Acts 17

1Paulo na Silaasi bakaraba Anfipoli na Apoloniya, baarugaho baahika Tesalonika, ei Abayudaaya baabaire bainemu eiteeraniro. 2Paulo nk'oku omucwe gwe gwabaire guri, yaabeetondera. Aha Sabato ishatu ezaakurataine, yaahakana nabo naajuriza Ebyahandiikirwe, 3naashoboorora kandi naahamya ku Kristo yaabaire ari ow'okubonabonesibwa n'okuzooka omu bafiire. Yaagaruka yaabagira ati: Yesu ou ndikubarangirira niwe Kristo. 4Abamwe omuribo bakashoboorokyerwa, baakwatanisa na Paulo na Silaasi, n'Abaguriiki baingi abarikutiina Ruhanga, hamwe n'abakazi abanyamaziina batari bakye. 5Kwonka Abayudaaya ku baitsirwe eihari, baayeteerana n'abantu babi b'omu bizengyerezi by'omu katare, baimukiiriza ekimbuuro ky'abantu, baajagaraza ekirorero kyona. Baataahirira ab'omwa Yasooni, ngu bakaashangamu Paulo na Silaasi, babakurura, babatwara ahu abantu boona bateeraniire. 6Kwonka tibaashangamu ondi weena, kureka Yasooni n'abanyaruganda bamwe; baabakurubana, baabahitsya omu maisho g'abakuru b'ekirorero, nibayogoora bati: Abantu ababaire nibajuumika ensi yoona, mbwenu baahika n'aha, 7kandi Yasooni niwe abaire naabaraaza, haza nibagomera ebiragiro bya Kaisaari byona, nibagira ngu hariho ondi mugabe orikwetwa Yesu. 8Abanyakirorero hamwe n'abanyaishengyero baayo ku baahuriire ekyo kirego, baayagaara, 9baaragiira Yasooni n'abandi kugira eki baabakwatiriza, batakabarekwire. 10Obwire ku bwaizire buti, abanyaruganda baayohereza ahonaaho Paulo na Silaasi ngu baze Beroya. Ku baahikireyo bati, baataaha omu iteeraniro ry'Abayudaaya. 11Abaayo ahabw'okugira omutima murungi okukira aba Tesalonika, baajwahukira ekigambo n'ekihika, buri izooba baaguma nibashwijuma Ebyahandiikirwe, kureeba yaaba kiri eky'amazima. 12Abayudaaya baingi baikiriza hamwe n'Abaguriikikazi baingi ab'ekitiinwa, n'abashaija batari bakye. 13Abayudaaya ba Tesalonika ku baahuriire ngu Paulo naarangirira ekigambo kya Ruhanga n'omuri Beroya, baazayo kurabanisamu abantu n'okubajagaraza. 14Abanyaruganda nikwo kwohereza Paulo ahonaaho kuza aha nyanja; Silaasi na Timoteeho bo baatsigarayo. 15Abaashendekyereize Paulo bakamuhitsya Ateene, baagaruka n'obutumwa bwe, ku Silaasi na Timoteeho bamushangayo ahonaaho nk'oku kirabaasikye. 16Paulo ku yaabaire akitegyerereize Silaasi na Timoteo omuri Ateene, yaashaasha munonga kureeba orwo rurembo rwona rwijwire ebishushani ebirikuramibwa. 17Yaaguma naahakanira omu iteeraniro n'Abayudaaya n'Abanyamahanga abarikutiina Ruhanga, kandi omu kajagiro buri izooba ahakana na weena owaamwizira. 18Nangwa n'abanyabwengye bamwe, abarikwetwa Abeepikuro n'Abasitoiki baahakana nawe. Abamwe baagira bati: Beitu egi ngambi ya maingi, ebyo neemanya ebi erikugamba? Reero ahabw'okwegyesa ahari Yesu n'eby'okuzooka, abandi bati: Nooshusha oti n'omuntu orikubuzya orukuru rw'ebya baaruhanga abu kunu tutarikumanya. 19Baamweta ku agyenda nabo omu ishengyero erikuru ei baamugiriire bati: Egi nyegyesa nsya ei obaire noogambaho, mbwenu okaagitushoboororera? 20Bimwe omu bi ogambire bitutangaarize, tukaayenzire kumanya amakuru gaabyo. 21Manya ekishemeza Abaateene n'Abanyamahanga abarutwiremu, n'okugaaniira aha bintu bisya ebihangire, hamwe n'okuhurira eki barikubigambaho. 22Paulo nikwo kwemerera ahagati y'eishengyero erikuru, akagamba ati: Imwe bashaija ba Ateene 'mwe, mperize kwetegyereza ku muri ab'ediini munonga. 23Manya ku mbaire ningyendagyenda omu rurembo rwanyu, niinyetegyereza ebi murikuramya, naareeba eitambiro erihandiikirweho ngu: N'erya Ruhanga otarikumanywa. Mbwenu Ruhanga ou ndikurangirira, buzimazima niwe ogwo ou muramya mutarikumumanya. 24Ruhanga owaahangire ensi yoona n'ebigirimu, niwe Nyakubaho w'eiguru n'ensi, tatuura mu ndaaro ezombekirwe emikono y'abantu. 25Tabangirwa bantu nk'oine eki akyenire, ahabw'okuba boona niwe abaha amagara n'omwitsyo na buri kintu. 26Akahanga amahanga g'omu nsi yoona, gaakomooka aha muntu omwe. Yaagateeraho ebiro bi garaamare, n'enyatano zaago ahi ziraagarukire. 27Akakora ekyo, ngu amahanga goona gabone kusherura Ruhanga nigabandagira, okuhitsya obu garimugwaho. Kwonka shi, tari hare n'omuntu weena omuriitwe; 28ahabw'okuba Omuriwe nimwo tutungira amagara tukagyenda kandi tukagumaho, nk'oku abahandiiki baanyu abamwe baagizire bati: Naitwe turi abaana be. 29Nk'oku turi abaana ba Ruhanga, titwine ky'okwekwatsa kugira ngu Ruhanga naashusha ezaabu, efeeza nari eibaare, ebisharwirwe bikaringirikwa omuntu. 30Ebyo Ruhanga akabirenzya amaisho abantu bakiri abashema; kwonka mbwenu naaragiira abantu boona ahi bari hoona ngu beegarukyemu. 31Ahabw'okuba akataho ekiro eki omuntu ou yaataireho aricwereraho ensi yoona orubanja omu mazima, kandi ekyo akakihamiza abantu boona obu yaazoora ogwo muntu omu bafiire. 32Ku baahuriire Paulo yaagamba eky'okuzooka omu bafiire, bamwe aharibo ensheko zaabeegyeka; abandi baagira bati: Tukaayenzire kuhurira ekyo nookigambaho obundi. 33Paulo atyo abarugaho. 34Kwonka habaho bamwe abaamwekomireho, bakaba abaikiriza; omuribo harimu Dionisio ow'eishengyero erikuru n'omukazi orikwetwa Damari, hamwe n'abandi.

will be added

X\