Acts 19

1Apolo ku yaabaire akiri Korinto, Paulo yaagyenda naaraba omu kyanga kya ruguru, yaahika Efeso ei yaashangire abatendekwa bamwe. 2Ku yaababuurize ati: Mukaheebwa Mutima Orikwera obu mwaikiriza? Baamugarukamu bati: Ngaaha, nangwa titukahuriraga ku hariho Mutima Orikwera. 3Agaruka ababuuza ati: Mbwenu shi mukabatizibwa muta? Bati: Tukabatizibwa okwa Yohaana. 4Paulo ati: Okubatiza kwa Yohaana kukaba kuri okw'abeegarukiremu kandi akaba ayehanangiriza abantu ngu baikirize ogwo orikwija amukuratiire, niwe Yesu. 5Ku baahuriire ekyo, baabatizibwa omu iziina rya Mukama Yesu. 6Kandi Paulo ku yaabataireho ati emikono, Mutima Orikwera yaabaijaho; baatandika kugamba endimi n'okuranga. 7Boona bakaba bari nka ikumi na babiri. 8Bwanyima Paulo yaaza omu iteeraniro, yaagambiramu n'obumanzi, kandi yaahakaniramu n'obwengye kubaikirizisa eby'obukama bwa Ruhanga. Yaamara ameezi ashatu naakora atyo, 9okuhitsya obu bamwe omu baabaire nibamuhurira baagangaire, bakanga kwikiriza. Ku baatandikire bati kuhakanisiza eby'Omuhanda gwa Mukama omu maisho g'abantu, yaataana nabo, yaatwara abatendekwa be kwehereera, kandi buri izooba baaguma nibahanuurira omu kishengye kya Turaano eky'okwegyesezamu. 10Yaagumizamu naakora atyo kumara emyaka ebiri; ekyarugiremu, abantu b'omuri Asiya boona Abayudaaya n'Abaguriiki, baahurira ekigambo kya Mukama. 11Ruhanga akakoresa Paulo eby'okutangaaza by'omutaano. 12Bakaba batwara ebitambaara n'emitanda ebyabaire bimuhikaho, babikoza aha barwaire, bakira endwara, n'ebyago bibarugaho. 13Abandi Bayudaaya abaabaire bagyenda nibabinga ebyago, bakateeraho kukoresa eiziina rya Mukama Yesu aha bantu abaabaire batembirwe ebyago, nibagira bati: Ninkuragiira omuri Yesu ou Paulo arangirira. 14Omuri abo abaakikozire, hakaba harimu abatsigazi mushanju, batabani b'Omuyudaaya Sikeeva omuhongyerezi omukuru. 15Ekyago kyabagarukamu kiti: Yesu nimmumanya na Paulo nimmumanya; kwonka imwe muri baahi? 16Ogwo mushaija oriho ekyago nikwo kubagurukira, akaikarira ow'okubanza, akataho n'ondi, akabajuguta; bakahunga omuri egyo nju bajwaire busha kandi bahutaire munonga. 17Abantu boona ab'omuri Efeso, Abayudaaya n'Abaguriiki, ku baakihuriire, baatiina munonga; haza eiziina rya Mukama Yesu ryaheebwa ekitiinwa kihango. 18Baingi aha baikiriize, baija, baayatura ebi baabaire nibakora, baabitondoora byona. 19Kandi abaabaire nibakora eby'obufumu, barundaana ebitabo byabo baabyokyeza omu maisho g'abantu. Obuguzi bwabyo bukabariirirwa, bwahitsya ebicweka by'efeeza obukumi butaano. 20Kityo ekigambo kya Mukama kyayongyera kubuga n'amaani, kitarikuteerwa ha mutwe. 21Ebyo byona ku byahwaire Paulo yaamariirira kugaruka Yerusalemu, naaraba Makedoniya na Akaiya. Yaagira ati: Ku ndaabe naaherize kuhikayo, niinyija kuza na Rooma. 22Atyo yaatuma babiri aha bahwezi be, Timoteeho na Eraasito kumwebembera kuza Makedoniya, we akitsigaire omuri Asiya. 