Acts 21

1Bwanyima ku twaherize kutaana nabo, twatoora ogw'enyanja, twagumizamu tutyo, twahika Koosi. Eizooba ryakuratsireho, twahika Rooda. Okwo niyo twarugire nituza Patara, 2ei twashangire obwato burikuza Foinikiya, tukaburagaramu, tukagyenda. 3Ku twaherize kuranzya Kupuro, twagitsiga orubaju rwa bumosho, twaza Siriya. Twarugayo twahika Tuuro, ahabw'okuba niyo baabaire nibaza kuteekuururira esika omu bwato. 4Ku twaherize kubona abaikiriza, twamaraho ebiro mushanju. Ahabw'okuhaburwa Mutima, baagambira Paulo kutaza Yerusalemu. 5Kwonka obunaku ku bwahikire, twaimutsya orugyendo. Boona hamwe n'abakazi n'abaana baatushendekyereza, okuhitsya obu twarugire omuri ekyo kirorero. Ku twahikire aha nkungu y'enyanja, twatsimba amaju twashaba. Bwanyima ku twaherize kuragana, 6twaza omu bwato, nabo baagarukayo owaabo. 7Orugyendo rwaitu rw'okuruga Tuuro ku rwahwaire, twahika Putolemaida, ei twaramukiize abanyaruganda, tukabaraarira ekiro kimwe. 8Ku bwaseesire twarugayo, twahika Kaisaariya. Twaraba ahari Filipo omurangirizi w'Amakuru Marungi, omwe ahari bari omushanju, twamuraarira. 9Akaba aine bahara be bana enshugaane, bari abarangikazi. 10Ku twabaire tumazireyo ebiro, haija omurangi orikwetwa Agabo, naaruga Buyudaaya. 11Yaakwata orukoba rwa Paulo yaarwekomesa ebigyere n'emikono, yaagira ati: Oku nikwo Mutima Orikwera arikugamba ati: Mukama w'orukoba oru naija kukomwa atyo Abayudaaya b'omuri Yerusalemu, bamuheyo omu Banyamahanga. 12Ekyo ku twakihuriire, itwe n'abandi boona abaabaire bariho, twayehanangiriza Paulo kutaza Yerusalemu. 13Yaatugarukamu ati: Mbwenu ekyo nimukora ki; haza muza aho, murira ngu muncwe entegye? Manya nyowe tiinyeteekateekyeire kukomwa kwonka, kureka n'okufeera omuri Yerusalemu ahabw'eiziina rya Mukama Yesu. 14Mpaho ku ayanga kutworobera, tumureka tugira tuti: Mukama eki arikwenda kikorwe. 15Ebyo ku byahwaire, twakoma ebyaitu, twainamuka twaza Yerusalemu. 16Bamwe omu baikiriza ba Kaisaariya baatushendekyereza, baatuhitsya aha nju y'Omunyakupuro ou twabaire nituza kuraarira, orikwetwa Munasooni, omwe aha baikiriza abaabandize. 17Ku twahikire tuti omuri Yerusalemu, abanyaruganda baatutangirira n'okushemererwa kwingi. 18Ku bwaseesire, Paulo yaagyenda naitwe kureeba Yakobo, kandi abakuru b'ekigombe ky'Abakristo boona bakaba bariyo. 19Ku yaaherize kubaramutsya, yaabateekyerereza byona ebi Ruhanga yaamukoreise omu Banyamahanga. 20Nabo ku baabihuriire, baahimbisa Ruhanga. Kwonka baamugira bati: Munyaruganda, iwe nooreeba oku enkumi n'enkumi z'Abayudaaya bahindukire bakaikiriza; haza boona nibeezirika kukuratira eiteeka. 21Kwonka bahuriire ku orikwegyesa Abayudaaya boona abatwire omu Banyamahanga kutsigaho eiteeka rya Musa; kandi ngu noobagambira ku kitarikuragiirwa kushara batabani baabo, nari okukuratira emicwe y'eihanga. 