Acts 27

1Ku kyaherize kuhamibwa ngu tutoore ogw'enyanja kuza Italiya, Paulo n'embohe ezindi baabakwatsa omukuru w'abaserukare orikwetwa Yulio, ow'omu ihe rya Rubambansi. 2Twatemba emeeri eya Aduramuito, eyaabaire neeza kuraba aha nyambukiro z'omwegyeego gwa Asiya, twatoora ogw'enyanja, obwo twine Arisitariko, Omunyamakedoniya owa Tesalonika. 3Eizooba eryakuratsireho, twahika Sidoni; okwo Yulio yaagirira Paulo embabazi, yaamwikiriza kwegaba omuri banywani be kuruhuukirayo. 4Ku twarugire okwo, twagaruka twaza omu nyanja, kandi ahabw'omuyaga kutureetwa omu maisho, twagyenda nitwekiikuura ekirwa kya Kupuro, 5twacwekanisiza enyanja ahari Kilikiya na Panfuliya, twahika Muura ey'omuri Lukiya. 6Okwo niyo omukuru w'abaserukare igana yaashangire emeeri erikuruga Alekisanderiya neeza Italiya, akagitutamu. 7Tukamara ebiro nitugumizamu mpora, okuhitsya obu twahikire haihi na Kuniido twakabire. Ahabw'omuyaga kutatwikiriza kuhikayo, twatoora ogurikwekiikuura ekirwa kya Kureete, haihi n'enkokora ya Salumoone. 8Twaitanisa nitwekiikuura, okuhitsya obu twahikire omwanya gurikwetwa Nyambukiro-nungi, haihi n'ekirorero Lasaya. 9Ebiro bingi ku byahingwireho, orugyendo rw'omu nyanja rwaba orw'akabi. Ebiro by'okwesiibyakwo byashangwa byahingwire. Paulo nikwo kubahabura, 10ati: Bakama bangye, oku ndikureeba orugyendo oru nirwija kuba orw'akabi, ti kusiisikarirwa bintu na meeri byonka, kureka n'okufeerwa amagara gaitu. 11Kwonka omukuru w'abaserukare igana yaata omutima aha by'omukuru w'abavugi b'emeeri na mukama waayo, okukira okuguta aha bi Paulo yaagambire. 12Kandi ahabw'enyambukiro egyo kutaba nungi kumariramu ebiro by'embeho, abaingi baasiima kugumizamu, ngu ebyo biro babimarire Foinikiya, enyambukiro ya Kureete erikureeba orubaju rwa buryo n'orwa bumosho eza burengyerwa-izooba. 13Akayaga karikuheheeza ku kaahuuhire nikaiha omu bukiizi-bwa-buryo, baateekateeka ngu eki baaba nibenda kyaba kwo, baatsibura emeeri, yaatandika kugyenda neeraba aha rubaju rwa Kureete haihi n'enkungu. 14Kwonka ku haabaire hatakahingwireho mwanya muhango, baateerwa omuyaga gw'amaani maingi, ogwetwa ogwa bukiizi-bwa-bumosho bwa burugwa-izooba, ogwaizire nigucwekanisa ekirwa. 15Emeeri yaaremwa kugyema ei gwabaire nigureetwa. Naitwe nikwo kugureka gukaba nigwo gwatutwara. 16Twayekiika omu mwegyeego gw'akarwa kakye akarikwetwa Kauda, bwanyima twabona kuhamiza akaato aha meeri twaherize kufa kubi munonga; 17baakatembya aha meeri, baakagikomeraho n'emirunga y'ebyoma nibagigyehinguririza. Kandi ku baatiinire kushaayira omu musheenyi gw'enkungu za Suriti, batsibura emeeri ngu batwarwe omuyaga. 18Ku twacurangiibwe munonga omuyaga, aha izooba eryakuratsireho baatandika kunaga esika omu nyanja. 19Kandi aha izooba rya kashatu, baatambika n'emikono yaabo ebirikugyendesa emeeri. 20Ku twamazire ebiro bingi tutarikureeba izooba, nobu zaakuba enyonyoozi, kandi n'eihunga ritatuurize, twahwera kimwe amatsiko g'okukira. 21Ku haahingwireho ebiro bingi bataine ki barikurya, Paulo yaabeemerera ahagati, yaabagira ati: Bagyenzi bangye, kuri mwampuriire, mukareka kuruga Kureete mukaakizire okusiisikarirwa oku kwona hamwe n'okufeerwa ebintu. 