Acts 23

1Paulo ahamya amaisho ab'eishengyero, atandika kugamba ati: Banyaruganda, okuhitsya eri izooba ntuura nintwaza gye omu maisho ga Ruhanga, ntaine kirikunshinja. 2Ku yaagambire ekyo, Ananiya omuhongyerezi omukuru yaaragiira abeemereire Paulo haihi, kumuteera aha munwa. 3Paulo yaamugira ati: Iwe kisiika kisiigirwe einoni 'we, Ruhanga naiwe aryakuteera! Oshutami aha kitebe kuncwera orubanja nk'oku eiteeka riri, haza oragiira kunteera kunu kitarikwikirizibwa? 4Abaabaire bamwemereire aha rubaju bagira bati: Ka noojuma omuhongyerezi mukuru wa Ruhanga! 5Paulo agarukamu ati: Beene tata, naaba ntarikumanya ku ari omuhongyerezi omukuru, manya ekyahandiikirwe nikigira kiti: Otarijuma omutegyeki w'eihanga ryawe. 6Paulo ku yaamanyire ngu abateeraniire aho, abamwe n'Abasadukaayo, abandi n'Abafarisaayo, yaagambira Eishengyero n'eiraka rihango, ati: Beene waitu, nyowe ndi Omufarisaayo kandi omwana w'Abafarisaayo. Nintabaarizibwa ahabw'okuba itwe twikiriza ngu abafiire baryazooka. 7Ku yaabaire yaaheza ati kugamba ekyo, Abafarisaayo n'Abasadukaayo baimutsya empaka, eishengyero ryayecwamu kabiri. 8Manya Abasadukaayo bagira ngu, tihariho kuzooka kandi tihariho baamaraika nobu yaakuba emitima; haza kunu Abafarisaayo babiikiriza byonshatu. 9Haabaho orwari rwingi, bamwe aha bahangu b'eiteeka ab'omu kigombe ky'Abafarisaayo baayemerera, baabahakanisa n'amaani bati: Titurikureeba eki ogu mushaija ashobize. Shana Mutima nari maraika akaaba niwe amugambiire! 10Empaka ku zaarambire, omukuru w'eihe yaatiina, ngu batakaanyururana Paulo bakamutaanyaguza, yaaragiira engabo ze kushuuma, zimubasikure, zimutware omu kigo. 11Nyekiro Mukama yaamubonekyera, yaamugira ati: Hama! Nk'oku wambeera kareebi omuri Yerusalemu, obe nikwo waatwaza n'omuri Rooma. 12Ku bwaseesire, Abayudaaya baayeteerana: baacuma enaama nibahiga ku batarikwija kurya nari kunywa okuhitsya obu baraite Paulo. 13Abaacumire egyo naama bakaba nibeeshumba ahari makumi ana. 14Baaza aha bahongyerezi abakuru n'aha bakuru omu ihanga, baabagira bati: Twahigira kimwe ku tutarikwija kurabya kantu mu kanwa, tutakaitsire Paulo. 15Mbwenu imwe hamwe n'eishengyero, ekyanyu n'okushaba omukuru w'eihe kumubareetera, mushushe nk'abarikwenda kwetegyereza gye eby'orubanja rwe; reero ekyaitu n'okweteekateeka tukamwita atakabahikire. 16Kwonka mwihwa wa Paulo yaahurira egyo naama y'okumugwera; yaaza omu kigo, yaagigambira Paulo, 17N'onu yaayeeta omwe omu bakuru b'abaserukare igana, yaamugira ati: Twara omutsigazi ogu aha mukuru w'eihe, aine eki arikwenda kumugambira. 18Yaamutwara, yaamuhitsya omukuru w'eihe, yaagira ati: Paulo embohe yaanyeta, yanshaba kukureetera omutsigazi ogu, ngu aine eki arikwenda kukugabira. 19Omukuru w'eihe nikwo kumukwata omukono, akamuta aha rubaju, akamubuuza ati: Nooyenda kungambira ki? 20Onu ati: Abayudaaya baacuma enaama y'okushaba kureeta Paulo omu ishengyero nyencakare, nk'abarikwenda kubuuririza gye eby'orubanja rwe. 21Kwonka iwe otabaikiriza kukubeihabeiha, ahabw'okuba hariho abantu barikweshumba ahari makumi ana abamugwereire, kandi baherize kuhiga ngu tibarirya, tibarinywa, kureka baaheza kumwita. Na mbwenu bariyo beeteekateekire, bategyereize eki oraagambe. 22Omukuru w'eihe atyo araga ogwo mwojo naamwehanangiriza ati: Otagira ou waagambira ku waabimmanyisa. 23Bwanyima omukuru w'eihe akeeta babiri aha bakuru b'abaserukare, yaabagira ati: Muteekateekye abaserukare magana abiri, hamwe n'ab'embaraasi makumi mushanju n'ab'amacumu magana abiri, baze Kaisaariya shaaha ishatu za nyekiro. 24Haza mutungire Paulo embaraasi z'okutemba, mumutwarire Felikisi omutegyeki omukuru, atahikirweho kabi. 25Yaahandiika n'ebaruha erikugira eti: 26Ow'ekitiinwa Omutegyeki Omukuru Felikisi, nyowe Kalaudio-Lusiya, ninkuramutsya. 27Omushaija ogu akwatsirwe Abayudaaya, kandi bakaamwitsire kuri ntahikireho n'abaserukare bangye nkamuhunzya, ahabw'okuba maanyire ku ari Omurooma. 28Ahabw'okwenda kumanya eki barikumutabaariza, mmutwaire omu maisho g'eishengyero ryabo, 29naashanga eki barikumutura kiine akakwate n'ebi barikufa omu by'eiteeka ryabo, kwonka ataine rubanja orushemereire kumwitisa nari kumutaisa omu kihome. 30Ku mmanyire ngu bamwiniire enaama y'okumwita, naarahuka kumukwoherereza, kandi naamanyisa abarikumutabaariza ku bagambira omu maisho gaawe eki barikufa nawe. Ogumeho. 31Abaserukare baakora nk'oku baaragiirwa, baatwara Paulo nyekiro, baamuhitsya Antipatiri. 32Ku bwaseesire, baamutsigira ab'embaraasi kugumizamu nawe bo baagaruka omu kigo. 33Ku baahikire Kaisaariya, baaha ogwo mutegyeki omukuru ebaruha, kandi baamukwatsa Paulo. 34Ogwo mutegyeki omukuru ku yaashomire egyo baruha, yaamubuuza ekyanga ki arikurugamu. Ku amanya ngu naaruga Kilikiya, 35amugira ti: Orubanja rwawe niinyija kuruhurira baakitabaaza baahika aha. Atyo aragiira ku bamurindira omu kikaari kya Herode.

will be added

X\