Acts 28

1Ku twaherize kuhika aha nkungu buhooro, twamanya ku ekyo kirwa kirikwetwa Malita. 2Abatuuzi baayo baatukunira okutakareebwaga. Baatwakiira n'okushemererwa kwingi, kandi ahabw'enjura eyaabaire yaatandikire kugwa, n'obunaku buri obw'embeho, baatuhembera omuriro. 3Paulo ku yaarundaine omuganda gw'enku, yaazita, aha muriro, haatimbiramu empiri neehunga ekibiga ky'omuriro, yaamuramata aha ngaro. 4Enzaarwa z'egyo nsi ku baareebire ekyo kikooko nikimureereetera aha ngaro, baagambirana bati: Ogu muntu buzima n'omwitsi w'abantu. Akizire enyanja; buhitsya ya Ruhanga terikumureka akagumaho. 5Kwonka we ekyo kikooko yaakikunkumurira omu muriro atabaireho kabi, 6nobu abantu baateekateekire ngu naija kuzimba juba, nari shi agwe aho afeereho. Ku baaherize kutegyereza omwanya muhango, baareeba ataabaho kabi, baatandika kuteekateeka okundi, nibagira bati: Ogu ni ruhanga? 7Haihi n'aho hakaba hariho mahiro y'omukungu w'ekyo kirwa orikwetwa Pubulio. Yaatwakiira, yaatukunira munonga okumara ebiro bishatu. 8Omu bunaku obwo ishe wa Pubulio akaba arambiire arwaire omushwija n'esheshe. Paulo yaazayo kumureeba, yaashaba Ruhanga, yaamutaho engaro, yaamukiza. 9Ekyo ku kyabaireho, abandi barwaire b'ahari ekyo kirwa nabo baija, baatambirwa. 10Abaayo bakatuha ekitiinwa kingi; kandi ku twagiire kuza omu bwato, baatamu eby'entanda byona ebi twabaire nitwetenga. 11Ku haahwaireho ameezi ashatu, twatoora ogw'enyanja turi omu meeri eriho akashushani k'Empasha, eyaabaire erugire Alekisanderiya, ehungiire ebiro by'embeho aha kirwa. 12Twahika Surakuusa, twamarayo kashatu. 13Twarugayo, twagyenda nitwekiikuura, twahika Reegio. Ku twabaire twateerayo ekiro kimwe, haija omuyaga gw'Obukiizi-bwa-buryo; aha kiro kya kabiri twahika Puteoli, 14ei twashangire abanyaruganda, bakatushaba kumara nabo ebiro mushanju, bwanyima tukeegaranjura Rooma. 15Abanyaruganda ku baahuriire ngu twahikayo, baija baatubuganira aha Kajagiro ka Api n'aha Maju Ashatu g'Okucumbikamu. Paulo ku yaabareebire, yaasiima Ruhanga, omutima gwamugaruka omunda. 16Ku twahikire omuri Rooma, Paulo yaikirizibwa kweraaza, aine omuserukare orikumurinda. 17Ku haahingwireho ebiro bishatu, Paulo yaayeta Abayudaaya ba Rooma abakuru kuteerana. Ku baateeraine, yaabagira ati: Beene waitu, nobu ndaabe ntaine ki naashobeize abantu, nari okushiisha emicwe ya baatatenkuriitwe, kwonka nkakwatirwa omuri Yerusalemu, naateebwa omu mikono y'Abarooma. 18Ku bantonganiise, baashanga ntaine rubanja rw'okuunyitisa, baayenda kundekura. 19Kwonka Abayudaaya baayanga, naanye nikwo kujurira ahari Kaisaari, ntaine ki ndikwenda kutabaariza ab'eihanga ryangye. 20Mbwenu nikyo naashabira kubareeba n'okugamba naimwe; ahabw'okuba eki Isiraeli etuura etegyereize, nikyo kinteisize omuri ezi njegyere. 21Nabo baamugarukamu bati: Itwe titukatungaga baruha zirikuruga Buyudaaya ezirikukugambaho, nobu yaakuba omuntu w'owaanyu orahikire aha kutugambira enkuru mbi ahariiwe, nari kukutebyaho kubi. 22Mbwenu tukaayenzire ku oba niiwe waatugambira ebyawe oku byemi. Itwe eki turikumanya aha kigombe eki, n'eki abantu barikugambaho kubi hoonahoona. 23Mpaho Abayudaaya baaragaana na Paulo erindi izooba; kandi baija baingi ahari eryo izooba omu nju ei yaabaire acumbikiremu. Yaabashoboororera ebye, naabahamiza eby'obukama bwa Ruhanga kandi naateeraho okubaikirizisa Yesu, obwo naajuriza eby'eiteeka rya Musa n'ebyahandiikirwe abarangi. Ebyo akabibagambira okwiha omu kasheeshe okuhitsya omu mwabazyo. 24Abamwe baabiikiriza, kwonka abandi baabyanga. 25Batyo tibaikirizana. Reero ku baabaire nibaimuka kugyenda, Paulo yaabagambira eky'aha muheru ati: Mutima Orikwera ka yaagambire gye, obu yaagambira baashwenkuriimwe naakirabya omu murangi Isaaya, ati: 26Irooko, oze omuri eryo ihanga, origambire oti: Okuhurira kwo muryahurira, kwonka timurishoboorokyerwa. Okureeba kwo muryareeba, kwonka timuryetegyereza. 27Ahabw'okuba emitima y'ab'eihanga eri ebaire ebitsire, amatu gaabo nigahurira kubi, n'amaisho gaabo bagahumiize, ngu batakaareebesa ago maisho gaabo, bakahuriza amatu gaabo, bakeetegyerezesa emitima yaabo, bakampindukira, nkabakiza. 28Paulo ayongyera abagira ati: Mbwenu mukimanye ku obutumwa bw'okujuna kwa Ruhanga bwoherereziibwe Abanyamahanga kandi nibaija kubuhurira. 29[Ku yaaherize kugamba ebyo, abo Bayudaaya baamurugaho nibahakana munonga bonka na bonka.] 30Paulo akamara emyaka ebiri yoona omu nju ei yaabaire apangiise. Yaaguma naayakiira boona abaabaire baija kumutaayaayira, 31naabarangirira eby'obukama bwa Ruhanga, kandi naayegyesa ebya Mukama Yesu Kristo ataine keekyengo, kandi hatariho muntu n'omwe orikumuzibira.

will be added

X\