Acts 25

1Fesito ku yaabaire amazire ebiro bishatu ahikire omu ishaza, yaaruga Kaisaariya, yainamuka Yerusalemu. 2Abahongyerezi abakuru n'abakuru b'Abayudaaya baamugambira eby'orubanja rwa Paulo, 3nibamushaba n'ekihika kubakorera eky'embabazi, akabareetera Paulo Yerusalemu, babone kumugwera bamwitire omu muhanda. 4Kwonka Fesito yaabagarukamu ku Paulo arikwija kuguma Kaisaariya ari omu kihome, kandi ku we arikwija kugarukayo juba. 5Yaayongyera yaabagira ati: K'abaine obushoboorozi omuriimwe bashuume hamwe naanye, kandi ku haraabe hariho ekintu kyona eki ogwo mushaija yaashobize, bamutabaarize. 6Ku yaamazire nabo ebiro bitarikweshumba ahari munaana nari ikumi, yaashuuma Kaisaariya. Aha izooba eryakuratsireho, yaashutama aha kitebe kye ky'oburamuzi, yaaragiira ku bareeta Paulo. 7Ku baamureetsire bati, Abayudaaya, abaabaire barugire Yerusalemu baamwehinguririza nibamutabaariza bingi, kandi eby'amaani ebi bo batarabaasize kuhamya. 8Paulo we yaayetonganira ati: Nyowe tinkakoraga kintu kyona ekirikuhenda eiteeka ry'Abayudaaya, nari okushobya ahari Nyaruju, nainga okucumura ahari Kaisaari. 9Fesito ahabw'okwenda kusiimwa Abayudaaya, yaagira Paulo ati: Noikiriza kwinamuka Yerusalemu, kuba niyo waatonganisizibwa emanja ezi omu maisho gangye? 10Kwonka Paulo yaamugarukamu ati: Nyowe nyemereire omu maisho g'ekitabe ky'eiramuriro erya Kaisaari, niho nshemereire kutonganisizibwa. Naiwe nookimanya gye ku ntaine kintu kyona eki ndashobeize Abayudaaya. 11Ku ndaabe niinyomeserezibwa orubanja rwona orw'okuunyitisa, ntaruga aha, muunyite. Kwonka ebi aba bantu barikuntabaariza ku biraabe bitarimu nsha, tihariho oine obushoboorozi bw'okubandekurira. Nyowe naajurira ahari Kaisaari. 12Fesito ku yaaherize kwehanuuza aha bahabuzi be, yaamugarukamu ati: Waajuriire ahari Kaisaari; owa Kaisaari obe niyo waaza. 13Ku haahingwireho ebiro, omugabe Aguripa na Berinike baahika Kaisaariya kutangirira Fesito. 14Baateerayo ebiro. Fesito nikwo kuteekyerereza ogwo mugabe eby'orubanja rwa Paulo, naagira ati: Aha hariho omushaija ou Felikisi yaatsigire omu kihome. 15Naanye ku naabaire ndi Yerusalemu, abahongyerezi abakuru hamwe n'abakuru b'Abayudaaya baamutabaariza, nibenda ngu acwerwe orubanja rumusingye. 16Kwonka naabagira nti: Ti mucwe gw'Abarooma kucwera omuntu orubanja, baakimutabaariza batariho, kandi atakaikiriziibwe kwetonganira orubanja rubarikumutura. 17N'ahabw'ekyo ku baizire aha, naanye tinaasiibyayo. Aha izooba eryakuratsireho, naashutama aha kitebe omu iramuriro, naaragiira ku bareeta ogwo mushaija. 18Abarikumutabaariza ku baayemereire, tibaamutabaariza rubanja rwona orubi nk'oku naabaire ninteekateeka. 19Kureka baamutonganisa ebitari bimwe ebikwatiraine n'ediini yaabo, n'eby'omushaija owaafiire orikwetwa Yesu, ou Paulo yaabaire naagira ngu ahuriire. 20Nyowe ku naashobangiriirwe kutaaha omu bintu nk'ebyo, naamubuuza ku araabe naikiriza kuza Yerusalemu, akaba niyo yaabitonganisizibwa. 21Kwonka Paulo yaajurira ahari Rubambansi, ngu abe niwe yaamucwera orubanja; naanye nikwo kuragiira ku arindwa, okuhitsya obu ndimwoherereza Kaisaari. 22Aguripa yaagira Fesito ati: Naanye nkaayenzire kuhurira ogwo muntu. Onu ati: Orabumuhurire nyencakare. 23Ku bwaseesire, Aguripa na Berinike baizira omu kitiinwa kingi, baataaha omu iramuriro bashagatiirwe abakuru b'amahe n'abanyamaziina b'omuri orwo rurembo; mpaho Fesito yaaragiira ku bareeta Paulo. 24Bwanyima Fesito ogwo yaagira ati: Nyakusinga Aguripa, naimwe mwena abateeraniire aha, nimureeba omu maisho gaanyu omushaija ou Abayudaaya boona ab'omuri Yerusalemu n'ab'aha banshabire nibandigitirira kandi nibatokoorekana, ngu tashemereire kurekwa akagumaho. 25Nyowe ahabwangye nkareeba ku ataine kicumuro ki arakozire eky'okumwitisa; kwonka we ku yaajuriire ahari Rubambansi, naacwamu eky'okumwoherezayo. 26Kandi nk'oku ntaine kishoboorokire eky'okuhandiikira Rubambansi omugabe aha by'ogu mushaija, nikyo naamureetera omu maisho gaanyu mwena, munomuno omu maisho gaawe, Nyakusinga Aguripa, ngu mbone kutunga eki ndaahandiikye. 27Manya nindeeba ku kitahikire kwohereza embohe, ntoorekire manja zirikugitabaarizibwa.

will be added

X\