Acts 6

1Omu bunaku obwo, omubaro gw'abaikiriza ku gwagyenzire nigukanya, Abayudaaya abarikugamba Oruguriiki baayetomboitera Abayudaaya abrikugamba Oruheburaayo omu by'okugabura okwa buri izooba, ahabw'okuba abafaakazi baabo bakaba batarikwetwaho. 2N'ahabw'ekyo eikumi na babiri baayeta abaikiriza boona kuteerana, baabagambira bati: Tikihikire itwe okureka kurangirira ekigambo kya Ruhanga, tukahugira aha kugabura ebyokurya. 3Mbwenu, imwe beene waitu, mwetooranemu abantu mushanju abarikusiimwa, abaijwire Mutima n'obwengye, tubakwatse omurimo ogu. 4Reero itwe nitwija kwemarira aha kushaba n'okwegyesa ekigambo kya Ruhanga. 5Abaateeraine boona baasiima ekyo kigambo, baatoorana Sitefano, omuntu oine okwikiriza kwingi kandi oijwire Mutima Orikwera, na Filipo, Porookoro, Nikanoori, Timooni, Parimena, na Nikola owa Antiokiya, owaahindukire akataaha omu diini y'Ekiyudaaya. 6Baabareeta omu maisho g'entumwa, zaabashabira, zaabataho engaro. 7Ekigambo kya Ruhanga kyayeyongyera kubuga; omubaro gw'abaikiriza gwakanya munonga omuri Yerusalemu, n'abahongyerezi baingi munonga baikiriza kukuratira enyikiriza egyo. 8Sitefano, ou Ruhanga yaahaire emigisha mingi n'amaani, akatandika kukora eby'okutangaaza n'obumanyiso bikuru omu bantu. 9Reero abantu baija baahakanisa Sitefano ogwo; abamwe nibaruga omu iteeraniro eririkwetwa ery'Abaarekwirwe n'ab'ery'Abakureene n'ab'ery'Abaalekisanderiya n'abandi abaarugire Kilikiya na Asiya. 10Kwonka tibarabaasize kumusinga, ahabw'okuba akaba aine obwengye kandi na Mutima amuhaire eby'okugamba. 11Batyo baaguriirira ab'okumubeiherera bati: Tukahurira naagamba eby'okurogota ahari Musa n'ahari Ruhanga. 12Ku baaherize kuteerana abantu hamwe n'abakuru omu ihanga n'abahangu b'eiteeka, baamugwaho kigurukano, baamukwata, baamutwara omu maisho g'eishengyero. 13Okwo niyo baareeteire baamushinja b'ebishuba, abaagizire bati: Ogu mushaija tayosha kugamba kubi aha mwanya ogurikwera n'aha iteeka ryaitu. 14Tukamuhurira naagira ngu Yesu owa Nazareeti naija kucwekyereza omwanya ogu, n'okuhindura emigyenzo ei Musa yaatutsigiire. 15Boona ab'omu ishengyero baahanga Sitefano amaisho, kandi ahamaisho ge haashusha nk'ahamaisho ga maraika.

will be added

X\