishe ku yaafiire, Ruhanga yaamwihayo, yaamureeta omu nsi egi ei mutwiremu obwa hati. 5Ruhanga taramuhaire nangwa n'ah'okuta ekigyere omuri egi nsi, ahu arikweta ahakwe ahabwe; kwonka akamuraganisa kugimuha, na bwanyima ebe ey'abaijukuru, nobu araabe yaabaire ari encwekye. 6Ebigambo ebi Ruhanga yaamugambiire naagamba nawe, nibigira ngu, abaijukuru baryazaahibwa omu rindi ihanga, ei baribeera abahuuku, bakamarayo emyaka magana ana nibahatwa. 7Kandi ati: Kwonka eihanga eiribahindura abahuuku ndyaricwera orubanja, bwanyima barugyeyo, bandamize omu mwanya ogu. 8Atyo Ruhanga yaakora na Aburahamu endagaano eyaahamiibwe omugyezo gw'okusharwa. Omutabani Isaaka ku yaazairwe, Aburahamu yaamushara aha kiro kya munaana. Isaaka nawe nikwo yaashazire Yakobo, na Yakobo akashara atyo baatataitwe ikumi na babiri. 9Baatataitwe abo bakagirira Yosefu eihari, baamuguza abaamutwaire Misiri kuba omuhuuku. Kwonka Ruhanga yaaguma nawe, 10yaamurabya omu busaasi bwe bwona, yaamuha obwengye obwamureeteire kushongoka ahari Faraaho omugabe wa Misiri. Faraaho akahindura Yosefu ogwo omutegyeki mukuru wa Misiri, yaamuha n'okureeberera ekikaari kye kyona. 11Bwanyima enjara ekateera Misiri yoona na Kanaani, yaazireetera omugango mwingi; baatataitwe baabura ekyokurya. 12Yakobo, ku yaahuriire ngu Misiri hariyo engano z'okushaka, yaayoherezayo baatataitwe omurundi gw'okubanza. 13Bwanyima aha murundi gwa kabiri, Yosefu yaayetondera bakuru be, kandi obuzaare bwe bwamanywa Faraaho. 14Mpaho Yosefu nikwo kutuma kureeta Yakobo ishe n'ab'oruganda rwe boona, abantu makumi mushanju na bataano; 15atyo Yakobo yaashuuma Misiri. We na baatataitwe ku baaherize kugwayo, 16emitumbi yaabo yaatwarwa Shekemu, yaaziikwa omu kituuro eki Aburahamu yaabaire aguzire ahari batabani ba Hamori omuri Shekemu. 17Obu obunaku bw'okuhikiiriza eki Ruhanga yaabaire araganiise Aburahamu bwabaire buri haihi kuhika, eihanga ryaitu rikaba ryakanyire munonga omuri Misiri, 18okuhitsya obu omugabe musya, owaabaire atarikumanya Yosefu, yaagiire aha ngoma omuri Misiri. 19Akeehindukiriza ab'eihanga ryaitu, akaita kubi baatataitwe, naabagyemesereza kunaga abeereere baabo, ngu batakaagumaho. 20Obwo nibwo Musa yaazaarwa, ari omwana murungi orikusiimwa Ruhanga. Akamara ameezi ashatu naarererwa omwa ishe; 21kandi ku baaherize kumunaga, muhara wa Faraaho yaamutwara, yaamworora nk'omwana we. 22Musa yaayegyesibwa atyo eby'obwengye bw'Abanyamisiri byona, yaaba omushaija w'amaani omu bi arikugamba n'omu bi arikukora. 23Musa ku yaahikize emyaka makumi ana y'obukuru, yaagira ekiteekateeko ky'okuza kureeba abantu b'eihanga rye Abaisiraeli. 24Ku yaareebire omwe omuribo naatwazibwa kubi, yaamurwanaho, yaamuhoorera, yaita Omunyamisiri. 25Akateekateeka ngu beene ishe nibaija kumanya ku niwe Ruhanga atumire kubaiha omu buhuuku, kwonka bo tibaakimanya. 26Eizooba eryakuratsireho, ku yaashangire bamwe omuribo nibarwana, yaateeraho kubagarukanisa, yaabagira ati: Bagyenzi bangye, ka muri eishe-emwe, ahabw'enki nimushaagizana? 27Kwonka omushaija owaabaire naashaagiza mugyenzi we, yaamwesha naagira ati: N'oha owaakutaireho kuba omutegyeki kandi omuramuzi waitu? 28Nooyenda kuunyita nk'oku oitsire Omunyamisiri nyomwabazyo? 29Musa ku yaakihuriire, yaahunga, yaaza kutuura omu nsi ya Midiyani, ei yaazaariire abatabani babiri. 30Ku haahingwireho emyaka makumi ana, maraika yaabonekyera Musa omu ndimi z'omuriro, ogwabaire nigwakira omu rushaka omu ihamba, haihi n'Orushozi Sinai. 31Musa ku akireeba, kimutangaaza. Ku airira haihi kukyetegyereza, ahurira eiraka rya Nyakubaho nirimugira riti: 32Niinye Ruhanga wa baashwenkuru, Ruhanga wa Aburahamu na Isaaka na Yakobo. Musa atetema, atiina kureebayo obundi. 33Nyakubaho amugira ati: Juura enkaito zaawe, ahabw'okuba omwanya ogu oyemereiremu n'ogurikwera. 