Acts 13

1Omu kigombe ky'Abakristo ekya Antiokiya, hakaba harimu abarangi n'abeegyesa; Barinaba, Simeoni orikwetwa Nyakairaguju, taho Lukio owa Kureene, na Manaeni owaayoroirwe hamwe n'ow'eishaza Herode, na Saulo. 2Eizooba rimwe ku baabaire nibashaba Ruhanga kandi nibeesiibyakwo, Mutima Orikwera yaagira ati: Niinyenda munshoroorere Barinaba na Saulo, bakore omurimo ogu mbeeteire. 3Batyo ku baaherize kwesiibyakwo n'okushaba, baabataho engaro, baaboohereza. 4Bwanyima Saulo na Barinaba ku baaherize kutumwa Mutima Orikwera, baashuuma Seleukiya, ei baarugire nibatoora ogw'enyanja, bakaza aha kirwa Kupuro. 5Ku baahikire Salami, baarangirira ekigambo kya Mukama omu mateeraniro g'Abayudaaya; obwo baine Yohaana-Mariko naabakwatsa. 6Ku baaherize kucwekanisa ekirwa, baahika Paafo, baabuganayo Omuyudaaya omukozi w'emigyereko, kandi omurangi w'ebishuba orikwetwa Bari-Yesu. 7Bari-Yesu ogwo akaba ari munywani w'omutegyeki omukuru Serigio-Paulo ow'ekyo kirwa, owaabaire ari omushaija ohwerize munonga. Ogwo mutegyeki mukuru akeeta Barinaba na Saulo, yaabashaba ku bamugambira ekigambo kya Ruhanga. 8Kwonka Eluma, amakuru ngu, omukozi w'emigyereko, yaateeraho kubazibira, ngu ogwo mutegyeki omukuru atakaikiriza, akahinduka. 9Mpaho Saulo, orikwetwa Paulo, aijwire Mutima Orikwera, yaamutsimba eriisho, 10yaamugira ati: Iwe mwana wa Sitaane 'we, iwe muzigu w'ekyeetwa ekihikiriire, iwe oijwire obugobya n'obubi, ahabw'enki otarikurekyera aho kukiikamya emihanda ya Mukama egororokire? 11Mbwenu reeba, omukono gwa Mukama gwaza kukuteera, ohume, omare ebiro otarikureeba izooba. Omuri ako kacu Eluma ashwekwa oruho n'omwirima, abandagira naasherura ow'okumukwatira ekihimbo. 12Ogwo mutegyeki omukuru ku yaareebire ekyakorwa, yaikiriza naatangaarira ebi baayegyeise ahari Mukama. 13Paulo na bagyenzi be bakatoora ogw'enyanja, baaruga Paafo baaza Periga ey'omuri Panfuliya, ei Yohaana-Mariko yaataaniire nabo, akagaruka Yerusalemu. 14Abandi baagumizamu okuruga Periga okuhitsya obu baahikire Antiokiya ey'omuri Pisidiya. Ku baabaire bakiri okwo, ahari Sabato baaza omu iteeraniro, baashutama. 15Eby'eiteeka n'eby'abarangi ku byaherize kushomwa, abakuru b'eiteeraniro baabatumaho bati: Beene waitu, ku muraabe mwine eki murikwenda kugambira abateeraniire aha kubagumya, mukigambe. 16Paulo nikwo kwemerera, akabaretsya n'omukono, akatandika kugamba ati: Imwe Baisiraeli 'mwe, naimwe abatiina Ruhanga, nimuntegye okutu: 17Ruhanga w'eihanga ryaitu Isiraeli akatoorana baatataitwe, yaatunguura abantu baitu obu baabaire batwire omu nsi ya Misiri. Bwanyima ahabw'amaani ge yaabaihayo; 18yaabareeberera bari omu ihamba emyaka nka makumi ana. 19Ku yaaherize kucwekyereza amahanga mushanju ag'omuri Kanaani, yaabaha egyo nsi, yaaba eyaabo, baamarayo emyaka nka magana ana na makumi ataano. 20Ebyo ku byahwaire, yaabaha abaramuzi, baagumizamu okuhitsya aha murangi Samueli. 21Bwanyima baashaba kuheebwa omugabe; Ruhanga yaabaha Saulo mwene Kiishi ow'omu ruganda rwa Benyamiini, yaabategyekyera emyaka makumi ana. 22Ogwo ku yaamwihire aha ngoma, yaayemeka Daudi kuba omugabe waabo, ou yaagambireho ati: Nyeboneire Daudi mwene Yese, omuntu ori nk'oku omutima gwangye gurikwenda, orikora byona ebi nyenda. 23Ruhanga, okuhikiiriza eki yaaraganiise, akaimukiza Isiraeli omwe ahari baijukuru ba Daudi, niwe Yesu Omujuni. 24Ogwo obu yaabaire atakaizire. Yohaana akarangirira Abaisiraeli boona okwegarukamu n'okubatizibwa. 