23Omu bunaku obwo hakabaho akaimukiiriro k'akabi, akakwatiraine n'eby'Omuhanda gwa Mukama. 24Omuheesi w'eby'efeeza orikwetwa Demetirio, owaabaire naaheesesa abanyamyoga baingi ebishushani by'endaaro za ruhangakazi Aritemi, 25akataho oruteerane ruhango rw'abantu be n'abandi abarikukora omurimo nk'ogwe. Yaabagira ati: Bashaija 'mwe, nimumanya omurimo gw'okuheesha ogu ku nigwo gutwemereizeho. 26Mbwenu muherize kureeba nainga kuhurira, ti muri Efeso yonka, kureka n'ahandi hoona omuri Asiya, ku omushaija ogu Paulo ayohize kandi ahindwire abantu baingi munonga, naabashoboororera oku baaruhanga abakozirwe engaro batari baaruhanga n'akakye. 27Eki tikirikwita bushuubuzi bwonka, kureka n'endaaro y'emandwakazi yaitu rugambwa Aritemi nikiija kugimaramu ensha, kandi tikiribura kwihaho kitiinwa ky'emandwakazi erikuramibwa omuri Asiya yoona n'ahandi hoona omu nsi. 28Ebigambo ebyo bikabaitsa ekiniga, baatandika kwamuza bati: Aritemi w'Abeefeso niwe rugambwa! 29Orurembo rwona rwaimukiirira, omutwe gw'abantu gwayeshuka omu kizaaniro, gwabindirana Abamakedoniya babiri, Gaayo na Arisitariko, abu Paulo yaabaire agyenda nabo. 30Paulo yaayenda kuza omuri abo bantu kubaretsya, kwonka abatendekwa tibaamukundira. 31Kandi na bamwe aha bakungu bakuru ba Asiya, abaabaire bari banywani be, baamutumaho nibamweshengyereza kutaza mu kizaaniro akeenaga omu kabi. 32Obwo buri omwe akaba naayomba okwe, okuhitsya obu abaabaire bateeraniireho baabuzirwe kumanya ekiriho, n'abaingi batarikumanya ki beeteirwe. 33Abayudaaya baayoha Alekisandero omu maisho gaabo. Ab'omu kimbuuro ky'abantu ku baimukize akaari k'okumuhigika, yaabaretsya n'omukono, ngu akaagira eki yaashoboororera abantu. 34Kwonka ku baamanyire Alekisandero ku ari Omuyudaaya, baayamuza n'eiraka rimwe, bagumize bati: Aritemi ow'Abeefeso niwe rugambwa! Baagumizamu batyo okuheza eshaaha ibiri. 35Omuhandiiki ku yaaherize kucureeza ogwo mutwe gw'abantu, yaabagira ati: Imwe Banyaefeso 'mwe, hariho omuntu otarikumanya ngu orurembo rw'Abeefeso nirwo rurinda eiramizo rya Aritemi omukuru rugambwa, kandi n'ekishushani kye ekyarugire omu iguru? 36Ekyo tihariho n'omwe orikukihakanisa, kandi timushemereire kwimukiirira nari okukorera eryo ekintu nimurahukiiriza. 37Abashaija aba abu mwareeta tibacumwire, kandi tibarogotsire ha mandwakazi yaitu. 38Demetirio n'abanyamyoga bu aine ku baraabe baine ou barikufa nawe, hariho amaramuriro n'abategyeki bakuru, babe niyo baatwara orubanja rwabo. 39Kandi ku muraabe mwine ebi murikwenda kubabuuza, mubibabuurize omu ruteerane rw'obutoosha. 40Manya naitwe tukaateebwaho orubanja rw'okujagarara ahabw'ebyabaho eri izooba. Tihariho ky'okwekwatsa ekyakitukoresa, kandi titwine ky'oburyo ekyatureetera kuteeranira aha. 41Ku yaaherize kugamba atyo, yaaragiira oruteerane kuyaabuuka.

will be added

X\