Acts 10

1Omuri Kaisaariya hakaba harimu omushaija orikwetwa Korinelio, omukuru w'omutwe gw'omu ihe ry'Abarooma ogurikwetwa ogw'Abaitaliya. 2Korinelio ogwo akaba ari omunyadiini, we n'ab'eka ye nibatiina Ruhanga. Akaba agabira Abayudaaya abooro aha bintu bye, kandi ashaba Ruhanga obutoosha. 3Eizooba rimwe nk'aha shaaha ya mwenda akabonekyerwa, yaareeba butunu maraika wa Ruhanga naataaha omu nju ye, naamweta ati: Korinelio! 4Onu yaamuhanga amaisho aitsirwe obwoba, yaamwetaba ati: N'enki, Mukama wangye? Maraika yaamugarukamu ati: Ruhanga asiimire okushaba kwawe n'okugaba kwawe, naiwe yaakwijuka. 5Mbwenu tuma abantu Yopa, beeteyo omushaija orikwetwa Simooni Petero, 6orikuraara omwa Simooni omuhazi w'empu, ou enju ye eri aha rubaju rw'enyanja. 7Maraika owaagambire ebyo ku yaagyenzire, Korinelio yaayeta babiri aha baheereza be, hamwe n'omuserukare omunyadiini ow'omu baserukare be abarikumurinda. 8Yaabagambira ekyabaho, bwanyima yaabatuma Yopa. 9Eizooba eryakuratsireho, ku baabaire nibakigyenda, batsigaizeyo orugyendo rukye kuhika ekirorero, aha shaaha nk'eya mukaaga, Petero yaatemba aha mutwe gw'enju kushaba. 10Ago magingo yaagira enjara, yaayenda kurya. Ku baabaire nibakiboneza ebyokurya, yaabonekyerwa nk'orikuroota, 11yaareeba eiguru rishuuruukire, kandi ekintu ekirikushusha omwenda muhango nikushuuma kuhika ahansi, nikirengyerera aha nshonda zaakyo ina, 12kirimu emiringo yoona ey'enyamaishwa n'ey'enyonyi z'omu mwanya n'ebirikugyendesa enda. 13Mpaho ahurira eiraka nirimugira riti: Petero, imuka, obiite, obirye. 14Petero agarukamu ati: Mbirimba, Mukama wangye! Nyowe tinkaryaga kintu kyona ekirikuzira nari ekihagaro. 15Kwonka eiraka rigaruka rimugira riti: Eki Ruhanga yaayerize, otarikyeeta ekirikuzira. 16Ekyo kyayekuratana kityo kashatu. Bwanyima ogwo mwenda gwona gwanyururwa, gwagarukayo omu iguru ahonaaho. 17Petero ku yaabaire akishobeirwe amakuru g'eki yaareeba, abashaija abaabaire batumirwe Korinelio baayegaranjura aho. Bakaba baahabwize ahu enju ya Simooni eri; batyo baija, baayemerera aha rwigi, 18nibabuuza bati: Aha hariho omugyenyi orikwetwa Simooni Petero? 19Obwo Petero ku yaabaire naakyebuuza kumanya amakuru g'ebi yaayorekwa, Mutima yaamugira ati: Reeba, hariho abashaija bashatu abarikukusherura. 20Rahuka oshuume, kandi otabangaanisa kugyenda nabo, ahabw'okuba niinye naabatuma kwija aha. 21Petero atyo ashuuma, abagira ati: Niinye ou murikusherura; beitu ekyabareeta ni ki? 22Nabo bamugarukamu bati: Korinelio omukuru w'abaserukare, omuntu ohikiriire, orikutiina Ruhanga kandi orikusiimwa Abayudaaya boona, ahabwirwe maraika orikwera kukweta n'okukutwara owe, ngu ahurire ebi oraagambe. 23Petero atyo abataasya omu nju, abaha oburaaro. Ku bwaseesire, yaimuka, yaagyenda nabo ashendekyereziibwe bamwe aha banyaruganda ba Yopa. 24Kaisaariya bakagihika aha izooba eryakuratsireho. Baashanga Korinelio abategyereize, ayetsire abanyabuzaare n'abanyamukago kubaho. 