Acts 5

1Mbwenu hakaba hariho omushaija orikwetwa Ananiya. We n'omukazi we Safiira baikirizana kutunda aha bintu byabo. 2Kwonka Ananiya ogwo yaatsigaza ekicweka ky'empiiha ezaarugiremu, omukazi we naakimanya; yaareeta ezaatsigaireho, yaazimurikira entumwa. 3Petero nikwo kumugira ati: Ananiya, Sitaane akwitsire ata omutima kubeiha Mutima Orikwera, okatsigaza ekicweka ky'empiiha z'ekibanja? 4Obu obaire okikiine, kibaire kitari ekyawe? Kandi ku oherize kukitunda, empiiha zibaire zitari ezaawe kuzikoresa eki orikwenda? Ekiteekateeko eki kikurugiire hi? Tiwaabeiha bantu, kureka waabeiha Ruhanga. 5Ananiya ku yaahuriire ebigambo ebyo, yaayetuura ahansi, yaakinuka. Ekyo kyatiinisa munonga boona abaakihuriire. 6Abatsigazi baimuka, bazinga omutumbi gwe omu mwenda, baagushohoza, baaguziika. 7Ku haahingwireho eshaaha nka ishatu, omukazi we yaija atarikumanya kyabaho. 8Petero amwomesereza, naamugira ati: Ngambira, ogu nigwo mubaro gw'empiiha zi mwaiha omu kibanja? Onu amugarukamu ati: Eego, nigwo ogwo. 9Petero nikwo kumugira ati: Ahabw'enki iwe na baro mwikirizaine kugyeza Mutima wa Mukama? Ekibakoreise ekyo ni ki? Ohuriire egyo mitsindo? Abo n'abaaruga kuziika baro; mbwenu naiwe baaza kukushohoza. 10Ahonaaho ogwo mukazi yaayetuura aha bigyere bya Petero, yaakinuka. Abatsigazi abo ku baataahiremu, baashanga yaafiire; baamushohoza aheeru, nawe baamuziika aha rubaju rwa iba. 11Ekyo kyatiinisa munonga ekigombe ky'abaikiriza n'abandi boona abaakihuriire. 12Obumanyiso n'eby'okutangaaza bingi bikaba bikorwa entumwa omu bantu. Abaikiriza boona bakaba bateeranira omu kisasi kya Solomooni n'omutima gumwe. 13Hakaba hatabaho n'omwe otari w'abaabo owaabaire ayehanga kuteerana nabo, nobu abantu baabaire babasiima munonga. 14Kandi omubaro gw'abashaija n'abakazi abaikiriize Mukama gukaguma nigukanya; 15n'okutwara baatwara abarwaire baabo, baabarambika omu nguuto aha bitanda n'omu butanda, ngu abamwe aharibo bakaahikwaho ekinyimanyimi kya Petero, yaaba naahingura. 16Kandi abantu bakaba bahimintika, nibaruga omu birorero ebihereereire Yerusalemu, bareetsire abarwaire baabo n'abarikwitwa kubi ebyago, haza boona bakira. 17Bwanyima omuhongyerezi omukuru hamwe n'ab'omu kigombe ky'Abasadukaayo abu yaabaire aine, baimuka ahabw'eihari, 18baakwata entumwa, baazita omu kihome ekya boona. 19Kwonka nyekiro maraika wa Nyakubaho yaigura enyigi z'ekyo kihome; kandi ku yaabaire naabashohoza, yaabagira ati: 20Mugyende, mwemerere omuri Nyaruju, mugambire abantu ebigambo byona eby'amagara masya. 21Batyo baakora nk'oku baagambiirwe, baaza omuri Nyaruju nibwaba, baatandika kwegyesa. Omuhongyerezi omukuru ku yaizire, we n'abarikumukwatsa baayeta eishengyero erikuru ryona erya Isiraeli; baatuma aha barinzi b'ekihome kubareetera ezo ntumwa. 