Acts 26

1Mpaho Aguripa agira Paulo, ati: Hati noikirizibwa kwetonganira. Paulo nawe nikwo kwimutsya omukono, akatandika kwetonganira, ati: 2Nyakusinga Aguripa, ningira ngu naahiirwa okureeba eri izooba naaza kwetonganira omu maisho gaawe emanja zoona ezi naatabaariziibwe Abayudaaya, 3kandi okukira munonga ahabw'okuba noomanyira kimwe eby'emicwe n'empaka z'Abayudaaya. N'ahabw'ekyo ninkweshengyereza, ogumisirize, ompurire. 4Abayudaaya boona nibamanya eby'emitwarize yangye okwiha omu buto, kandi naaba kutandika, nibamanya eby'amagara gangye ndi omu bantu b'eihanga ryangye n'omuri Yerusalemu. 5Okwiha ira nibammanya kandi nibabaasa kukihamya, baaba nibenda, ku naabaire nkuratira ekigombe ekirikukiza ebindi kuhitsya emigyenzo y'ediini yaitu, kandi ku nyowe mba Omufarisaayo. 6Mbwenu hati nintonganisibwa ahabw'okugira amatsiko aha ki Ruhanga yaaraganiise baatataitwe, ekyaraganisiibwe 7ab'enganda zaitu ikumi na ibiri kukitunga, baaba nibeezirika kuramya Ruhanga nyomushana na nyekiro. Ahabw'ago matsiko, Nyakusinga, nikyo Abayudaaya barikuntonganisiza. 8Mbwenu imwe Bayudaaya 'mwe, ahabw'enki nimugira ngu Ruhanga okuzoora abafiire n'ekintu eki mutarikubaasa kwikiriza? 9Nyowe nkaba nteekateeka ngu gukaba guri omurimo gwangye kukora kyona eki ndikubaasa kurwanisa eiziina rya Yesu owa Nazareeti. 10Ekyo nkakikorera omuri Yerusalemu; naata abahikiriire baingi omu kihome, obwo abahongyerezi abakuru bampaire obushoboorozi; kandi ku baabaire bacwerwa orw'okwitwa, naanye nkisiima. 11Emirundi mingi nkaba ngyenda nindaba omu mateeraniro, mbaha ebiheneso, obwo ninteeraho kubagyema, ngu beehakane enyikiriza yaabo. Okumanya ku naabaire mbagirira ekiniga kihango, nkaba ntaho n'okubakurata omu ndembo z'agandi mahanga. 12Omu hururu emwe nk'ezo, ku naabaire ninza Damasiko, mpairwe obushoboorozi kandi ntumirwe abahongyerezi abakuru, 13Nyakusinga, ku bwabaire bwaba eihangwe nkwaitse ningyenda, naareeba okwaka okurikumurinkana kukira okw'eizooba kwaruga omu iguru. Kwayaka munonga kuunyehinguriirize nyowe n'abu naabaire ningyenda nabo. 14Twena twagwa ahansi, reero naahurira eiraka niringambira omu Ruheburaayo, riti: Saulo, Saulo, nompiiganisiza ki? Nooyeruhiza busha kuteera omuhunda omugyere. 15Ntyo ngira nti: Ori oha, Mukama wangye? Mukama angarukamu ati: Niinye Yesu ou orikuhiiganisa. 16Kwonka imuka, oyemerere, ahabw'okuba eki naakubonekyerera n'eki: Naakutoorana kuba omuheereza wangye, kandi kareebi w'okuhamya oku wandeeba, n'ebindi ebi ndikweyorekyeramu. 17Ndyakujuna ab'eihanga ryawe Abaisiraeli, nkwihe n'omu mikono y'Abanyamahanga abu naaza kukutumamu. 18Obahumuure, barugye omu mwirima, baze omu mushana, baimuure Sitaane, beehongyere Ruhanga, kandi ahabw'okuunyikiriza basaasirwe ebibi byabo, batungye omugabo hamwe n'abeeziibwe. 19N'ahabw'ekyo, Nyakusinga Aguripa, nyowe tinkubaasize kugomera okwo kubonekyerwa kwarugire omu iguru. 20Mpaho naakora eki ntakukozire, naatandikira aho kurangirira ab'omuri Damasiko, naataho aba Yerusalemu n'ab'omuri Buyudaaya yoona kandi n'Abanyamahanga, nimbeehanangiriza kweteisa n'okukubuukira Ruhanga, nibakora ebishemereire abeegarukiremu. 21Ekyo nikyo Abayudaaya bankwatiire ndi omuri Nyaruju, bakenda kuunyita. 22Kwonka ahabw'okurindwa Ruhanga, nkyemereireho n'okuhitsya eri izooba, nimpamiza abakuru n'abato, kandi ebi ndikugamba bitari bindi, kureka ebi abarangi na Musa baagambire ngu biryabaho: 23ku Kristo aribonabonesibwa kandi ahabw'okuba ow'okubanza kuzooka omu bafiire ku Abayudaaya hamwe n'Abanyamahanga aribahwezesa. 24Ku yaabaire yaahika ahari ekyo naakyetonganira, Fesito yaagamba n'eiraka rihango ati: Paulo, ka waayanjuka! Manya okwega munonga kwawe nikwo kukwanjwire omutima. 25Paulo amugarukamu ati: Ow'ekitiinwa Fesito, tiinyanjukire, kureka ebi ndikugamba n'amazima gonka. 26Omugabe ebi naabimanya, na hati nimmugambira ntaine keekyengo, ahabw'okuba nimpamya ku ebi byona arikubimanya; kandi tindabikoreire mu keehogo. 27Nyakusinga Aguripa, noikiriza eby'abarangi? Hoona nimmanya ku orikubiikiriza. 28Aguripa nikwo kugira Paulo ati: Ebishi, waaburaho kakye kumpindura Omukristo! 29Paulo amugarukamu ati: Yaaba bikye nari bingi, kwonka nyowe eki ndikushaba Ruhanga, tiiwe wenka, kureka n'abandi mwena abampuriire eri izooba, mube nkaanye okwihaho eby'ezi njegyere. 30Mpaho omugabe aimuka hamwe n'omutegyeki omukuru na Berinike n'abandi boona abaabaire bashutami nabo. 31Ku baaherize kuyaabuuka, baagambirana bonka, bati: Ogu mushaija taine ki akozire ekishemereire kumwitisa nari kumukomesa. 32Aguripa nawe yaagira Fesito ati: Ogu muntu akaarekwirwe, kuri atarajuriire hari Kaisaari.

will be added

X\