22Mbwenu tugire tuta? Manya boona tibarikubura kuteerana, ku baraahurire ngu oizire. 23Hati kora eki turikukuhabura. Aha twineho abashaija bana abaahigire; 24obatware, oyeyeze hamwe nabo, oihure byona eby'okubamwa eishokye. Ekyo nikiija kumanyisa boona ku ebi baakugambireho bitari by'amazima, kandi naiwe obutoosha ku okuratira eiteeka. 25Mbwenu Abanyamahanga abaikiriize tuherize kubahandiikira, twabamanyisa ebi twahingwize, ku bashemereire kwetantara ebitambiirwe ebishushani, orwamba, enyama y'ebihotoirwe, n'ebikwatiraine n'obushambani. 26Aha izooba eryakuratsireho, Paulo yaatwara abo bashaija, yaayezibwa nabo. Yaataaha omuri Nyaruju kumanyisa obunaku obu ebiro by'okwezibwa biraahweremu, ku nibwo ekihongwa kya buri omwe kiriheebwayo. 27Ebiro ebyo omushanju ku byabaire biri haihi kuhwaho, Abayudaaya bamwe abaarugire Asiya baareeba Paulo omuri Nyaruju. Baimukiiriza abantu, baamukwata, 28nibayogoora bati: Imwe Baisiraeli 'mwe, nimutuhe emikono! Ogu niwe mushaija oza buri hantu, akarangirira abantu naahakanisa eihanga ryaitu, eiteeka n'omwanya ogu. Mbwenu ataahize Abaguriiki omuri Nyaruju, atyo yaahagaza omwanya ogu ogurikwera! 29Ekyo bakakigamba, ahabw'okuba bakaba baareebire Turofimo Omunyaefeso ari hamwe na Paulo omu rurembo, baateekateeka ngu Paulo amutaahize omuri Nyaruju. 30Orurembo rwona rwajagarara, abantu baayooka, baakwata Paulo, baamukurubana, baamushohoza aheeru ya Nyaruju, ahonaaho enyigi zaakingwa. 31Bakiba nibenda kumwita, enkuru ehika omukuru w'eihe, ku Yerusalemu yoona yaajagarara. 32Ahonaaho ayeta abaserukare n'abakuru baabo, boohokyera abo bantu; nabo ku bareeba omukuru w'eihe n'abaserukare, barekyera aho kuteera Paulo. 33Ogwo omukuru w'eihe ku yaahikire Paulo, yaamukwata, yaaragiira ku bamukomesa enjegyere ibiri, yaabuuza ati: Ogu n'oha, kandi akozire ki? 34Bamwe omuri ekyo kimbuuro ky'abantu bagarukamu nibabuuza, bamwe eki, n'abandi ekindi; orwari rwabo rumuremesa kushoboorokyerwa eki barikugamba, nawe nikwo kuragiira ku batwara Paulo omu kigo ky'abaserukare. 35Ku baahikize Paulo aha bitembezo, ekyo kimbuuro ky'abantu kyayeyongyera kugira ekishinjo, abaserukare nikwo kumukiriza; 36abantu boona bakaguma babakuratiire nibayogoorekana bati: Mumwite! 37Kwonka Paulo ku yaabaire arangariire kutaahibwa omu kigo, yaabuuza omukuru w'eihe ati: Noonyikiriza kugira eki naakugambira? Onu ati: Biri noogamba Oruguriiki? 38Tiiwe Munyamisiri ori ogomeise abantu ebiro ebi, akatwara omu ihamba abashaija enkumi ina abaitsi b'abantu? 39Paulo amugarukamu ati: Nyowe ndi Omuyudaaya enzaarwa y'omu rurembo Taruso orw'omuri Kilikiya. Naakweshengyereza, nyikiriza ngire eki naagambira abantu. 40Onu amwikiriza. Paulo nikwo kuretsya abantu n'omukono ayemereire aha bitembezo. Boona ku baacecekire, yaabagambira omu Ruheburaayo.

will be added

X\