Acts 20

1Akajagararo ku kaahwaire, Paulo yaayeeta abaikiriza, yaabagambira eby'okubagumya, yaabaraga, yaimutsya orugyendo kuza Makedoniya. 2Ku yaaherize kuraba omuri ebyo byanga, n'okubagambira ebigambo bingi by'okubagumya, yaaza Buguriiki. 3Okwo amarayo ameezi ashatu. Ku yaabaire naayenda kutemba obwato kuza Siriya, Abayudaaya bacuma enaama y'okumwita. Nawe nikwo kucwamu kugaruka enyima akatoora ogwa Makedoniya. 4Obwo akaba ashendekyereziibwe Sopateeri, mwene Puuro owa Beroya; na Arisitariko na Sekundo Abatesalonika; Gaayo owa Deribe na Timoteeho na Tukiko na Turofimo aba Asiya. 5Boona baatwebembera nibaza Turoa ei baatutegyerereize. 6Naitwe twaruga Filipi turi omu bwato, ebiro by'Emigaati Etatumbisiibwe biherize kuhwaho. Twabugabuganira nabo Turoa, hahingwireho ebiro bitaano; okwo twamarayo ebiro mushanju. 7Aha kiro ky'okubanza omu wiiki, tukateerana kurya kumwe omugaati, Paulo owaabaire arariire kugyenda bwasheesha, yaagumizamu naagamba nabo, bwarugaho bwaba eitumbi. 8Ekishengye ky'ahaiguru eki twabaire tuteeraniiremu, kikaba nikyakwamu amatabaaza maingi. 9Paulo ku yaagumiizemu naagamba, omutsigazi orikwetwa Eutuko, owaabaire ashutami aha ndeebareebo y'edirisa, yaahungira, oturo twarugaho twamurembya, yaahanantuka omuri kaanyinaashatu, yaayetuura ahansi. Bamwihaho afiire. 10Paulo yaashuuma, yaajuumarira ogwo mwojo, yaamubumbatira, yaagira ati: Murekye kutiina, akihuriire. 11Atyo agarukayo omu kishengye ky'ahaiguru, acwamu omugaati, aryaho, agumizamu naagamba okuhitsya obu yaarugireyo nibwaba, akagyenda. 12Bwanyima baatwara ogwo mwojo ahuriire, omutima gwabagaruka omunda. 13Itwe nu tukatemba obwato, twaza Aso kwakiirirayo Paulo, ahabw'okuba we akaba acwiremu kutoora ogw'ebigyere. 14Ku yaatushangire Aso, twamuta omu bwato, twagumizamu twahika Mituleene. 15Ku bwaseesire, twarugayo, twahika ahashungaine na Kiyo. Aha kiro kya kabiri twahika Samosi, kandi eizooba eryakuratsireho twayegaranjura Mileeto. 16Obwo Paulo akaba amaririire kutaraba Efeso, ngu atakaakyerererwa omuri Asiya. Manya akaba aine obwira, ngu kyaba nikibaasika, abe omuri Yerusalemu aha kiro kya Pentekooti. 17Paulo ku yaabaire ari Mileeto, yaatuma aha bakuru b'ekigombe ky'Abakristo ba Efeso kumushangayo. 18Ku baahikireyo, yaabagambira ebigambo ebi ati: Nimumanya oku emitwarize yangye yaabaire eri, naaba kubaijamu omuri Asiya, 19oku naabaire mpeereza Mukama n'obucureezi bwingi, kandi nimumanya obusaasi n'ebihikiirizi ebyangwireho ahabw'enaama mbi z'Abayudaaya. 20Tindarekire kubakorera kintu kyona ekibainiire omugasho omu kubarangirira n'okubahabura, muteeraniire hamwe kandi muri n'omu maka gaanyu, 21obwo niinyehanangiriza Abayudaaya n'Abaguriiki okweteisiza Ruhanga n'okwikiriza Mukama waitu Yesu. 22Hati nimureeba ku ndikugyemwa Mutima kuza Yerusalemu ntarikumanya birambeho naahikayo; 23kureka omu buri kirorero ki ndabiremu, Mutima Orikwera ammanyiise gye, ku ndi ow'okuteebwa omu kihome n'okuhiiganisibwa. 24Kwonka nyowe tiinyine ki ndikutiina omuri ebyo byona, n'amagara gangye tindikugeeta kantu, kizima niho ndikuhikiiriza orugyendo rwangye n'omurimo ogu Mukama Yesu yampaire, nikwo kuhamya Amakuru Marungi ag'embabazi za Ruhanga. 25Mbwenu nimmanyira kimwe ku hatariho n'omwe omuriimwe, abu naahikireho nimbuzya eby'obukama bwa Ruhanga, orincwa eryera obundi. 26N'ahabw'ekyo hati nimbahamiza ku ndi mwere ahariimwe mwena oku mwingana, 27ahabw'okuba nkabamanyisa eby'enaama ya Ruhanga byona ntarikwebarira. 28Mwerinde kandi murinde obusyo bwona obu Mutima Orikwera yaabakwatsize kureeberera, okuba abariisa b'ekigombe kya Mukama, eki yaayecunguriire n'eshagama ye wenka. 29Nimmanya gye ngu ku ndigyenda, emishega enshaarizi eryabataahirira, kandi obwo busyo teribugirira saasi. 30Nangwa n'omuriimwe haryarugamu abantu abarihabisa abaikiriza. 31N'ahabw'ekyo mwerinde, kandi mwijukye ku naamazire naimwe emyaka eshatu, ntarikwosha nyomushana na nyekiro nimpabura buri omwe n'amarira. 32Hati nimbakwatsa Ruhanga n'ekigambo kye eky'embabazi. Abahamye, abahe omwanya ogu mwateekateekyeirwe omu beeziibwe boona. 33Nyowe tinkashabaga muntu weena kasente nari eky'okujwara. 34Manya mwena nimumanya ku emikono yangye egi niyo yaabaire empaisa eby'okutunga hamwe n'abu naabaire nyine. 35Ebyo byona nkabikora kubooreka ku tushemereire kukoresa amaani, ngu tubone kuhwera abatagaine, obwo nitwijuka ebigambo bya Mukama Yesu, owaagizire ati: Okugaba kwine omugisha okukira okuheebwa. 36Paulo ku yaaherize kugamba ebyo, yaatsimba amaju nabo boona, baashaba. 37Obwo, boona bakaba nibarira, nibarengyeza Paulo emikono omu maraka, nibamunywegyera. 38Ekyakizire kubareetera obusaasi n'okubagambira ngu tibarimucwa ryera bundi. Batyo baamushendekyereza, baamuhitsya aha bwato.

will be added

X\