Acts 2

1Ekiro kya Pentekooti ku kyahikire, boona baashangwa bateeraniire omu mwanya gumwe. 2Ahonaaho baahurira okuhoorera nk'okw'omuyaga gw'amaani nikuruga omu iguru. Kwaijura enju yoona ei baabaire bashutamimu, 3kandi baareeba ekirikushusha endimi z'omuriro; ezo ndimi zaayebaganisamu, zaaza ahari buri omwe omuribo. 4Boona baijura Mutima Orikwera, baatandika kugamba endimi ezindi nk'oku Mutima yaabahaire kuzigamba. 5Obwo omuri Yerusalemu hakaba harimu Abayudaaya abeeziriki omu diini, abaabaire barugire omu mahanga goona g'omu nsi. 6Ahabw'okuhoorera okwo, boona baateeranira hamwe bashobeirwe, ahabw'okuba buri omwe omuribo akahurira abo bantu nibagamba omu rurimi rw'owaabo. 7Baatangaara bagwire omu kahuriko nibagira bati: Beitu aba bantu boona abarikugamba bati ti Abagalilaaya? 8Mbwenu kyaruga hi buri omwe omuriitwe kuhurira nibagamba omu rurimi rwaitu rw'enzaarwa? 9Haza turi Abapariti, Abameedi, Abeelamu; abatwire Mesopotamiya, Buyudaaya na Kapadokiya; Abaponto n'Abaasiya, 10Abafurugiya n'Abapanfuliya; Abanyamisiri n'ab'ebicweka bya Libiya ebyehinguririize Kureene; otaireho n'abagyenyi abarugire Rooma, Abayudaaya, n'abataahiibwe omu diini y'Ekiyudaaya, 11Abakureete n'Abaharabu; twena nitubahurira nibeegyesa omu rurimi rwaitu ebikuru ebi Ruhanga yaakozire. 12Boona baatangaara bashobeirwe oku baraakishoboorore, nibabuuzana amakuru gaakyo. 13Abandi baabashekyeerera, nibagira bati: Beetiihire viino y'omutahe. 14Bwanyima Petero akeemerera na bari ikumi n'omwe, yaagambira ekimbuuro ky'abantu n'eiraka rihango ati: Imwe bantu ba Buyudaaya 'mwe, naimwe abatwire Yerusalemu, murekye kucuramirirwa, kureka mutegye okutu eki naaza kubagambira. 15Abantu aba tibasinzire nk'oku murikuteekateeka; bakaasinzire bata, egi eri eshaaha ya kashatu ya nyomushana? 16Manya eki nikyo kyarangirwe omurangi Yoeli, ati: 17Ruhanga akagira ati: Omu biro by'aha muheru, ndyashuka Mutima wangye aha bantu boona. Batabani baanyu, na bahara baanyu baryaranga, abatsigazi baanyu baryabonekyerwa, n'abagurusi baanyu baroote ebirooto. 18Kandi abahuuku bangye n'abazaana bangye omu biro ebyo nabo ndyabashukaho Mutima wangye, barangye. 19Ndyayoreka eby'okutangaaza ahaiguru omu iguru n'obumanyiso ahansi omu nsi. 20Eizooba riryahinduka omwirima, n'okwezi kube eshagama, ekiro kya Mukama ekikuru kandi eky'ekitiinisa kitakahikire. 21Kandi obwo, weena orihoogyera eiziina rya Mukama, aryajunwa. 22Bantu ba Isiraeli 'mwe, nimuhurire eki naaza kugamba: Yesu owa Nazareeti akaba ari omuntu ou Ruhanga yaabahamiize n'eby'okutangaaza n'obumanyiso, ebi yaamukoreise akiri omuriimwe, nk'oku mwena murikukimanya. 23Yesu ogwo owaahairweyo ahariimwe, nk'enaama ya Ruhanga ei yaacumire oku yaabaire eri, n'oku yaakimanyire kitakabaireho, mukamukwata, mwamurekurira abantu abatategyekwa iteeka ryaitu, baamubamba. Mukamwita, 24kwonka Ruhanga yaamuzoora omu bafiire, yaamwiha omu buhuruzi bwa rufu, ahabw'okuba kikaba kitarikubaasika we kuguma omu maino gaayo. 