25Petero ku yaabaire naakihika ahari egyo nju, Korinelio yaashohora kumutangirira, yaatsimba amaju aha bigyere bye, yaajuumara kumuramya. 26Kwonka Petero amwimutsya, amugira ati: Imuka, naanye ndi omuntu nyabuntu. 27Baagyenda nibagaaniira, baataaha omu nju, baashangamu baingi abaabaire bateeraniiremu. 28Petero yaabagira ati: Nimumanya ku kirikuzira Abayudaaya kweturaaniza n'abantu b'erindi ihanga n'okubataayaayira. Kwonka Ruhanga akinshoboororeire gye, ku ntashemereire kweta omuntu weena ekirikuzira nari ekihagaro. 29Nikyo ntangiire kwija baanyeeta. Mbwenu nu, niinyenda kumanya eki muunyeeteire. 30Korinelio amugarukamu ati: Ebiro bina ebihingwire, nk'eshaaha mwenda z'omu mwabazyo, mbaire ndi omu nju yangye ninshaba; ku ngiire kugira nti, naareeba omu maisho gangye omushaija ojwaire ebirikumwamwatikana, 31yangira ati: Korinelio, Ruhanga ahuriire okushaba kwawe, kandi yaijuka okugaba kwawe. 32Mbwenu tuma Yopa, oyeteyo Simooni Petero, orikuraara omwa Simooni omuhazi w'empu, aha rubaju rw'enyanja. 33Naanye nikwo kukutumaho ahonaaho, kandi waakora gye kwija. N'ahabw'ekyo twena twateeranira aha omu maisho ga Ruhanga kuhurira ebi Mukama akuragiire kutugambira. 34Petero nikwo kubagambira ati: Mbwenu naamanya Ruhanga ku atashoroora mu bantu, 35kureka omuntu weena owa ibara ihanga omutiina akakora ebihikire, niwe asiima. 36Ruhanga akooherereza Abaisiraeli ekigambo kye, kubamanyisa Amakuru Marungi g'obusingye, naakirabya omuri Yesu Kristo, Mukama w'abantu boona. 37Ningira ngu nimumanya ebyabaireho omuri Buyudaaya ebya Yesu owa Nazareeti, nk'oku yaatandikiire omuri Galilaaya, Yohaana yaaherize kurangirira eby'okubatizibwa. 38Ruhanga akamusiigisa Mutima Orikwera, hamwe n'amaani. Mbwenu ahabw'okuba Ruhanga akaba ari hamwe nawe, Yesu ogwo akaba agyenda hoona naakora ebirungi, kandi naakiza boona abaabaire nibaitwa kubi Sitaane. 39Reero nyowe n'abu nyine, turi baakareebi b'ebyo byona ebi Yesu yaakoreire omuri Buyudaaya n'omuri Yerusalemu, n'oku baamwitsire bamuhanikire aha muti. 40Kwonka aha kiro kya kashatu Ruhanga akamuzoora, yaamubaasisa kureebwa, 41ti bantu boona, kureka baakareebi abu Ruhanga yaatooraine kare. Manya niitwe baakareebi abaariire nawe, tukanywa nawe aherize kuzooka omu bafiire. 42Bwanyima akaturagiira ku turangirira abantu be n'okubahamiza ku Ruhanga yaamutaireho kuba omuramuzi w'abahuriire n'abafiire. 43Abarangi boona niwe barikuhamya, nibagira ngu weena orikumwikiriza aryasaasirwa ebibi ahabw'eiziina rye. 44Petero ku yaabaire naakigamba ebyo, Mutima Orikwera yaashuuma ahari boona abaabaire bamutegire okutu. 45Abaikiriza abashazirwe abaabaire baizire na Petero, boona baatangaara kureeba Abanyamahanga nabo nibashukwaho ekiconco kya Mutima Orikwera. 46Manya bakabahurira nibagamba endimi z'endugamahanga kandi nibahimbisa Ruhanga. Petero nawe nikwo kugira ati: 47Ebyo hariho orikubaasa kwima aba bantu amaizi g'okubabatiza, baaherize kutunga Mutima Orikwera nkaitwe? 48Atyo aragiira ku babatizibwa omu iziina rya Yesu Kristo. Bwanyima bamushaba kuguma nabo ebiro bikye.

will be added

X\