Acts 4

1Petero na Yohaana ku baabaire nibakigamba n'abantu, baayecura abahongyerezi baine omukuru w'abarinzi ba Nyaruju hamwe n'Abasadukaayo. 2Abo bakagwisibwa kubi okuhurira entumwa ezo zombi nizeegyesa abantu, kandi nizibarangirira ku okuzooka kw'abafiire kubonekyeire omuri Yesu. 3Batyo baabakwata, baabarindira omu kihome okuhitsya omu kasheeshe, ahabw'okuba bukaba bwabaire omwabazyo. 4Kwonka baingi omu baahuriire obutumwa bwabo, bakaikiriza; omubaro gwona ogw'abaikiriza gwayeyongyera, gwahika nk'enkumi itaano. 5Aha izooba eryakuratsireho, abategyeki, abakuru b'enganda, n'abahangu b'eiteeka bakateeranira omuri Yerusalemu, 6hamwe na Anasi omuhongyerezi omukuru, Kayaafa, Yohaana, Alekisandero, na boona ab'omuryango gw'abahongyerezi abakuru. 7Baayemereza ezo ntumwa omu maisho gaabo, baatandika kubabuuza bati: Imwe bashaija 'mwe, ni bushoboorozi ki obubakoreise eki, kandi mukikozire omu iziina ry'oha? 8Petero aijwire Mutima Orikwera nikwo kubagambira ati: Imwe bategyeki b'abantu n'abakuru b'enganda 'mwe, 9eri izooba ku muraabe nimutubuuza ekitukoreise eky'embabazi aha kirema n'oku kikiziibwe, 10mbwenu, imwe mwena hamwe n'abantu ba Isiraeli boona, mumanye eki: eiziina rya Yesu Kristo owa Nazareeti, ou mwabambire aha musharaba, Ruhanga akamuzoora omu bafiire, eiziina rye eryo niryo rikirize ogu muntu oyemereire omu maisho gaanyu. 11Yesu ogwo niwe ibaare eri imwe abombeki mwayangire, rikahinduka obuhamizo bw'enju. 12Kandi tihariho ndiijo u twakutungiramu okujunwa, ahabw'okuba omu maziina goona ageetwa abantu omu nsi, tihariho rindi iziina eri turi ab'okujunirwamu. 13Ab'eishengyero ku baareebire obumanzi bwa Petero na Yohaana, haza nibabamanya ku bari abantu b'obutoosha abateegyesiibwe, baatangaara, kandi baabamanya ku baabaire batuura na Yesu. 14Kwonka ku baareebire omuntu okiziibwe abeemereire aha rubaju, baaburwa eki baraabatabaarize. 15Nikwo kubaragiira kwemerera aheeru y'eishengyero, bo bakaguma nibahanuura bonka na bonka, 16nibabuuzana bati: Mbwenu aba bantu tubagire tuta? Ahabw'okuba akamanyiso akarikutangaaza kakozirwe abo bantu omu maisho g'ab'omuri Yerusalemu boona, ensi yoona neereeba, kandi titurikubaasa kukeehakana. 17Kwonka ahabw'okwenda kubazibira kwongyera kubuzya ekyo kintu omu bantu, ka tubateise, barekyere aho kugambira omuntu weena omuri eryo iziina. 18Batyo baabeeta, baabeehanangiriza kutagaruka kugamba bundi, nari kwegyesa omu iziina rya Yesu. 19Kwonka Petero na Yohaana baabagarukamu bati: Naimwe mukireebe ku kiraabe kihikire omu maisho ga Ruhanga, okubahurira imwe okukira okuhurira Ruhanga. 20Titurikubaasa kutagamba ebi twareebire n'ebi twahuriire. 21Eishengyero ryagaruka ryabeehanangiriza, bwanyima ryabarekura. Manya tibarareebire buryo bw'okubahaisa ekifubiro, ahabw'okuba abantu boona bakaba nibahimbisa Ruhanga ahabw'ekibaireho. 22Ahabw'okuba ogwo muntu owaakoreirweho aka kamanyiso k'okukizibwa, akaba arengize emyaka makumi ana y'obukuru. 23Petero na Yohaana ku baaherize bati kurekurwa, baaza omu b'ekigombe kyabo, baabateekyerereza byona ebi abahongyerezi abakuru n'abakuru omu ihanga babagambiire. 24Ku baabihuriire, boona hamwe baimukiza Ruhanga eiraka nibamushaba bati: Nyakusinga, niiwe waahangire eiguru n'ensi n'amayanja na byona ebirimu. 25Niiwe waagambiire omuri Mutima Orikwera, okagambisa tataitwe Daudi omuheereza waawe, oti: Beitu n'enki ekireeteire amahanga kwimukiirira, n'abantu kuza omu naama zitaine muhoho? 26Abagabe b'ensi nibatenga orugamba, n'abategyeki nibacuma enaama y'okurwanisa Nyakubaho n'omusiigwa we. 27N'ekya buzima, omuri oru rurembo Herode na Pontio Pilaato bakakwatanisa n'Abanyamahanga n'abantu ba Isiraeli, kurwanisa omuheereza waawe Ohikiriire Yesu ou waasiigire, 28obwo nibahikiiriza eki waamaririire ira omu maani gaawe n'omu bwengye bwawe ngu kibeho. 29Mbwenu Mukama, reeba okukangisa kwabo, ohwere abaheereza baawe, bagambe ekigambo kyawe n'obumanzi bwingi. 30Gorora omukono gwawe okize, kandi oikirize obumanyiso n'eby'okutangaaza bikorwe omu iziina ry'omuheereza waawe Ohikiriire Yesu. 31Ku baaherize kushaba, omwanya ogu baabaire bateeraniiremu gwatengyeeta; boona baijura Mutima Orikwera, baatandika kugamba ekigambo kya Ruhanga n'obumanzi. 32Ekigombe kyona eky'abaikiriza kikaguma kikwataniise n'omutima gumwe. Tihariho owaabaire agira obunyakantu aha bi atungire, ahabw'okuba byona ebi baabaire batungire bikaba biri ebyabo boona hamwe. 33Entumwa zaagumizamu n'amaani maingi nizigamba eby'okuzooka omu bafiire kwa Mukama Yesu, kandi zoona zaaguma nizisiimwa munonga. 34Tihariho n'omwe omuribo owaabaire agira eki akyenire. Manya abaabaire baine ebibanja nari amaju, bakaba babitunda, batwara empiiha ezaabirugamu, 35bazimurikira entumwa; reero zibaganisibwa, ziheebwa buri omwe nk'okwetenga kwe oku kwabaire kuri. 36Hakaba hariho Omuleevi, enzaarwa ya Kupuro orikwetwa Yosefu, ou entumwa zaakubize Barinaba (amakuru gaaryo ngu Kiteeramuhimbo). 37Akaba aine ekibanja, yaakitunda, yaareeta empiiha zaakyo yaazimurikira entumwa.

will be added

X\