22Kwonka abakungu abaatumirwe ku baahikire omu kihome, baashanga batarimu, batyo baagarukayo, baabiteekyerereza abaabatumire bati: 23Twashanga ekihome kikingiire kimwe, n'abarinzi bari aha miryango; kwonka ku twakomoorora orwigi, twashanga hatarimu muntu n'omwe. 24Omukuru w'abarinzi ba Nyaruju hamwe n'abahongyerezi abakuru ku baahuriire egyo nkuru, baatangaara batarikumanya oku abo bantu baabaire n'ekiraarugyemu. 25Bwanyima haija omuntu, yaabareetera amakuru, naagira ati: Abashaija bu mutaire omu kihome, obwa hati beemereire omuri Nyaruju nibeegyesa abantu. 26Ogwo mukuru w'abarinzi ba Nyaruju nikwo kugyenda n'abashaija be akareeta ezo ntumwa. Kwonka baatiina kubakwatisa amaani, ngu abantu batakaabateera amabaare. 27Ku baabareetsire omu maisho g'eishengyero, omuhongyerezi omukuru yaababuuza, 28ati: Titurabeehanangiriize kutashubira kwegyesa omu iziina ry'ogwo muntu? Mbwenu eki, mukozire ki? Yerusalemu mugibugize enyegyesa yaanyu kandi nimureebeka mumaririire kuba niitwe mwataho orubanja rw'okufa kw'ori muntu. 29Petero n'ezindi ntumwa nabo baamugarukamu bati: Manya itwe tushemereire kworobera Ruhanga okukira okworobera abantu. 30Ruhanga wa baatatenkuriitwe niwe yaazoire Yesu ogwo, ou mwaitsire mumuhanikire aha muti. 31Mbwenu Ruhanga akamutunguura, yaamuta aha rubaju rwe rwa buryo kuba Omwebembezi kandi Omujuni, ngu abone kuhaisa Abaisiraeli okweteisa n'okusaasirwa ebibi. 32Itwe turi baakareebi b'ebyo byona hamwe na Mutima Orikwera ou Ruhanga yaahaire abarikumworobera. 33Ku baahuriire ebyo, ekiniga kyabacwa amaraka, baayenda kubaita. 34Kwonka omwe aha b'eishengyero, Omufarisaayo orikwetwa Gamalieli, omwegyesa w'eiteeka kandi orikusiimwa abantu boona, akeemerera, yaashaba ku baba bashohoize abo bashaija aheeru. 35Bwanyima yaagambira ab'eishengyero ati: Imwe bashaija ba Isiraeli 'mwe, mwerinde oku muraatwaze aba bantu. 36Omu biro byahingwire, hakaba hariho Teuda owaabaire mubi rurangaanwa, akeehindura mukuru, abantu nka magana ana baamukuratira. Kwonka ku yaitsirwe, abaabaire nibamukuratira baataataana, ebyabo byagarukira aho. 37Kandi hoona, omu biro by'orubaro, hakaba hariho Yuda Omunyagalilaaya, owaayetungiire abantu baingi b'okumukwatsa. Kwonka nawe akaitwa, abakuratsi be boona baataataana. 38Mbwenu obwengye bu ndikubaha, n'okubareka bakagyenda. Enaama yaabo egi n'omurimo gwabo ku biraabe birugire omu bantu, nibiija kuhwaho byonka. 39Kwonka ku biraabe birugire ahari Ruhanga, timurikwija kubaasa kubizibira, kureka nimwija kweshanga nimurwanisa Ruhanga. 40Obwengye bu yaabahaire baabusiima, baagaruka baayeta ezo ntumwa, baaragiira kubaasha, baabeehanangiriza kutagarukira kugamba omu iziina rya Yesu, bwanyima baabarekura. 41Batyo baaruga omu maisho g'eishengyero, nibeesiima ahabw'okuhiirwa bakahemurwa nibaturwa eryo iziina. 42Baaguma nibeegyesa kandi nibarangirira buri izooba omuri Nyaruju n'omu maju g'abantu eby'Amakuru Marungi ga Yesu Kristo.

will be added

X\