Acts 18

1Ebyo ku byahwaire, Paulo yaaruga Ateene, yaaza Korinto, 2ei yaabugaine Omuyudaaya orikwetwa Akwila, enzaarwa ya Ponto. We n'omukazi we Purisikila nibwo baabaire barugire juba Italiya, ahabw'okuba Rubambansi Kalaudio akaba aragiire Abayudaaya boona kuruga omuri Rooma. Paulo nikwo kuza kubataayaayira; 3kandi ku yaashangire bari abakozi b'amahema ab'omwoga nk'ogwe, yaaguma nabo nibakora kumwe. 4Buri Sabato akaba ahakanira omu mateeraniro, naateeraho kwikirizisa Abayudaaya n'Abaguriiki. 5Silaasi na Timoteeho ku baaherize kwija nibaruga Makedoniya, Paulo yaamara omwanya gwe gwona omu kurangirira, naagambira Abayudaaya ku Yesu ari Kristo. 6Ku baatandikire kumutariza n'okumujuma, yaakunkumura omunagiro gwe, naagira ati: Eshagama yaanyu ebe niimwe yaatukurira! Nyowe ndi mwere. Okwiha hati naaza omu Banyamahanga. 7Atyo arugayo aza omu nju ya Tito Yusito owaabaire aramya Ruhanga. Enju ye ekaba ehereeraine n'eiteeraniro. 8Kurisipo omukuru w'eiteeraniro, we n'ab'eka ye boona baikiriza Mukama. Abakorinto baingi munonga abaahuriire Paulo, nabo baikiriza kandi baabatizibwa. 9Ku bwabaire buri nyekiro, Mukama yaabonekyera Paulo, yaamugira ati: Otatiina, guma ogambe kandi otahunama. 10Nkwine kandi tihariho muntu weena oraakukore kubi, ahabw'okuba omu rurembo oru, nyinemu abantu baingi abari aha rubaju rwangye. 11N'ahabw'ekyo Paulo yaagumayo naarangirira ekigambo kya Mukama okumara ameezi ikumi na munaana. 12Galio ku yaabaire ari omutegyeki mukuru wa Akaiya, Abayudaaya baacuma enaama y'okukwata Paulo, baamutwara omu iramuriro. 13Baagira bati: Ogu mushaija nitumutabaariza orubanja rw'okwosya abantu kuramya Ruhanga omu buryo butarikwikirizibwa iteeka. 14Paulo ku yaabaire atakagambire, Galio yaagira Abayudaaya ati: Imwe Bayudaaya 'mwe, nimuhurire! Ekyo kuri kyaba kiri ekishobyo ky'okushaazya nari ekicumuro, nkaabaire nyine obwiho kw'okubahurira. 15Kwonka mbwenu empaka zaanyu ku ziraabe ziri aha bigambo n'aha maziina n'aha iteeka ryanyu mwenka, muzeemarire. Nyowe tinkaayenzire kucwa orubanja rw'ebintu nk'ebyo. 16Atyo ababinga omu iramuriro. 17Ahonaaho nabo bahindukana Sositene, omukuru w'eiteeraniro, baamuteerera omu maisho g'enju y'eiramuriro; Galio ebyo byona abihugaho. 18Bwanyima Paulo ku yaaherize kuteerayo ebiro, yaaraga abanyaruganda, yaatoora ogw'enyanja, yaaza Siriya aine Purisikila na Akwila. Ku yaabaire ari Kenkereya, yaamwerayo eishokye nk'oku yaabaire ahigire. 19Ku baahikire Efeso, yaabatsigayo. Yaataaha omu iteeraniro wenka, yaahakana n'Abayudaaya. 20Ku baamushabire ku abooshera ebindi biro, yaayanga. 21Kwonka ku yaagiire kurugayo, yaabagira ati: Ruhanga yaaba akunzire, ndyagaruka. Atyo atoora ogw'enyanja, aruga Efeso. 22Yaayambukira Kaisaariya, yaaza kuramutsya ekigombe ky'Abakristo, bwanyima yaataaha Antiokiya. 23Okwo yaamarayo ebiro bikye atakagumiizemu rugyendo rwe, orw'okuraba omu nsi y'Abagalatiya n'omuri Furugiya, naagumya abaikiriza boona. 24Ago magingo Omuyudaaya orikwetwa Apolo, enzaarwa ya Alekisanderiya, owaabaire ari omugambi murungi kandi orikumanya munonga Ebyahandiikirwe, akahika Efeso. 25Kwonka nobu araabe yaabaire ayegyesiibwe eby'Omuhanda gwa Mukama, kandi naarangirira n'omuhimbo ebya Yesu n'okubyegyesa gye, hoona akaba naamanya eby'okubatiza kwa Yohaana byonka. 26Purisikila na Akwila ku baamuhuriire naagambisa obumanzi omu iteeraniro, baamutwara, baayongyera kumwegyesa eby'Omuhanda gwa Ruhanga. 27Apolo ku yaatungire ekiteekateeko ky'okwambuka kuza Akaiya, abanyaruganda baamugumya, baahandiikira abaikiriza baayo kumwakiira. Ku yaahikireyo, yaakwatsa munonga abaikiriize ahabw'okuhwerwa Ruhanga, 28ahabw'okuba akahakanisisa amaani Abayudaaya omu maisho g'abantu, kandi yaabashoboororera naayema omu Byahandiikirwe ku Yesu ari Kristo.

will be added

X\