22Kwonka mbwenu nimbeehanangiriza, murekye kwehwa amatsiko. Tihariho orikwija kufa omuriimwe, kureka emeeri yonka. 23Manya eki kiro maraika wa Ruhanga, ou ndi owe kandi ou ndamya, anyemereire aha rubaju, 24yangira ati: Paulo, otatiina; ori ow'okwemerera omu maisho ga Kaisaari, kandi ahabwawe Ruhanga naija kurinda boona abari naiwe omu bwato, bakire. 25Reero nu, bagyenzi bangye, mugume. Niinyesiga Ruhanga, buzimazima ebintu nibiija kuba nk'oku mmanyisiibwe; 26kwonka nitwija kugira ekirwa ki twanagwaho. 27Aha kiro kya ikumi na bina, ku twabaire turi omu nyanja Aduriya nitucurangibwa omuyaga, nk'omu itumbi, abarimbi baakyenga ku hariho ensi ei bari haihi kuhikaho. 28Baagyera oburaingwa bw'amaizi obw'okuzimu, bwaba ebigyere igana na makumi abiri kandi ku baagyenzireho akaanya, baagaruka baagyera, baashanga buri makumi mwenda. 29Kwonka ahabw'okutiina ngu tutakaayehonda aha rukiri, baatambika ahansi ebitsibo bina, nibeema aha isinga ry'enyima, baahumbya ngu busheeshe. 30Abarimbi bamwe ku baateireho kucwa omu meeri, bashuumya obwato omu nyanja nk'abarikutambika ebitsibo aha isinga ryayo ery'omu maisho. 31Paulo yaagira omukuru w'abaserukare igana n'abaserukare be, ati: Aba bantu ku baraabe batagumire mu meeri, timuri b'okukira. 32Abaserukare nikwo kushara emirunga y'obwato, bakabureka bukagyenda. 33Ku bwabaire buri haihi kutaagurukana, Paulo yaabeehanangiriza boona kugira eki baarya, yaabagira ati: Hati mwahitsya ebiro ikumi na bina mushobeirwe, mwemereize omutima, mwitsirwe enjara, mutaine ki murikurya. 34Mbwenu nimbeehanangiriza mugire eki mwarya; nikyo kiraabahe amaani, kandi tiharikwija kugira kashokye na kamwe akaraabure aha mitwe yaanyu mwena. 35Ku yaaherize kugamba ebyo, yaakwata omugaati, yaasiimira Ruhanga omu maisho gaabo boona, yaagucwamu, yaatandika kurya. 36Boona baagarukwa omutima omunda, baarya. 37Twena abaabaire bari omuri egyo meeri tukaba turi abantu magana abiri na makumi mushanju na mukaaga. 38Ku baaherize kurya baiguta, baanaga engano omu nyanja ngu emeeri eyanguhirwe. 39Ku bwaseesire, abarimbi tibaamanya nsi ei bahikireho, kwonka baayetegyereza ku guri omukono gw'enyanja oguriho enyambukiro y'omusheenyi; baayenda kuba niho baahikiza emeeri, kyaba nikibaasika. 40Mpaho baakomoorora ebitsibo, baabitsiga omu nyanja, kandi omuri ako kaanya baayuzya emirunga y'ebirikubogora emeeri. Bwanyima baahanika eitanga ry'omu maisho, boorekyeire ei omuyaga gurikutoora, baagyema enyambukiro. 41Kwonka ku baahikire ahu emishumba erikubugabuganira, egyo mishumba yaabatwara, yaabahitsya ahu amaizi gari magufu, emeeri yaashaaya. Eisinga ery'omu maisho ryayecumitamu ryahamiramu, obwo ery'enyima ryatandika kushatashaturwa ebingonzi birikwehuura. 42Abaserukare baaza omu naama y'okwita embohe, ngu hatakaagira owaaziha, akatoroka. 43Kwonka mukama waabo ahabw'okwenda kukiza Paulo, yaabazibira kukora eki baabaire nibenda. Yaaragiira abarikubaasa kuziha, ku baba nibo baabanza kwetuura omu nyanja, bakambuka; 44reero abandi babakurate bari aha mbaaho nari aha bishatuka by'emeeri. Batyo boona baahika aha nkungu buhooro.

will be added

X\