34Buzimazima ndeebire oku abantu bangye barikwitwa kubi omuri Misiri, mpuriire entsinda yaabo; hati naija kubaiha omu buhuuku. Mbwenu ija, nkutume Misiri. 35Musa ori, ou baayangire obu baagira bati: N'oha owaakutaireho kuba omutegyeki kandi omuramuzi waitu, mbwenu niwe Ruhanga yaatuma kuba omwebembezi kandi omucunguzi, naahwerwa maraika owaamubonekyeire omu rushaka. 36Niwe Musa owaaherize kukora eby'okutangaaza n'obumanyiso omuri Misiri, akabaihayo naabarabya omu Nyanja Erikutukura n'omu ihamba, okumara emyaka makumi ana. 37Kandi Musa ogwo niwe yaagambiire Abaisiraeli ati: Ruhanga aryabaimukiza omurangi nkaanye, arugye omuri beene waanyu. 38Niwe ogwo owaabaire aine Abaisiraeli obu baateranira omu ihamba, hamwe na maraika owaamugambiriire aha Rushozi Sinai, kandi akagamba na baatataitwe. Niwe ogwo owaakwatsiibwe ebigambo by'amagara kubituha. 39Ogwo niwe baatataitwe baayangire kworobera, bakamwesha; omu mitima yaabo bakagaruka Misiri, 40nibagira Arooni bati: Tukorere baaruhanga, batwebembere, ahabw'okuba titurikumanya oku Musa, owaatwihire omuri Misiri, abaire. 41Batyo baaheesha ekimasha, baahongyera ekyo kishushani ebitambo, bashemerererwa ekyo kintu ki baayekoreire. 42Ruhanga nikwo kubatsigaho, akabareka, bakaramya amahe g'eby'omu iguru, nk'oku ebyahandiikirwe omu kitabo ky'abarangi birikugira ngu: Imwe b'enju ya Isiraeli 'mwe, nimugira ngu omu ihamba eri mwamaziremu emyaka makumi ana, niinye mwahongyeire ebihongwa, mukantambira n'ebitambo? 43Ngaaha, manya ebi mwaheekire aha mabega, n'eihema rya Moleki hamwe n'enyonyoozi y'emandwa Refani, ebyo bishushani ebi mwakozire kuramya. N'ahabw'ekyo ndyabazaasya, mbahinguze Babulooni. 44Baatataitwe obu baabaire bakiri omu ihamba, bakaba baine Eihema ry'Obutaaho bwa Ruhanga eryabaire rikozirwe nk'oku Ruhanga yaaragiire Musa, naamugambira kurikora naareebera aha rugyero oru yaamworekire. 45Eryo ihema baatataitwe bakaguma nibaritsigirana, okuhitsya obu Yoshua yaarihikize omu nsi ei twakubwire, tuginyagire amahanga agu Ruhanga yaabingiremu nitukihikamu. Ryaguma omwo okuhitsya omu busingye bwa Daudi, 46owaashongokire ahari Ruhanga, akamushaba kumwikiriza kumwombekyera Nyaruju ya Ruhanga wa Yakobo; 47Solomooni nobu araabe niwe yaayombekire egyo nju. 48Kwonka Rukiraboona we tatuura mu nju eyombekirwe emikono y'abantu, nk'oku Mukama yaagambiire omu murangi ati: 49Eiguru n'ekitebe kyangye ky'obugabe, n'ensi n'endibatiro yangye. Mbwenu ni nju ki ei mwakuunyombekyera? Ni mwanya ki ogu mwakumbonereza kuhuumuriramu? 50Ebyo byona tiinye naabikozire n'omukono gwangye? 51Imwe ntahurira 'mwe, ab'emitima egangaire n'amatu gaigaire nk'ag'Abanyamahanga, obutoosha mwangira Mutima Orikwera nka baatataitwe oku baabaire bagira. 52Harabaireho omurangi n'omwe ou baatataitwe batarahiiganiise? Omu biro byahingwire bakaita entumwa za Ruhanga ezaarangire eby'okwija kw'Orikwera we Ohikiriire, ou imwe mwareebize mukaita, 53imwe, abaahairwe eiteeka murireeteirwe baamaraika, haza mukanga kuryorobera. 54Ab'eishengyero ku baahuriire ebyo, ekiniga kyabacwa amaraka, baanenera Sitefano amaino. 55Na Sitefano ogwo aijwire Mutima Orikwera yaaranzya omu iguru, yaareeba Ruhanga ow'ekitiinwa, na Yesu amwemereire aha rubaju rwa buryo. 56Yaagira ati: Nindeeba eiguru rishuuruukire, n'Omwana w'omuntu ayemereire aha rubaju rwa Ruhanga orwa buryo. 57Boona ku baahuriire ekyo, baayogoorekana, baayekwata aha matu, baamweshukaho, 58baamushohoza aheeru y'orurembo, baamuteera amabaare. Baamushinja be baanaga emyenda yaabo aha bigyere by'omutsigazi orikwetwa Saulo. 59Ku baabaire nibateera Sitefano amabaare, yaahooga ati: Ai Mukama Yesu, yakiira amagara gangye. 60Atyo yaatsimba amaju, yaagamba n'eiraka rihango ati: Ai Mukama, otabatura ekibi eki. Ku yaaherize kugamba ekyo, yaakaba. Na Saulo yaasiima okwitwa kwe.

will be added

X\