25Yohaana ku yaabaire naamariiriza omurimo gwe gw'omuri egi nsi, yaagira ati: Tindi ogwo ou murikuteekateeka ngu ndi we; we andi enyima ankuratiire, kandi tinshemereire kumukomoorora enkaito. 26Imwe beene waitu ab'oruzaaro rwa Aburahamu, naimwe mwena abatiina Ruhanga, obutumwa obu obw'okujunwa, niimwe bwaiziire. 27Eki abantu ba Yerusalemu n'abategyeki baabo baakozire ahabw'okutamanya Yesu, nobu kwakuba okushoboorokyerwa ebyagambirwe abarangi ebishomwa buri Sabato, bakabihikiiriza nibamucwera orubanja. 28Nobu baraabe batarareebire ekishemereire kumwitisa, hoona bakashaba Pilaato kumwita. 29Ku baaherize kuhikiiriza byona ebyamuhandiikirweho, baamuhanura aha musharaba, baamuziika omu kituuro. 30Kwonka Ruhanga yaamuzoora omu bafiire; 31yaamara ebiro bingi naabonekyera abaarugire nawe Galilaaya bakaza Yerusalemu; kandi nibo abo hati abarikumujurira omu bantu. 32Twaija aha kubagambira Amakuru Marungi ag'ebi Ruhanga yaaraganiise baatataitwe, 33akabihikiiriza ahariitwe baijukuru baabo naazoora Yesu omu bafiire, nk'oku kyahandiikirwe omuri zaaburi eya kabiri kiti: Ori Omwana wangye; eri izooba naakuzaara. 34Ekirikuhamya ngu Ruhanga akamuzoora omu bafiire, tarigaruka kujunda, nikyo ekyo eki yaagambire kare ati: Ndyabaha emigisha ehamire kandi erikwera ei naaraganiise Daudi. 35Akagambira n'omu kyevugo ekindi ati: Toriikiriza Orikwera waawe kujunda. 36Mbwenu Daudi omu biro bye ku yaaherize kukora emirimo ei Ruhanga yaamuteekateekyeire yaafa, yaaziikwa na baishe, yaajunda. 37Kwonka ogwo ou Ruhanga yaazoire omu bafiire tarajunzire. 38Beene waitu, mumanye ku okusaasirwa ebibi kurikurangirirwa ahabwa Yesu ogwo. 39Kandi weena orikwikiriza Yesu, naihwaho orubanja rw'ebibi byona, ebi eiteeka rya Musa ritarabaasize kumwihaho. 40N'ahabw'ekyo mwerinde mutakaahikwaho ebi abarangi baarangire nibagira bati: 41Imwe bashungi 'mwe, nimureebe, mutangaare kandi muhwerekyerere! Manya omu biro byanyu ninkora eki mutakwikiriize, nobu mwakukigambiirwe. 42Paulo na Barinaba ku baabaire nibaruga omuri eryo iteeraniro, abaamwo baabashaba ebi baabarangirira kugaruka kubibagambira ahari Sabato erikwija. 43Oruteerane ku rwayaabuukire, Abayudaaya baingi hamwe n'abaataahiibwe omu diini y'Ekiyudaaya abarikutiina Ruhanga, baakuratira Paulo na Barinaba; kandi omu kugaaniira kwabo, Paulo na Barinaba baabeehanangiriza kuguma bahamiire omuri rukundo ya Ruhanga. 44Sabato eyaakuratsireho, haihi ab'orurembo rwona bakateerana kuhurira ekigambo kya Ruhanga. 45Abayudaaya ku baareebire ebimbuuro by'abantu, baitwa eihari, baatandika kujuma n'okuhakanisa ebi Paulo yaagambire byona. 46Bwanyima Paulo na Barinaba baabagambira n'obumanzi bati: Niimwe tubandiizeho kurangirira ekigambo kya Ruhanga, kwonka mbwenu ahabw'okuba mwakyanga, kandi nimugira ngu timushemereire kutunga amagara agatahwaho, twaza kugarura omu Banyamahanga. 47Manya ekyo nikyo Mukama yaaturagiire kukora obu yaagira ati: Naakutaho kuba orumuri omu Banyamahanga, okujuna kwangye kubone kuhika omu nsi yoona. 48Abanyamahanga ku baakihuriire, baashemererwa munonga, baahimbisa ekigambo kya Ruhanga; kandi boona abu yaateekateekyeire amagara agatahwaho, baikiriza. 49Ekigambo kya Mukama kyabuga kityo omu nsi egyo yoona. 50Kwonka Abayudaaya baimukiiriza abakazi ab'ekitiinwa abarikutiina Ruhanga, hamwe n'abantu abakuru ab'omuri orwo rurembo, batyo baahiiganisa Paulo na Barinaba, baababinga omu kyanga kyabo. 51Ezo ntumwa nazo nikwo kubakunkumurira omucuucu gw'omu bigyere byazo, zikaza Ikonio. 52Kwonka abatendekwa baayo baijura okushemererwa na Mutima Orikwera.

will be added

X\