25Na Daudi nikwo yaamugambireho ati: Nyakubaho niwe mpanga amaisho obutoosha, tihariho kibaasa kuntengyeetsa yaaba anyine. 26Nikyo omutima gwangye gwesingiriza, orurimi rwangye rukatyongooza, n'omubiri gwangye gukabukaara, 27ahabw'okuba toritsiga magara gangye okuzimu, nari okureka nkunzi yaawe kujunda. 28Okaanyoreka omuhanda gw'amagara, oryampa okunanuka kwingi, ori hamwe naanye. 29Beene waitu, tihariho orikuhakana, ngu tatenkuriitwe Daudi tarafiire, akaziikwa; reeba, n'ekituuro kye kiri aha ahi tutwire. 30Kwonka nk'oku yaabaire ari omurangi, akamanya ku Ruhanga yaamurahiriire endahiro, ngu omwe aha baijukuru aryamuhungurira, aze aha kitebe ky'obugabe. 31Eki yaareebire kare ekyo, akakigambaho, nikwo kuzooka kwa Kristo. Niwe ogwo otaratsigirwe kuzimu, kandi ou omubiri gwe gutararekirwe kujunda. 32Ruhanga akazoora Yesu ogwo omu bafiire, naitwe twena turi baakareebi baakyo. 33N'ahabw'kyo, Yesu ku yaaherize kutunguurwa akaza aha mukono gwa buryo gwa Ruhanga, n'okuheebwa Mutima Orikwera ou Ishe yaamuraganiise, niwe yaashuka ekyo eki murikureeba n'eki murikuhurira. 34Manya Daudi we takatembaga mu iguru: kwonka ebi niwe yaabigambire ati: Nyakubaho akagambira Mukama wangye, ati: Shutama aha rubaju rwangye rwa buryo, 35okuhitsya obu ndigira abazigu baawe, endibatiro y'ebigyere byawe. 36N'ahabw'ekyo ab'enju ya Isiraeli boona bamanyire kimwe ku Yesu ogwo ou mwabambire, Ruhanga yaamuhindwire Mukama kandi Kristo. 37Ku baahuriire ekyo, baayomeserezibwa omu mutima, baagira Petero n'entumwa ezindi bati: Beene waitu, tugire tuta? 38Petero yaabagarukamu ati: Mwegarukyemu, buri omwe omuriimwe abatizibwe omu iziina rya Yesu Kristo, mubone kusaasirwa ebibi byanyu; kandi nimwija kuheebwa ekiconco kya Mutima Orikwera. 39Ahabw'okuba okuraganisibwa okwo n'okwanyu n'abaana baanyu n'abandi boona abari hare, boona abu Mukama Ruhanga waitu aryeyetera. 40Petero yaamara omwanya muraingwa naabashoboororera bingi, kandi yaabeehanangiriza ati: Mwerokore, murugye omu b'obusingye obu obuhabire. 41Mpaho abaikiriize ebigambo bye baabatizibwa. Eryo izooba abantu nk'enkumi ishatu baayongyerwa aha mubaro gwabo. 42Abo bakaguma nibeezirikira ebi entumwa zirikubeegyesa, nibakwatanisa nazo, nibacwamu nazo omugaati kandi nibashaba nazo. 43Eby'okutangaaza n'obumanyiso bwingi ebyabaire nibikorwa entumwa, byareetera omuntu weena kutiina. 44Abaikiriize abo boona bakaguma bari hamwe, nibakwatanisa omu bi batungire byona. 45Bakaba batunda ebintu byabo n'ebi baine; ebyarugamu babibagana, nibareeba aha bukyene bwa buri omwe. 46Buri izooba bakaba baza kumwe omuri Nyaruju, kandi bateeranira hamwe omu maka gaabo kucwamu omugaati; barya ebyokurya byabo bashemereirwe, baine omutima murungi, 47nibahimbisa Ruhanga kandi nibasiimwa abantu boona. Buri izooba Mukama yaaguma naabongyeraho abarikujunwa.

will be added

X\