Acts 15

1Bwanyima abantu bamwe bakaruga Buyudaaya, baayegyesa abanyaruganda, bati: Ku muraabe mutashazirwe nk'oku eiteeka rya Musa ririkuragiira, timurikubaasa kujunwa. 2Ekyo kyabareetera empaka. Paulo na Barinaba ku baaherize kumara omwanya muraingwa nibahakana n'abo bantu, kyahamibwa ngu Paulo ogwo na Barinaba n'abandi ab'omu kigombe ky'Abakristo, bainamukye Yerusalemu kuhanuura ahari ekyo kigambo hamwe n'entumwa n'abakuru omu ihanga. 3Ab'ekigombe ky'Abakristo boona baabaraga. Ku baabaire nibaraba Foinikiya na Samariya, baagambira abaayo oku Abanyamahanga bahindukire bakaba Abakristo; egyo nkuru yaagwisa gye munonga abanyaruganda boona. 4Ku baahikire Yerusalemu, baayakiirwa ab'ekigombe ky'Abakristo hamwe n'entumwa n'abakuru omu ihanga; nabo baabateekyerereza byona ebi Ruhanga abakoreise. 5Kwonka bamwe omu Bafarisaayo abaabaire baikiriize, baahakana nibagira bati: Abanyamahanga bashemereire kusharwa n'okwegyesibwa kukuratira eiteeka rya Musa. 6Entumwa n'abakuru omu ihanga baateerana kwetegyereza ekyo kigambo. 7Ku baaherize kumara omwanya muraingwa nibahanuura, Petero yaayemerera, yaabagambira ati: Beene Tata, mwena nimumanya gye ku omu biro byahingwire, Ruhanga yaabantoorainemu, ngu ndangirire Abanyamahanga Amakuru Marungi babone kwikiriza. 8Buzimazima Ruhanga omanya ebiri omu mutima gwa buri muntu, akabahamiza ku arikubasiima, yaabaha Mutima Orikwera, nk'oku yaamutuhaire. 9Ruhanga taroorekire mutaano gwaitu nabo, akeeza emitima yaabo ahabw'okwikiriza. 10Tikikaagwisa kubi Ruhanga imwe hati ku mwakwekoreza abo baikiriza omutwaro ogu itwe nari baatatenkuriitwe batarabaasize kwekorera? 11Manya itwe twikiriza ngu tujunwa ahabw'embabazi za Mukama Yesu nkabo. 12Ekyo kikahunamya boona abaabaire bateeraniireho, baatega okutu Barinaba na Paulo nibashoboorora eby'obumanyiso byona n'eby'okutangaaza ebi Ruhanga yaabakoreise omu Banyamahanga. 13Abo ku baaherize kugamba, Yakobo nawe yaagamba ati: Beene tata, muntegye okutu. 14Simeoni yaaheza kubagambira oku Ruhanga yaateekateekire kwetooranira abantu kuba abe ab'envuma, naabaiha omu Banyamahanga. 15Ekyo buzimazima nikiikirizana n'ebi abarangi baagambire, ahabw'okuba Ebyahandiikirwe nibigira biti: 16Ebyo ku birihwa, ndyagaruka nyombekye busya enju ya Daudi eyaagwire, ngyombekye busya ahi yaasheenyukire, ngigarureho. 17Haza obwo abandi bantu n'Abanyamahanga boona abarikwetererwa eiziina ryangye, nibwo barisherura Mukama. 18Mukama owaatumanyiise ebyo okwiha iranaira, nikwo arikugamba. 19Yakobo agumizamu ati: Ka ngire nti: Omu mwanya gw'okureetera oburemeezi Abanyamahanga abahindukire, bakaba aba Ruhanga, 20tubahandiikire nitubagambira kwetantara ekintu kyona ekihagaziibwe ebishushani, ebikwatiraine n'obushambani, n'enyama y'enyamaishwa zihotoirwe, n'orwamba. 21Ahabw'okuba okwiha ira ebyahandiikirwe Musa bigira ababyegyesa omu buri kirorero, kandi bishomerwa omu mateeraniro buri Sabato. 22Bwanyima entumwa n'abakuru omu ihanga bakahamya kutoorana abajwekyerwa b'okutuma Antiokiya hamwe na Paulo na Barinaba. Ekigombe kyona eky'Abakristo kyakisiima; baatoorana Yuda orikwetwa Barisaba na Silaasi, abantu abakuru omu banyaruganda, 23baabakwatsa ebaruha erikugira eti: Itwe beene waanyu, entumwa n'abakuru omu ihanga, nitubaramutsya, imwe abanyaruganda, Abanyamahanga ab'omuri Antiokiya na Siriya na Kilikiya. 24Nituhurira ngu hariho bamwe abaarugire omuriitwe, abaabarabaniisemu, bakababuza obusingye ahabw'ebi barikwenda ngu mukore: haza tutarabaragiire. 25N'ahabw'ekyo tukaikirizana tuteeraine, kutoorana abajwekyerwa, tukababooherereza hamwe na Barinaba na Paulo, abu turikusiima munonga, 26abaahaireyo amagara gaabo ahabw'eiziina rya Mukama waitu Yesu Kristo. 27Mbwenu twabatumaho Yuda na Silaasi, abaraabagambire nibahamya ebi tuhandiikire omu baruha egi. 28Kisiimirwe Mutima Orikwera, naitwe okutabeekoreza gundi mutwaro, ogurikukira ebi ebirikwetengyerwa kimwe. 29Mushemereire kwetantara ebitambiirwe ebishushani orwamba, enyama y'enyamaishwa ezihotoirwe, n'ebikwatiraine n'obushambani. Ku muraayerinde ebyo, nimuba mukozire gye. Mugumeho! 30Abaatumirwe bakaimutsya orugyendo baaza Antiokiya, ei bateeraniire ab'ekigombe boona, bakabakwatsa ebaruha. 31Ku baagishomire, baashemerererwa munonga ebirikubagumya ebyabaire bigirimu. 32Yuda na Silaasi ahabw'okuba abarangi, bakagambira abo banyaruganda ebigambo bingi by'okubagumya n'okubagaruramu amaani. 33Abo bombi bakateerayo ebiro, bwanyima abanyaruganda baabaraga nibabendeza obusingye, batyo baagarukayo aha baabatumire. 34[Kwonka Silaasi we yaasiima kutsigarayo.] 35Kandi Paulo na Barinaba baaguma Antiokiya hamwe n'abandi baingi nibeegyesa kandi nibarangirira ekigambo kya Mukama. 36Ku haahingwireho ebiro, Paulo yaagira Barinaba ati: Ka tugarukyeyo, tutaayaayire ebirorero byona ebi twarangiriiremu ekigambo kya Mukama, tureebe abanyaruganda oku bari. 37Barinaba yaayenda ngu bagyende na Yohaana-Mariko, 38kwonka Paulo tiyaasiima kugyenda n'ogwo muntu owaabatsigireho Panfuliya, akanga kukwatanisa nabo omu murimo gwabo. 39Ku baaherize kugira empaka z'okucwana, baataana. Barinaba yaatoora ogw'enyanja na Mariko, baaza Kupuro. 40Paulo we, ku yaabaire atakaimukize, yaatoorana Silaasi kugyenda nawe; abanyaruganda baamukwatsa Ruhanga kumurindisa embabazi ze. 41Yaaraba Siriya na Kilikiya, naahamya ebigombe by'Abakristo baayo.

will be added

X\