Acts 16

1Paulo ku yaarugireyo, yaaza Deribe na Lusitura. Okwo hakaba hariyo omwikiriza orikwetwa Timoteeho, ou nyina yaabaire ari Omuyudaayakazi kandi aikiriize, kwonka ishe ari Omuguriiki. 2Kandi Timoteeho ogwo abanyaruganda aba Lusitura na Ikonio bakaba bamugambaho gye. 3Mbwenu Paulo ku yaayenzire ngu bagyendane, yaamushara. Ekyo yaakikora ahabw'okuba Abayudaaya b'omu byanga ebyo boona bakaba nibamanya ishe ku ari Omuguriiki. 4Ahi baabaire bahika nibaraba omu birorero, bahamiza abantu ebyahinguziibwe entumwa n'abakuru omuri Yerusalemu, kandi babeehanangiriza kuguma nibabikuratira. 5Ekyo kyareetera ebigombe by'Abakristo kwongyera kuhamira omu kwikiriza n'okukanya buri izooba. 6Paulo na Silaasi bakaraba omu nsi ya Furugiya na Galatiya, obwo Mutima Orikwera abagambiire kutarangirira kigambo kya Ruhanga omuri Asiya. 7Ku baahikire aha nyatano ya Musiya, baayenda kugicwekanisa kuza Bituniya. Mutima wa Yesu ku yaabazibiire, 8baaraba omuri Musiya, baashuuma, baaza Turoa. 9Nyekiro Paulo yaabonekyerwa, naareeba Omunyamakedoniya ayemereire naamweshengyereza ati: Yambuka, oije Makedoniya, otuhwere. 10Ku yaaherize kubonekyerwa, titurahwamire, twatebeekanisa eby'orugyendo rw'okwambuka kuza Makedoniya, obwo nituhamya ku Ruhanga atwetsire kubatwarira Amakuru Marungi. 11Ku twatoire ogw'enyanja nituruga Turoa, twagumizamu twaza Samoturakiya. Eizooba eryakuratsireho, twaza Neapoli; 12twarugayo twahika Filipi, orurembo rukuru rwa Makedoniya, oru Abarooma baakubwire. Ku haahingwireho ebiro bikye turi omuri orwo rurembo, 13ahari Sabato twashohora nituraba omu irembo, twaza aha rubaju rw'omugyera, ahi twateekateekire ngu niho bashabira. Twashutama, twagaaniira n'abakazi abaabaire bateeraniireho. 14Omuri abo bakazi hakaba harimu orikwetwa Ludiya, omukazi oramya Ruhanga, owaarugire omu kirorero kya Tiyatira, omutunzi w'emyenda ya bujwa. Akatutega okutu, Mukama yaashashaanura omutima gwe, yaikiriza ebi Paulo yaagambire. 15We n'eka ye, ku baaherize kubatizibwa, yaatweshengyereza naagira ati: Ku muraabe nimumanya ngu ndi omwikiriza wa Mukama nyakabara, mwije mundaarire. Yaatugyemesereza. 16Ku twabaire nituza omu mwanya gw'okushabiramu, twabugana omuzaana owaabaire aragura, akareetera bakama be emikimbo ei abantu baabaire bamutaashura. 17Yaatandika kukuratira Paulo naitwe, naayamuza ati: Aba bantu n'abaheereza ba Ruhanga Rukiraboona, baizire kubarangirira omuhanda gw'okujunwa. 18Akaguma naagira atyo buri izooba, okuhitsya obu izooba rimwe Paulo yaasambisiirwe, akahinduka, akagira ekyo kyago ati: Ninkuragiira omu iziina rya Yesu Kristo, ruga ahari ogwo mwishiki. Ekyago kyamurugaho omuri ako kaanya. 19Bakama be ku baareebire hatakiriho matsiko g'okumutungamu ezindi mpiiha, baakwata Paulo na Silaasi, baabakurubana, baabatwarira ab'obushoboorozi omu kajagiro. 20Okwo niyo baabatabaaririize omu maisho g'abaramuzi, nibagira bati: Abantu aba n'Abayudaaya, nibarabanisamu ekirorero kyaitu. 21Nibeegyesa emicwe erikuzibirwa eiteeka ryaitu, ei itwe Abarooma tutarikwikiriza, kandi etari mu mitwarize yaitu. 22Ekimbuuro ky'abantu baakwatanisa nabo kubarwanisa, abaramuzi baaragiira ku babajuura, bakabateera ebyasha. 23Ku baaherize kubaasha, baabata omu kihome, baaragiira omukuru waakyo kubarinda obutaita riisho. 24Nawe ahabw'okukuratira ebi yaaragiirwa, yaabata omu kihome eky'endugu; amaguru gaabo yaagata omu nkomo. 25Ekyo kiro omu itumbi, Paulo na Silaasi ku baabaire nibashaba kandi nibeeshongora eby'okuhimbisa Ruhanga, obwo ezindi mbohe zibategire amatu, 26ahonaaho haabaho omutsitsa mwingi, ogwatengyetsize ekihome n'obuhamizo bwakyo. Enyigi zoona zaiguka, n'enjegyere ezaabaire zikomire embohe zoona zaaragara. 27Omukuru w'ekihome ku yaasisiimukire, yaashanga enyigi zirangaire, yaasyorayo rurara kweita, naateekateeka ngu embohe zaatoroka. 28Kwonka Paulo yaayamuza n'eiraka rihango ati: Oteekora kubi, twena turi aha. 29Mukuru w'ekihome yaatuma kureeta amatabaaza, yaayetuura omu nju, yaagwa omu maguru ga Paulo na Silaasi naatetema, 30yaabashohoza aheeru, yaabagira ati: Bakama bangye nshemereire kukora ki, nkabona kujunwa? 31Baamugira bati: Ikiriza Mukama Yesu, nibwo oraajunwe n'eka yaawe. 32Kandi baamugambira ekigambo kya Mukama hamwe na boona abaabaire bari omu ka ye. 33Omuri eryo itumbi yaabatwara kuboozya obuhuta, yaabatirizibwayo n'ab'eka ye boona. 34Kandi yaabatwara owe, yaabaha ebyokurya; yaashemererwa hamwe n'ab'eka ye boona, ahabw'okuhinduka bakaikiriza Ruhanga. 35Ku bwaseesire, abaramuzi Abarooma baaragiira abakuru b'ekihome bati: Murekure abo bashaija. 36Omukuru w'ekihome yaabigambira Paulo, ati: Abaramuzi baaragiira ku tubarekura; mbwenu mwegyendere n'obusingye. 37Paulo yaabagarukamu ati: Oti enki? Itwe enzaarwa za Rooma batuteereire omu maisho g'abantu batakabandize kututonganisa, baataho n'okututa omu kihome, mbwenu nibagira ngu nibaija kuturekura bwesherekye? Ngaaha! Babe nibo baija bakatushohoza. 38Ebyo abarinzi b'ekihome baabigambira abaramuzi. Nabo baatiina munonga ahabw'okuhurira ngu abo bashaija n'enzaarwa za Rooma. 39Baija baabeehohoora, baabashohoza, baabeeshengyereza kuruga omuri ekyo kirorero. 40Batyo baaruga omu kihome, baaza omwa Ludiya ei baashangire abanyaruganda boona, bakabagumya, bwanyima bakagyenda.

will be added

X\